കോക്പിറ്റിൽ വെച്ച് പരിക്കേറ്റ ക്യാപ്റ്റൻ സ്മിത് മച്ചാറിനെയും സഹപ്രവർത്തകരെയും നേരിട്ട് സ്വീകരിച്ച് യുഎഇ പ്രസിഡന്റും ദുബായ് ഭരണാധികാരിയും; രാജ്യം എന്നും കൂടെയുണ്ടാകുമെന്ന് ഉറപ്പ്.
അബുദാബി — ആകാശയാത്രയ്ക്കിടെ കോക്പിറ്റിലുണ്ടായ അപ്രതീക്ഷിത ആക്രമണത്തെ ധീരമായി ചെറുത്ത് 174 യാത്രക്കാരുടെ ജീവൻ സുരക്ഷിതമാക്കിയ ഫ്ളൈദുബായ് വിമാനത്തിലെ പൈലറ്റിനും ക്യാബിൻ ക്രൂവിനും യുഎഇയുടെ പരമോന്നത ബഹുമതികളിലൊന്നായ ഫസ്റ്റ് ക്ലാസ് ഓർഡർ ഓഫ് സായിദ് രണ്ടാമൻ പുരസ്കാരം സമ്മാനിച്ചു.
അബുദാബി പ്രസിഡൻഷ്യൽ കൊട്ടാരത്തിൽ നടന്ന പ്രത്യേക ചടങ്ങിൽ യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ വിമാന ജീവനക്കാരെ നേരിട്ട് സ്വീകരിച്ചു. സെപ്റ്റംബർ 30-ന് ദുബായിൽ നിന്ന് തെൽ അവീവിലേക്ക് പറന്ന FZ1073 വിമാനത്തിൽ വെച്ച് ഗുരുതരമായി പരിക്കേറ്റ ക്യാപ്റ്റൻ സ്മിത് മച്ചാർ, കൈയ്യിൽ ബാൻഡേജും തലയിൽ ആഴത്തിലുള്ള മുറിവുകളുമായാണ് ചടങ്ങിനെത്തിയത്. സ്മിത്തിനെ ചേർത്തുപിടിച്ച പ്രസിഡന്റ്, ജീവനക്കാരുടെ ആത്മധൈര്യത്തെയും സമയോചിതമായ ഇടപെടലിനെയും പ്രശംസിച്ചു.
“നിങ്ങളുടെ ജീവിതത്തിൽ എന്തൊക്കെ സംഭവിച്ചാലും യുഎഇ നിങ്ങളുടെ രാജ്യമാണ്. ഇവിടെ നിങ്ങൾക്കൊരു വീടും കുടുംബവുമുണ്ട്,” എന്ന് ശൈഖ് മുഹമ്മദ് ബിൻ സായിദ് ജീവനക്കാരോട് പറഞ്ഞു. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം മുഴുവൻ ക്രൂ അംഗങ്ങളെയും നേരിട്ടെത്തി അഭിനന്ദിച്ചു.
ദുബായ് കിരീടാവകാശിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം മെഡലുകൾ സമ്മാനിച്ചു. എമിറേറ്റ്സ് എയർലൈൻ ആൻഡ് ഗ്രൂപ്പ് ചെയർമാനും ദുബായ് സിവിൽ ഏവിയേഷൻ അതോറിറ്റി പ്രസിഡന്റുമായ ശൈഖ് അഹമ്മദ് ബിൻ സഈദ് അൽ മക്തൂമും മുതിർന്ന ഉദ്യോഗസ്ഥരും ചടങ്ങിൽ സന്നിഹിതരായിരുന്നു.
ദുബായിൽ നിന്ന് 174 യാത്രക്കാരും എട്ട് ജീവനക്കാരുമായി പുറപ്പെട്ട ബോയിംഗ് വിമാനത്തിൽ പാതിവഴിയിലാണ് അക്രമം അരങ്ങേറിയത്. ഫ്ലൈറ്റ് വിവരങ്ങൾ പരിശോധിച്ചുകൊണ്ടിരുന്ന ക്യാപ്റ്റന്റെ തലയ്ക്ക് പിന്നിൽ ഇരുപത്തിയൊൻപതുകാരനായ സഹ പൈലറ്റ് ശക്തമായി പ്രഹരിക്കുകയായിരുന്നു. വിമാനം തകർക്കാൻ ലക്ഷ്യമിട്ടായിരുന്നു ഈ അക്രമമെന്ന് പ്രോസിക്യൂഷൻ അന്വേഷണത്തിൽ വ്യക്തമാക്കിയിട്ടുണ്ട്.
തലയ്ക്ക് സാരമായി പരിക്കേറ്റ് ബോധം നഷ്ടപ്പെടുന്ന സാഹചര്യത്തിലും പതറാതെ നീങ്ങിയ ക്യാപ്റ്റൻ സ്മിത് മച്ചാർ, അകത്തുനിന്ന് പൂട്ടിയിരുന്ന കോക്പിറ്റിന്റെ ഡോർ ലോക്ക് തുറക്കുകയായിരുന്നു. ഇതോടെ സുരക്ഷാ വാതിൽ തുറന്ന് ക്യാബിൻ ക്രൂവും ധീരരായ ചില യാത്രക്കാരും കോക്പിറ്റിലേക്ക് ഇരച്ചുകയറുകയും അക്രമിയെ ബലപ്രയോഗത്തിലൂടെ കീഴ്പ്പെടുത്തുകയും ചെയ്തു.
തുടർന്ന് സൗദി അറേബ്യയിലെ തബൂക്ക് വിമാനത്താവളത്തിലേക്ക് വിമാനം അടിയന്തരമായി തിരിച്ചുവിട്ടു. വിമാനത്തിലുണ്ടായിരുന്ന ദന്തഡോക്ടറായ യാത്രക്കാരനാണ് ചോരയൊലിച്ച ക്യാപ്റ്റന് അടിയന്തര പ്രാഥമിക ചികിത്സ നൽകിയത്. തബൂക്കിലെ പ്രാഥമിക ചികിത്സയ്ക്ക് ശേഷം യുഎഇയിലെത്തിച്ച ക്യാപ്റ്റനെ ആശുപത്രിയിലെത്തി ശൈഖ് ഹംദാൻ നേരത്തെ സന്ദർശിച്ചിരുന്നു.
ക്യാപ്റ്റന്റെയും ജീവനക്കാരുടെയും മനക്കരുത്തിനെ ഇന്ത്യൻ പ്രധാനമന്ത്രി നരേന്ദ്ര മോദിയും വിവിധ അന്താരാഷ്ട്ര നേതാക്കളും പ്രകീർത്തിച്ചിരുന്നു.
