റാസൽഖൈമ: യുഎഇ ടൂർ 2026 പുരുഷ വിഭാഗത്തിന്റെ മൂന്നാം ഘട്ടത്തിനായി റാസൽഖൈമയിൽ സുരക്ഷാ ഒരുക്കങ്ങൾ പൂർത്തിയായി. 183 കിലോമീറ്റർ ദൈർഘ്യമുള്ള റേസാണ് ബുധനാഴ്ച നടക്കുന്നത്.
പ്രധാന റോഡുകളിലുടനീളം കൂടാതെ നിർദ്ദിഷ്ട കേന്ദ്രങ്ങളിൽ കർശന സുരക്ഷാ സംവിധാനം ഒരുക്കിയതായി ഇവന്റ് കമ്മിറ്റി ചെയർമാനും റാക് പോലീസ് സെൻട്രൽ ഓപ്പറേഷൻസ് ആക്ടിംഗ് ഡയറക്ടറുമായ ബ്രിഗേഡിയർ ജനറൽ ഡോ. യൂസഫ് സാലിം ബിൻ യാഖൂബ് അറിയിച്ചു.
ഉച്ചയ്ക്ക് 1ന് ആരംഭിക്കുന്ന റേസ് വൈകുന്നേരത്തോടെ സമാപിക്കും. സ്റ്റാർട്ട് പോയിന്റ് മുതൽ ഫിനിഷ് ലൈൻ വരെ സുരക്ഷയും ട്രാഫിക് നിയന്ത്രണവും ഉറപ്പാക്കാൻ പ്രത്യേക ട്രാഫിക് പട്രോളുകൾ വിന്യസിക്കും.
പൊതുജനങ്ങൾ റോഡിന്റെ വശങ്ങളിൽ നിന്ന് മാത്രം മത്സരം ആസ്വദിക്കണമെന്നും ഡ്രൈവർമാർ നിർദ്ദേശങ്ങൾ കൃത്യമായി പാലിച്ച് അനുവദിച്ചിരിക്കുന്ന വഴികൾ മാത്രം ഉപയോഗിക്കണമെന്നും അധികൃതർ അറിയിച്ചു. ലോകോത്തര കായികമേളയുടെ വിജയകരമായ നടത്തിപ്പിന് എല്ലാവരും സഹകരിക്കണമെന്ന് അധികൃതർ അഭ്യർത്ഥിച്ചു.
യൂണിയൻ സൈക്ലിസ്റ്റ് ഇന്റർനാഷണലിന്റെ സഹകരണത്തോടെ അബൂദബി സ്പോർട്സ് കൗൺസിലാണ് യുഎഇ ടൂർ സംഘടിപ്പിക്കുന്നത്.
