നിർമ്മിത ബുദ്ധി ഉപയോഗിച്ച് മൗലികമായ ഡിജിറ്റൽ കഥാപാത്രങ്ങളെ നിർമ്മിക്കുന്നതിന്റെ രീതികൾ സദസ്സിന് മുന്നിൽ തത്സമയം അവതരിപ്പിച്ച് കണ്ടന്റ് ക്രിയേറ്റർ കോസ്മിന പോപ്പ.
ഷാർജ, യുഎഇ — നിർമ്മിത ബുദ്ധി (എഐ) ഉപയോഗിച്ച് മൗലികമായ ഡിജിറ്റൽ കഥാപാത്രങ്ങളെ തുടക്കം മുതൽ സൃഷ്ടിക്കുന്നത് എങ്ങനെയെന്ന് ഷാർജ രാജ്യാന്തര പുസ്തകമേളയിൽ (SIBF 2026) പരിചയപ്പെടുത്തി എഐ കണ്ടന്റ് ക്രിയേറ്ററും അധ്യാപികയുമായ കോസ്മിന പോപ്പ. പുസ്തകമേളയിലെ സോഷ്യൽ മീഡിയ സ്റ്റേഷനിൽ നടന്ന സംവാദാത്മക ശില്പശാലയിലാണ് അവർ പുതിയ കാലത്തെ കഥപറച്ചിൽ രീതികൾ പങ്കുവെച്ചത്.
‘ബ്രിങ് യുവർ ക്യാരക്ടേഴ്സ് ടു ലൈഫ് വിത്ത് എഐ’ എന്ന സെഷനിൽ സദസ്സിന്റെ നിർദ്ദേശങ്ങൾ കൂടി ഉൾപ്പെടുത്തിയാണ് പോപ്പ ഒരു കഥാപാത്രത്തെ രൂപപ്പെടുത്തിയത്. ആശയരൂപീകരണം മുതൽ റഫറൻസ് ചിത്രം തയ്യാറാക്കുന്നതും 30 സെക്കൻഡ് ദൈർഘ്യമുള്ള വീഡിയോ നിർമ്മിക്കുന്നതും വരെയുള്ള ഘട്ടങ്ങൾ അവർ തത്സമയം അവതരിപ്പിച്ചു. സദസ്സ് നിർദ്ദേശിച്ച പശ്ചാത്തലവും രൂപവും സ്വഭാവസവിശേഷതകളും ചേർത്ത് ഒരു ചൈനീസ് യോദ്ധാവായ രാജകുമാരിയുടെ കഥാപാത്രത്തെയാണ് ശില്പശാലയിൽ സൃഷ്ടിച്ചത്.
വെറും പ്രോംപ്റ്റുകൾ നൽകുന്നതിലുപരി മനുഷ്യന്റെ കൃത്യമായ ഇടപെടൽ ഉണ്ടെങ്കിൽ മാത്രമേ മികച്ച എഐ ഉള്ളടക്കങ്ങൾ സൃഷ്ടിക്കാനാകൂ എന്ന് പോപ്പ വ്യക്തമാക്കി. ഒരു റോബോട്ടിനെ നിയന്ത്രിക്കുന്നത് പോലെയാണ് ഈ പ്രക്രിയയെന്നും അതിന് പിന്നിൽ പ്രവർത്തിക്കുന്ന വ്യക്തിയാണ് പ്രധാനമെന്നും അവർ പറഞ്ഞു. തുടർച്ചയായ വീഡിയോകളിൽ ഒരേ കഥാപാത്രത്തെ ഉപയോഗിക്കുമ്പോൾ മുഖഭാവങ്ങളിലും രൂപത്തിലും സ്ഥിരത നിലനിർത്തേണ്ടത് പ്രധാനമാണ്. വസ്ത്രങ്ങളോ ചുറ്റുപാടുകളോ മാറിയാലും കഥാപാത്രത്തെ തിരിച്ചറിയാൻ വ്യക്തമായ ഒരു റഫറൻസ് ചിത്രം സഹായിക്കുമെന്ന് അവർ വിശദീകരിച്ചു.
റൊമാനിയയിൽ ജനിച്ച് ലണ്ടനിൽ താമസിക്കുന്ന പോപ്പ, ജ്വല്ലറി സെയിൽസ് കൺസൾട്ടന്റായി ജോലി ചെയ്യുന്നതിനിടയിലാണ് ഈ വർഷം ആദ്യം എഐ അധിഷ്ഠിത ചരിത്ര ഉള്ളടക്കങ്ങളിലേക്ക് തിരിഞ്ഞത്. ഒക്ടോബറിൽ എലിസബത്ത് ഒന്നാമൻ രാജ്ഞിയുടെ ഡിജിറ്റൽ കഥാപാത്രത്തെ അവതരിപ്പിച്ചുകൊണ്ട് തുടങ്ങിയ സോഷ്യൽ മീഡിയ അക്കൗണ്ടിന്റെ ആദ്യ വീഡിയോയ്ക്ക് ഒരാഴ്ചയ്ക്കുള്ളിൽ 60 ലക്ഷം കാഴ്ചക്കാരെ ലഭിച്ചു. ചുരുങ്ങിയ സമയത്തിനുള്ളിൽ അഞ്ച് ലക്ഷത്തോളം ഫോളോവേഴ്‌സിനെയും ഈ അക്കൗണ്ട് സ്വന്തമാക്കി. ചരിത്രപരമായ അറിവുകൾ ആധുനിക ശൈലിയിൽ അവതരിപ്പിച്ച് ആളുകളെ പഠിപ്പിക്കുകയാണ് തന്റെ ലക്ഷ്യമെന്നും, സമാനമായ രീതിയിൽ മറ്റ് രാജ്യങ്ങളിലെ ക്രിയേറ്റർമാരും ചരിത്ര കഥാപാത്രങ്ങളെ നിർമ്മിക്കുന്നുണ്ടെന്നും അവർ കൂട്ടിച്ചേർത്തു.
ആശയങ്ങളും പ്രോംപ്റ്റുകളും തയ്യാറാക്കാൻ എഐ ടൂളുകൾ സഹായിക്കുമെങ്കിലും നർമ്മവും വ്യക്തിത്വവും സൂക്ഷ്മമായ നിരീക്ഷണങ്ങളും ചേർക്കാൻ മനുഷ്യന്റെ ഇടപെടൽ അനിവാര്യമാണ്. മനുഷ്യസ്പർശമില്ലാത്ത വീഡിയോകൾ വികാരരഹിതമായി തോന്നുമെന്നും കാഴ്ചക്കാർ അവ അവഗണിക്കുമെന്നും പോപ്പ ഓർമ്മിപ്പിച്ചു. സമകാലികരായ സെലിബ്രിറ്റികളെയും പകർപ്പവകാശമുള്ള സാങ്കല്പിക കഥാപാത്രങ്ങളെയും ഉപയോഗിക്കുന്നതിന് എഐ പ്ലാറ്റ്‌ഫോമുകളിൽ നിയന്ത്രണങ്ങളുള്ളതിനാൽ മൗലികമായ കഥാപാത്രങ്ങളെയോ ചരിത്ര വ്യക്തിത്വങ്ങളെയോ തിരഞ്ഞെടുക്കുന്നതാണ് ഉചിതമെന്നും അവർ നിർദ്ദേശിച്ചു.
ഷാർജ ബുക്ക് അതോറിറ്റി സംഘടിപ്പിക്കുന്ന 45-ാമത് ഷാർജ രാജ്യാന്തര പുസ്തകമേള നവംബർ 4 മുതൽ 15 വരെ എക്സ്പോ സെന്റർ ഷാർജയിലാണ് നടക്കുന്നത്. ‘കഥകളാൽ നിർമ്മിതം’ (Made of Stories) എന്ന പ്രമേയത്തിൽ നടക്കുന്ന മേളയിൽ ഒമാനാണ് അതിഥി രാജ്യം. 126 രാജ്യങ്ങളിൽ നിന്നുള്ള 3,212 പ്രസാധകരും പ്രദർശകരും പങ്കെടുക്കുന്ന മേളയിൽ 17 ലക്ഷത്തിലധികം പുസ്തകങ്ങളാണ് പ്രദർശിപ്പിക്കുന്നത്. 25 രാജ്യങ്ങളിൽ നിന്നുള്ള 106 അതിഥികൾ പങ്കെടുക്കുന്ന 1,500-ഓളം സാംസ്കാരിക-കലാ പരിപാടികളും മേളയുടെ ഭാഗമായി നടക്കുന്നുണ്ട്.
