മൂന്ന് റോഡുകളിൽ വേഗപരിധി ഉയർത്തിയപ്പോൾ രണ്ട് പാതകളിൽ കുറച്ചു; റഡാറുകൾ പുനഃക്രമീകരിക്കുമെന്ന് ആർടിഎ.
ദുബായ്, യുഎഇ — ദുബായിലെ അഞ്ച് പ്രധാന റോഡുകളിലെ തെരഞ്ഞെടുത്ത ഭാഗങ്ങളിൽ നവംബർ 1 ഞായറാഴ്ച മുതൽ പുതിയ വേഗപരിധി നിലവിൽ വരും. മാറ്റങ്ങൾക്കനുസൃതമായി വേഗനിരീക്ഷണ ക്യാമറകൾ (റഡാറുകൾ) പുനഃക്രമീകരിക്കുമെന്നും പുതിയ ബോർഡുകൾ സ്ഥാപിക്കുമെന്നും റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) വ്യക്തമാക്കി. ഇരു ദിശകളിലേക്കുമുള്ള ഗതാഗതത്തിന് ഇത് ബാധകമാണ്.
മൂന്ന് റോഡുകളിൽ വേഗപരിധി വർധിപ്പിച്ചപ്പോൾ രണ്ട് റോഡുകളിൽ പരിധി കുറയ്ക്കുകയാണുണ്ടായത്. അൽ അസായൽ സ്ട്രീറ്റിലെ വേഗപരിധി മണിക്കൂറിൽ 60 കിലോമീറ്ററിൽ നിന്ന് 80 കിലോമീറ്ററായി ഉയർത്തി. അൽ മുസ്തഖ്ബൽ സ്ട്രീറ്റ്, ലത്തീഫ ബിൻത് ഹംദാൻ സ്ട്രീറ്റ് എന്നിവിടങ്ങളിൽ 60 കിലോമീറ്ററിൽ നിന്ന് 70 കിലോമീറ്ററായും വേഗത കൂട്ടിയിട്ടുണ്ട്. എന്നാൽ, അൽ റിബാത്ത് സ്ട്രീറ്റിൽ പരമാവധി വേഗം മണിക്കൂറിൽ 100 കിലോമീറ്ററിൽ നിന്ന് 90 കിലോമീറ്ററായും ശൈഖ് സബാഹ് അൽ അഹമ്മദ് അൽ ജാബർ അൽ സബാഹ് സ്ട്രീറ്റിൽ 80 കിലോമീറ്ററിൽ നിന്ന് 70 കിലോമീറ്ററായും കുറച്ചു.
റോഡിൽ പ്രദർശിപ്പിച്ചിട്ടുള്ള വേഗപരിധിയും റഡാറുകൾ നിയമലംഘനം രേഖപ്പെടുത്തുന്ന വേഗപരിധിയും (റഡാർ കൺട്രോൾ സ്പീഡ്) തമ്മിൽ ദുബായ് പോലീസ് വേർതിരിച്ചു കാണുന്നുണ്ട്. പല പ്രധാന റോഡുകളിലും ബോർഡുകളിൽ രേഖപ്പെടുത്തിയതിനേക്കാൾ മണിക്കൂറിൽ 20 കിലോമീറ്റർ വരെ അധിക വേഗതയിലാണ് റഡാർ പരിധി നിശ്ചയിക്കാറുള്ളത്. ഉദാഹരണത്തിന്, 80 കി.മീ വേഗപരിധിയുള്ള റോഡിൽ 101 കി.മീ വേഗതയിലെത്തുമ്പോഴാണ് റഡാർ ഫ്ലാഷ് ആവുക. എന്നാൽ ഈ ഇളവ് വേഗപരിധി മറികടക്കാനുള്ള അനുവാദമല്ലെന്നും യാത്രക്കാർ ബോർഡുകളിലെ നിർദ്ദേശം കർശനമായി പാലിക്കണമെന്നും അധികൃതർ ഓർമ്മിപ്പിച്ചു.
യുഎഇ ട്രാഫിക് നിയമപ്രകാരം വേഗപരിധി ലംഘിക്കുന്നവർക്ക് ചുമത്തുന്ന പിഴകൾ:
- റഡാർ പരിധിയേക്കാൾ 20 കി.മീ വരെ അധിക വേഗത: 300 ദിർഹം.
- 30 കി.മീ വരെ: 600 ദിർഹം.
- 40 കി.മീ വരെ: 700 ദിർഹം.
- 50 കി.മീ വരെ: 1,000 ദിർഹം.
- 60 കി.മീ വരെ: 1,500 ദിർഹം പിഴ, 6 ബ്ലാക്ക് പോയിന്റുകൾ, 15 ദിവസത്തേക്ക് വാഹനം പിടിച്ചെടുക്കൽ.
- 60 കി.മീറ്ററിലധികം: 2,000 ദിർഹം പിഴ, 12 ബ്ലാക്ക് പോയിന്റുകൾ, 30 ദിവസത്തേക്ക് വാഹനം പിടിച്ചെടുക്കൽ.
- 80 കി.മീറ്ററിലധികം: 3,000 ദിർഹം പിഴ, 23 ബ്ലാക്ക് പോയിന്റുകൾ, 60 ദിവസത്തേക്ക് വാഹനം പിടിച്ചെടുക്കൽ.
വേഗപരിധി കുറച്ച അൽ റിബാത്ത് സ്ട്രീറ്റ്, ശൈഖ് സബാഹ് അൽ അഹമ്മദ് അൽ ജാബർ അൽ സബാഹ് സ്ട്രീറ്റ് എന്നിവിടങ്ങളിലൂടെ യാത്ര ചെയ്യുന്നവർ വേഗനിയന്ത്രണങ്ങൾ പ്രത്യേകം ശ്രദ്ധിക്കണമെന്ന് ട്രാഫിക് വിഭാഗം നിർദ്ദേശിച്ചു.
