41 മേഖലകളിലായി 200 നിർമ്മിത ബുദ്ധി ഉൽപ്പന്നങ്ങൾ; ഗതാഗതക്കുരുക്കിൽ 5 ശതമാനം വരെ കുറവും 30 കോടി ദിർഹത്തിന്റെ വാർഷിക നേട്ടവും ലക്ഷ്യം.
ദുബായ്, യുഎഇ — ദുബായിലെ ഗതാഗത, യാത്രാ സൗകര്യങ്ങൾ അത്യാധുനിക സാങ്കേതികവിദ്യകളുടെ സഹായത്തോടെ വിപുലീകരിക്കാൻ ലക്ഷ്യമിട്ട് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ) പുതുക്കിയ നിർമ്മിത ബുദ്ധി (എഐ) നയം പുറത്തിറക്കി. ആർടിഎ ഡയറക്ടർ ജനറലും ബോർഡ് ഓഫ് എക്സിക്യൂട്ടീവ് ഡയറക്ടേഴ്സ് ചെയർമാനുമായ മത്താർ അൽ തായറാണ് പദ്ധതി പ്രഖ്യാപിച്ചത്.
രണ്ടര വർഷത്തെ കാലാവധിക്കുള്ളിൽ നടപ്പാക്കുന്ന ഈ സമഗ്ര പദ്ധതിയിലൂടെ 41 ഭരണ-ഓപ്പറേഷൻ വിഭാഗങ്ങളിലായി 200 എഐ ഉൽപ്പന്നങ്ങൾ അവതരിപ്പിക്കും. അതോറിറ്റിയുടെ പ്രവർത്തനങ്ങളിലും സേവനങ്ങളിലും 50 ശതമാനവും ‘ഏജന്റിക് എഐ’ സംവിധാനത്തിലേക്ക് മാറ്റുകയാണ് പ്രധാന ലക്ഷ്യം. ഇതുവഴി പ്രതിവർഷം 30 കോടിയിലധികം ദിർഹത്തിന്റെ (AED 300 million) അധിക മൂല്യം സൃഷ്ടിക്കപ്പെടുമെന്നും നഗരത്തിലെ ഗതാഗതക്കുരുക്കിൽ 3 മുതൽ 5 ശതമാനം വരെ കുറവുണ്ടാകുമെന്നും അധികൃതർ വ്യക്തമാക്കി.
സ്മാർട്ട് സാങ്കേതികവിദ്യകളുടെ ആഗോള കേന്ദ്രമായി ദുബായിയെ മാറ്റുകയെന്ന ഭരണനേതൃത്വത്തിന്റെ കാഴ്ചപ്പാടാണ് പദ്ധതിക്ക് പിന്നിലെന്ന് മത്താർ അൽ തായർ പറഞ്ഞു. ഡാറ്റ വിശകലനം ചെയ്യാനും തീരുമാനങ്ങളെടുക്കാനും പൂർണ്ണ തോതിലുള്ള സേവനങ്ങൾ നേരിട്ട് നൽകാനും ശേഷിയുള്ള സ്വയംനിയന്ത്രിത സംവിധാനങ്ങളിലേക്കാണ് ആർടിഎ ചുവടുവെക്കുന്നത്. ജനസംഖ്യാ വർധനവും നഗര വികസനവും കണക്കിലെടുത്ത് സുസ്ഥിരമായ ഗതാഗത ശൃംഖല ഉറപ്പാക്കാൻ ഈ നീക്കം സഹായകരമാകും.
ആദ്യ രണ്ട് ഘട്ടങ്ങളിലായി പ്ലാനിങ്, വെഹിക്കിൾ ലൈസൻസിങ്, ട്രാഫിക്, കസ്റ്റമർ ഹാപ്പിനസ്, ബസ് സർവീസ്, റോഡ് അറ്റകുറ്റപ്പണി, ഡ്രൈവർ ലൈസൻസിങ് തുടങ്ങി 11 പ്രധാന മേഖലകളിലാണ് നയം നടപ്പാക്കുന്നത്. കസ്റ്റമർ ഹാപ്പിനസ് കേന്ദ്രങ്ങളിലെ കാത്തിരിപ്പ് സമയം 14 മുതൽ 16 ശതമാനം വരെ കുറയ്ക്കാനും, പരാതികൾ പരിഹരിക്കുന്നതിനുള്ള സമയപരിധിയിൽ 20 മുതൽ 30 ശതമാനം വരെ വേഗത കൊണ്ടുവരാനും പദ്ധതിയിലൂടെ ലക്ഷ്യമിടുന്നു. പുതിയ ഡ്രൈവർമാർ ഉൾപ്പെടുന്ന വാഹനാപകടങ്ങളിൽ 10 മുതൽ 20 ശതമാനം വരെ കുറവുണ്ടാക്കാനും പദ്ധതി ലക്ഷ്യമിടുന്നുണ്ട്.
പദ്ധതിയുടെ പ്രാരംഭ ഘട്ടത്തിൽ വിവിധ വിഭാഗങ്ങളിലായി 180 ഉപയോഗ സാധ്യതകൾ തിരിച്ചറിഞ്ഞതായും 11 എഐ ഉൽപ്പന്നങ്ങളുടെ പ്രവർത്തനം ഇതിനകം വിജയകരമായി പൂർത്തിയാക്കിയതായും കോർപ്പറേറ്റ് ടെക്നോളജി സപ്പോർട്ട് സർവീസസ് സെക്ടർ സിഇഒ അഹമ്മദ് ഹാഷിം ബഹ്‌റോസിയാൻ അറിയിച്ചു. ജീവനക്കാർക്കിടയിൽ മൈക്രോസോഫ്റ്റ് കോപൈലറ്റ് ഉപയോഗം 90 ശതമാനത്തിലധികമായി വർധിച്ചതിലൂടെ ജോലി സമയത്തിൽ 10 ശതമാനം ലാഭിക്കാൻ സാധിച്ചു. മൈക്രോസോഫ്റ്റ്, വാവേ, ബോസ്റ്റൺ കൺസൾട്ടിങ് ഗ്രൂപ്പ് തുടങ്ങിയ അന്താരാഷ്ട്ര സ്ഥാപനങ്ങളുമായി ചേർന്നുള്ള സഹകരണവും പുരോഗമിക്കുകയാണ്.
ഉപഭോക്താക്കൾക്കായി ആർടിഎയുടെ ‘മഹ്ബൂബ്’ സ്മാർട്ട് ചാറ്റ്ബോട്ട് കൂടുതൽ സവിശേഷതകളോടെ നവീകരിച്ചു. വാട്സാപ്പ്, മൊബൈൽ ആപ്പ്, വെബ്സൈറ്റ് എന്നിവ വഴി യുഎഇ പാസും ദുബായ് പേയും സംയോജിപ്പിച്ച് അഞ്ച് മിനിറ്റിനുള്ളിൽ വാഹന ലൈസൻസിങ് സേവനങ്ങൾ പൂർത്തിയാക്കാൻ ഇനി സാധിക്കും. ഇതുകൂടാതെ, വർഷം തോറും 1.3 ലക്ഷം അപേക്ഷകൾ കൈകാര്യം ചെയ്യുന്ന നോ ഒബ്ജക്ഷൻ സർട്ടിഫിക്കറ്റ് (ഇ-എൻഒസി) പരിശോധനകൾ എഐ സഹായത്തോടെ മൂന്നിരട്ടി വേഗത്തിലാക്കും.
പൊതുഗതാഗത മേഖലയിൽ ബസ് സർവീസുകളുടെ കാര്യക്ഷമത വർധിപ്പിക്കാൻ 20 എഐ ഏജന്റുകൾ അടങ്ങിയ ശൃംഖലയും പ്രവർത്തനമാരംഭിച്ചിട്ടുണ്ട്. റൂട്ടുകളിലെ മാറ്റങ്ങൾ നടപ്പിലാക്കാനെടുക്കുന്ന സമയം 60 ദിവസത്തിൽ നിന്ന് 48 ദിവസമായി ചുരുക്കാനും ബസുകളുടെ സമയനിഷ്ഠ 10 ശതമാനം വരെ മെച്ചപ്പെടുത്താനും ഇതുവഴി സാധിക്കും.
