11-നും 17-നും ഇടയിൽ പ്രായമുള്ള കുട്ടികൾക്ക് നിറങ്ങളും രൂപങ്ങളും ഉപയോഗിച്ച് ചിത്രകലയുടെ പുതുവഴികൾ പരിചയപ്പെടുത്തി എസ്.ഐ.ബി.എഫ് 2026
ഷാർജ, യു.എ.ഇ — 45-ാമത് ഷാർജ അന്താരാഷ്ട്ര പുസ്തകമേളയുടെ (എസ്.ഐ.ബി.എഫ് 2026) ഭാഗമായി സംഘടിപ്പിച്ച പാറ്റേൺ പ്രിന്റിങ് ശിൽപശാല കൗമാരക്കാർക്ക് ദൃശ്യകലയുടെ പുതുസാധ്യതകൾ പരിചയപ്പെടുത്തി. മേളയിലെ ക്രിയേറ്റീവ് ഇൻഡസ്ട്രീസ് ഡിസ്ട്രിക്റ്റിൽ നടന്ന പരിശീലന പരിപാടിയിൽ 11-നും 17-നും ഇടയിൽ പ്രായമുള്ള നിരവധി കുട്ടികൾ പങ്കെടുത്തു.
കടലാസ് ക്യാൻവാസുകളായി ഉപയോഗിച്ചാണ് കുട്ടികൾ കലാസൃഷ്ടികൾ ഒരുക്കിയത്. വിവിധ ആകൃതിയിലുള്ള വസ്തുക്കൾ കടലാസിൽ ക്രമീകരിച്ച ശേഷം ബ്രഷുകൾ ഉപയോഗിച്ച് ചായം പൂശിയാണ് വ്യത്യസ്ത രൂപങ്ങളിലുള്ള പ്രിന്റുകൾ തയ്യാറാക്കിയത്. നിശ്ചിത മാതൃകകൾ പിന്തുടരുന്നതിന് പകരം, സ്വന്തം ഭാവനയ്ക്കനുസരിച്ച് നിറങ്ങളും രൂപങ്ങളും സംയോജിപ്പിച്ച് വ്യത്യസ്ത കലാസൃഷ്ടികൾ രൂപപ്പെടുത്താൻ ശിൽപശാല അവസരമൊരുക്കി.
നിറങ്ങളും രൂപങ്ങളും പാറ്റേണുകളും സ്വതന്ത്രമായി പരീക്ഷിക്കാനും, വ്യത്യസ്ത സംയോജനങ്ങളിലൂടെ അപ്രതീക്ഷിതവും മനോഹരവുമായ ഫലങ്ങൾ കണ്ടെത്താനും ശിൽപശാല കുട്ടികളെ പ്രോത്സാഹിപ്പിക്കുന്നുവെന്ന് ശിൽപശാലയ്ക്ക് നേതൃത്വം നൽകിയ സാറ മിഷർ പറഞ്ഞു. കലാസൃഷ്ടികൾക്ക് ഒരൊറ്റ ശരിയായ രീതി മാത്രമല്ല ഉള്ളതെന്നും, ഓരോരുത്തർക്കും അവരവരുടെ ആശയങ്ങളും സാങ്കേതിക വിദ്യകളും പരീക്ഷിച്ച് ഭാവനയെ കടലാസിലേക്ക് പകർത്താൻ കഴിയുമെന്നതാണ് ഈ പ്രവർത്തനത്തിന്റെ പ്രത്യേകതയെന്നും അവർ വ്യക്തമാക്കി.
മേളയിലെ സാഹിത്യ-സാംസ്കാരിക പരിപാടികൾക്ക് പുറമെ വിവിധ കലാരൂപങ്ങൾ കുട്ടികൾക്ക് പരിചയപ്പെടുത്തുന്നതിനായാണ് ക്രിയേറ്റീവ് ഇൻഡസ്ട്രീസ് ഡിസ്ട്രിക്റ്റിന് കീഴിൽ ഇത്തരം ശിൽപശാലകൾ സംഘടിപ്പിക്കുന്നത്. ഷാർജ ബുക്ക് അതോറിറ്റി ‘എ വേൾഡ് ഓഫ് സ്റ്റോറീസ്’ എന്ന പ്രമേയത്തിൽ എക്സ്പോ സെന്റർ ഷാർജയിൽ സംഘടിപ്പിക്കുന്ന 45-ാമത് പുസ്തകമേള നവംബർ 15-ന് സമാപിക്കും.
