റാസൽഖൈമ: ജസീറ അൽ ഹംറയിലെ വാൾഡോർഫ് അസ്റ്റോറിയ അൾട്രാ ലക്ഷ്വറി റെസിഡൻസിലെ ‘സ്കൈ പാലസ്’ റെക്കോർഡ് വിലയായ 13 കോടി ദിർഹമിന് (35.4 മില്യൺ ഡോളർ) വിറ്റതായി അധികൃതർ അറിയിച്ചു. ഇതോടൊപ്പം 5.5 കോടി ദിർഹം (1.5 കോടി ഡോളർ) വിലയുള്ള സിഗ്നേച്ചർ പെൻതൗസിന്റെ വിൽപ്പനയും പൂർത്തിയായി.ഈ ഇടപാടിലൂടെ റാസൽഖൈമയിലെ ഏറ്റവും ഉയർന്ന മൂല്യമുള്ള ഒറ്റ യൂണിറ്റ് വസതിയായി ‘സ്കൈ പാലസ്’ മാറി. ആഗോള ലൈഫ് സ്റ്റൈൽ–നിക്ഷേപ ലക്ഷ്യസ്ഥാനമെന്ന നിലയിൽ റാസൽഖൈമയുടെ പ്രാധാന്യം കൂടുതൽ ശക്തിപ്പെടുത്തുന്നതാണ് ഈ വിൽപ്പനയെന്ന് അധികൃതർ വ്യക്തമാക്കി.വടക്കൻ എമിറേറ്റിലെ പ്രീമിയം വാട്ടർഫ്രണ്ട് ജീവിതശൈലിയിലേക്കുള്ള വർധിച്ചുവരുന്ന ആവശ്യം ഈ ഇടപാട് വ്യക്തമാക്കുന്നതായി വിൽപ്പന പ്രഖ്യാപിച്ച അൽ ഹംറ ഗ്രൂപ്പ് സി.ഇ.ഒ പറഞ്ഞു. റാസൽഖൈമയുടെ സുസ്ഥിര വളർച്ചയിലേക്കുള്ള നിക്ഷേപകരുടെ വിശ്വാസമാണ് ഈ ചരിത്ര ഇടപാടുകൾ പ്രതിഫലിപ്പിക്കുന്നതെന്നും അദ്ദേഹം കൂട്ടിച്ചേർത്തു.ബീച്ച് ഫ്രണ്ട് വാൾഡോർഫ് അസ്റ്റോറിയ റെസിഡൻസ് ടവറിന്റെ മുകളിലെ നിലകളിലാണ് ‘സ്കൈ പാലസ്’ സ്ഥിതി ചെയ്യുന്നത്. 10,000 ചതുരശ്ര അടി വിസ്തൃതിയിൽ മൂന്ന് നിലകളിലായി രൂപകൽപ്പന ചെയ്ത ഈ അൾട്രാ ലക്ഷ്വറി വസതിയിൽ സ്വകാര്യതയും വിശാലതയും മുൻനിരയിൽ കണക്കിലെടുക്കുന്ന ആധുനിക ഡിസൈനാണ് ഒരുക്കിയിരിക്കുന്നത്.അറേബ്യൻ ഗൾഫ്, വിൻ അൽ മർജാൻ ഐലൻഡ് ഇൻറഗ്രേറ്റഡ് റിസോർട്ട്, സമീപ പർവതനിരകൾ എന്നിവയുടെ മനോഹരമായ കാഴ്ചകൾ സ്കൈ പാലസിൽ നിന്ന് ലഭിക്കും. റെസിഡന്റ് ലോഞ്ച്, ലൈബ്രറി, സിഗാർ ലോഞ്ച്, സ്വകാര്യ സിനിമാ തിയേറ്റർ തുടങ്ങിയ സൗകര്യങ്ങളും ഇവിടെ ഒരുക്കിയിട്ടുണ്ട്. സ്വകാര്യ ഫെറി സർവീസിലൂടെ അൽ മർജാൻ ഐലൻഡിലേക്കുള്ള നേരിട്ടുള്ള പ്രവേശനവും സജ്ജമാണ്.ടവറിനുള്ളിലെ സിഗ്നേച്ചർ പെൻതൗസ് 6,000 ചതുരശ്ര അടി വിസ്തൃതിയുള്ളതാണ്. 360 ഡിഗ്രി പനോരമ കാഴ്ചകൾ ലഭിക്കുന്ന ഈ വസതി, സ്വകാര്യതയും പരിഷ്കൃതമായ അൾട്രാ പ്രീമിയം ജീവിതശൈലിയും മുൻനിർത്തിയുള്ള രൂപകൽപ്പനയോടെയാണ് ഒരുക്കിയിരിക്കുന്നത്.
