ദുബായ്: ശൈത്യകാല വിനോദസഞ്ചാരത്തിനായി അൽ റുവയ്യ ക്യാമ്പിങ് കേന്ദ്രത്തിൽ വിപുലമായ സൗകര്യങ്ങളുമായി ദുബായ് മുനിസിപ്പാലിറ്റി. 2026–2027 ശൈത്യകാല ക്യാമ്പിങ് സീസണിൽ ക്യാമ്പുകളുടെ എണ്ണം 120 ശതമാനത്തോളം വർധിപ്പിച്ച് 600 ആയി ഉയർത്തി. നവംബർ ഒന്നിന് ആരംഭിക്കുന്ന സീസൺ 2027 ഏപ്രിൽ 30 വരെ നീണ്ടുനിൽക്കും.
യുഎഇ പൗരന്മാർക്ക് കൂടുതൽ സൗകര്യങ്ങളോടെ കുടുംബത്തോടൊപ്പം ശൈത്യകാലം ആസ്വദിക്കാനുള്ള അവസരമാണ് പുതിയ സീസണിലൂടെ ഒരുക്കുന്നത്. 400 ചതുരശ്ര മീറ്റർ വിസ്തീർണമുള്ള സാധാരണ ക്യാമ്പിങ് പ്ലോട്ടുകൾക്കൊപ്പം 800 ചതുരശ്ര മീറ്റർ വരെയുള്ള വലിയ പ്ലോട്ടുകളും ലഭ്യമാകും.
കാരവാനുകൾക്കായി പ്രത്യേക പ്ലോട്ടുകൾ
ആദ്യമായി 50 പ്രത്യേക കാരവാൻ പ്ലോട്ടുകളും മുനിസിപ്പാലിറ്റി ഒരുക്കിയിട്ടുണ്ട്. സ്വന്തമായി ക്യാമ്പ് സ്ഥാപിക്കാതെ തന്നെ താമസസൗകര്യം ആഗ്രഹിക്കുന്നവർക്കായി പൂർണമായും സജ്ജീകരിച്ച 10 ക്യാമ്പുകളും ദിവസവാടകയ്ക്ക് ലഭിക്കും.
കുടുംബസംഗമങ്ങൾക്കും വിനോദപരിപാടികൾക്കും സാമൂഹിക പ്രവർത്തനങ്ങൾക്കുമായി 10 പ്രത്യേക സ്ഥലങ്ങളും സജ്ജമാക്കിയിട്ടുണ്ട്. ശൈത്യകാല വിപണികൾ ഉൾപ്പെടെയുള്ള പരിപാടികൾ സംഘടിപ്പിക്കാനും ഇതിലൂടെ അവസരമൊരുങ്ങും.
ചെറുകിട സംരംഭകർക്കും അവസരം
ഭക്ഷണപാനീയ സേവനങ്ങൾ, മരുഭൂമിയിലെ വിനോദപ്രവർത്തനങ്ങൾ, മറ്റ് വിനോദസൗകര്യങ്ങൾ എന്നിവ ഒരുക്കുന്നതിനായി ചെറുകിട, ഇടത്തരം സംരംഭങ്ങൾക്ക് പ്രത്യേക നിക്ഷേപാവസരങ്ങളും അനുവദിക്കും. ഇതിലൂടെ സന്ദർശകർക്ക് കൂടുതൽ സേവനങ്ങൾ ലഭ്യമാക്കുന്നതിനൊപ്പം പ്രാദേശിക സംരംഭകത്വം പ്രോത്സാഹിപ്പിക്കാനും ലക്ഷ്യമിടുന്നു.
അൽ റുവയ്യയെ കൂടുതൽ സമഗ്രമായ ശൈത്യകാല വിനോദകേന്ദ്രമായി വികസിപ്പിക്കുന്നതിന്റെ ഭാഗമായാണ് പുതിയ മാറ്റങ്ങളെന്ന് ദുബായ് മുനിസിപ്പാലിറ്റി പബ്ലിക് ഫെസിലിറ്റീസ് ഏജൻസി സിഇഒ ബദർ അൻവാഹി പറഞ്ഞു. കുടുംബങ്ങൾക്കും യുഎഇ പൗരന്മാർക്കും സുരക്ഷിതവും ക്രമീകരിച്ചതുമായ അന്തരീക്ഷത്തിൽ ശൈത്യകാലം ആസ്വദിക്കാനുള്ള അവസരങ്ങൾ വിപുലീകരിക്കുമെന്നും അദ്ദേഹം വ്യക്തമാക്കി.
രജിസ്ട്രേഷൻ എങ്ങനെ?
യുഎഇ പൗരന്മാർക്ക് ദുബായ് മുനിസിപ്പാലിറ്റിയുടെ ഔദ്യോഗിക ഡിജിറ്റൽ പ്ലാറ്റ്‌ഫോമായ wintercamp.dm.gov.ae, DubaiNow ആപ്പ് എന്നിവ വഴി ക്യാമ്പിങ് പ്ലോട്ടുകൾ ബുക്ക് ചെയ്യാം.
മൂന്ന് മുതൽ ആറുമാസം വരെയുള്ള കാലയളവിലേക്ക് സീസണൽ ബുക്കിങ് ലഭ്യമാണ്. കാരവാൻ പ്ലോട്ടുകൾക്കും പൂർണമായും സജ്ജീകരിച്ച ക്യാമ്പുകൾക്കും പ്രത്യേക ബുക്കിങ് സൗകര്യങ്ങളുമുണ്ട്.
ക്യാമ്പുകൾ സ്ഥാപിക്കുന്നവർ ആവശ്യമായ അനുമതികൾ നേടുകയും നിർദേശിച്ച അതിരുകളും താൽക്കാലിക വേലികളും പാലിക്കുകയും വേണം. അനുവദിച്ച ക്യാമ്പുകൾ കുടുംബാവശ്യങ്ങൾക്കും ക്യാമ്പിങ് പ്രവർത്തനങ്ങൾക്കും മാത്രമായി ഉപയോഗിക്കണമെന്നും മുനിസിപ്പാലിറ്റി നിർദേശിക്കുന്നു.
കൂടുതൽ സൗകര്യങ്ങളും വിനോദാനുഭവങ്ങളും ഒരുക്കി അൽ റുവയ്യയെ ദുബായിലെ പ്രധാന ശൈത്യകാല കുടുംബ വിനോദകേന്ദ്രങ്ങളിലൊന്നായി വികസിപ്പിക്കുകയാണ് മുനിസിപ്പാലിറ്റിയുടെ ലക്ഷ്യം.
