ദുബായ്: യുഎഇയിലെ ഇന്ത്യൻ മസാല വിപണിയിൽ ഏറ്റവും കൂടുതൽ വീടുകളിലെത്തുന്ന നമ്പർ വൺ ബ്രാൻഡായി ‘ഈസ്റ്റേൺ’ റിപ്പോർട്ട് ചെയ്യപ്പെട്ടത് മലയാളികൾക്കും പ്രവാസി സമൂഹത്തിനും അഭിമാന നിമിഷമാകുന്നു. വേൾഡ്പാനൽ ബൈ ന്യുമറേറ്റർ നടത്തിയ Household Panel Study (MAT October 2025) പ്രകാരമാണ് ഈ നേട്ടം. പതിറ്റാണ്ടുകളായി വിശ്വാസവും പരിചയവുമാണ് അടിസ്ഥാനം എന്ന ഈ വിഭാഗത്തിൽ, യുഎഇയിലെ അടുക്കളകളിൽ ‘ഈസ്റ്റേൺ’ നേടിയ ആഴത്തിലുള്ള സാന്നിധ്യമാണ് ഈ അംഗീകാരത്തിന് പിന്നിൽ. ജിസിസി മേഖലയിലെ ഓർക്ക്ല ഇന്ത്യയുടെ പ്രധാന ബ്രാൻഡാണ് ‘ഈസ്റ്റേൺ’.
2025 മാർച്ചിൽ അവസാനിച്ച സാമ്പത്തിക വർഷം വരെയുള്ള മൂന്ന് വർഷത്തിനിടെ, ഓർക്ക്ല ഇന്ത്യയുടെ ജിസിസി ബിസിനസ് 14 ശതമാനത്തിലധികം സംയോജിത വാർഷിക വളർച്ച (CAGR) കൈവരിച്ചതായി കമ്പനി വ്യക്തമാക്കി. ഈ വളർച്ച നിലനിർത്തുന്നതിന്, മസാലകളും കൺവീനിയൻസ് ഫുഡ്സും ഉൾപ്പെടുന്ന പോർട്ട്ഫോളിയോ വിപുലീകരിക്കാനും, തുടർച്ചയായ നവീകരണങ്ങൾ നടപ്പാക്കാനും ഓർക്ക്ല ഇന്ത്യ ലക്ഷ്യമിടുന്നു. ഇതിനൊപ്പം, യുഎഇയും ജിസിസി മേഖലയുമാകെ 16,000-ത്തിലധികം ഔട്ട്ലെറ്റുകളിലേക്ക് വിതരണം വ്യാപിപ്പിക്കുന്നതും പദ്ധതിയുടെ ഭാഗമാണ്.
യുഎഇയിലെ വിവിധ പ്രായ-സാംസ്കാരിക പശ്ചാത്തലങ്ങളിലുള്ള ഉപഭോക്തൃ വീടുകളിൽ ‘ഈസ്റ്റേൺ’ ഇന്ന് സാന്നിധ്യമുണ്ട്. ഇന്ത്യൻ മസാല മിശ്രിതങ്ങൾക്കൊപ്പം അറബിക് പാചകത്തിനായി പ്രത്യേകമായി തയ്യാറാക്കിയ അറബിക് മസാല ശ്രേണിയും ബ്രാൻഡിന്റെ പ്രധാന ആകർഷണമാണ്. പ്രാദേശിക രുചിയും ആശയവിനിമയവും മുൻനിർത്തിയുള്ള ഈ അറബിക് വിഭാഗം ശക്തമായ വളർച്ച തുടരുന്നതായും കമ്പനി വ്യക്തമാക്കി.
അതേസമയം, തിരക്കേറിയ ജീവിതശൈലി നയിക്കുന്ന യുവതലമുറയ്ക്ക് കേരളത്തിന്റെ പരമ്പരാഗത രുചികൾ എളുപ്പത്തിൽ ലഭ്യമാക്കുക എന്നതും ‘ഈസ്റ്റേൺ’ മുൻഗണന നൽകുന്ന ദൗത്യമാണ്. ‘5 മിനിറ്റ് ബ്രേക്ക്ഫാസ്റ്റ്’ പോലുള്ള നവീന ഉൽപ്പന്നങ്ങൾ, അതേ വീട്ടറുചി കുറഞ്ഞ സമയത്ത് എത്തിക്കാനുള്ള ശ്രമത്തിന്റെ ഭാഗമാണ്. ഓർക്ക്ല ഇന്ത്യയുടെ Cuisine Centre of Excellence എന്ന ഗവേഷണ കേന്ദ്രത്തിന്റെയും ആധുനിക ഫുഡ് ടെക്നോളജിയുടെയും പിന്തുണയോടെയാണ് ഇത്തരം നവീകരണങ്ങൾ സാധ്യമാകുന്നത്.
ഈ മുന്നേറ്റത്തെക്കുറിച്ച് ഓർക്ക്ല ഇന്ത്യയുടെ ഇന്റർനാഷണൽ ബിസിനസ് സിഇഒ അശ്വിൻ സുബ്രഹ്മണ്യം പറഞ്ഞു: “ഓർക്ക്ല ഇന്ത്യ ഇന്ത്യൻ സ്റ്റോക്ക് എക്സ്ചേഞ്ചുകളിൽ ലിസ്റ്റ് ചെയ്യപ്പെട്ടതോടെ, ഞങ്ങളുടെ അന്താരാഷ്ട്ര ബിസിനസ് പുതിയ വളർച്ചാ ഘട്ടത്തിലേക്ക് കടക്കുകയാണ്. യുഎഇയിലും ജിസിസിയിലും ‘ഈസ്റ്റേൺ’ നേടിയ വിശ്വാസം പതിറ്റാണ്ടുകളുടെ ഫലമാണ്. പ്രാദേശിക ഉപഭോക്താക്കളെ കേന്ദ്രബിന്ദുവാക്കി, വലുപ്പത്തിലും നവീകരണത്തിലും മുന്നേറുക എന്നതാണ് ഞങ്ങളുടെ ലക്ഷ്യം.”
മിഡിൽ ഈസ്റ്റിലെ ബിസിനസ് കൂടുതൽ ശക്തിപ്പെടുത്തുന്നതിന്, പ്രാദേശിക സാന്നിധ്യവും ഉപഭോക്തൃ അവബോധവും ആധാരമാക്കി മുന്നോട്ടുപോകുമെന്ന് ഓർക്ക്ല ഇന്ത്യ വ്യക്തമാക്കുന്നു. യുഎഇ അടുക്കളകളിൽ നേടിയ ഈ ഒന്നാം സ്ഥാന അംഗീകാരം, ഒരു ബ്രാൻഡിന്റെ വിജയം മാത്രമല്ല; പ്രവാസി ജീവിതത്തിൽ രുചിയിലൂടെ ബന്ധങ്ങൾ പാകപ്പെടുന്നുവെന്നതിന്റെ ഓർമ്മപ്പെടുത്തലുമാണ്.
