റാസൽഖൈമ: വിശുദ്ധ റമദാൻ മാസത്തിൽ പൊതുസുരക്ഷ ഉറപ്പാക്കുന്നതിനായി പ്രത്യേക സുരക്ഷാ ക്രമീകരണങ്ങൾ ഏർപ്പെടുത്തി Ras Al Khaimah Police. ആഭ്യന്തര മന്ത്രാലയത്തിന്റെ നിർദ്ദേശപ്രകാരമാണ് നടപടികൾ ശക്തിപ്പെടുത്തിയത്.
ആരാധനാലയങ്ങൾ, വിപണികൾ തുടങ്ങിയ തിരക്കേറിയ മേഖലകളിൽ പ്രത്യേക പട്രോളിംഗ് നടത്തും. ഇഫ്താർ സമയങ്ങളിൽ ഗതാഗത നിയന്ത്രണത്തിന് പ്രത്യേക ഊന്നൽ നൽകുമെന്നും അധികൃതർ അറിയിച്ചു.
ഭിക്ഷാടനംക്കെതിരെ കർശന നടപടി
റമദാൻ കാലത്ത് ഭിക്ഷാടനംക്കെതിരെ കർശന നടപടി സ്വീകരിക്കുമെന്ന് പൊലീസ് മുന്നറിയിപ്പ് നൽകി. സംശയാസ്പദ പ്രവർത്തനങ്ങൾ ശ്രദ്ധയിൽപ്പെട്ടാൽ ഉടൻ അറിയിക്കണമെന്നും അധികൃതർ അഭ്യർത്ഥിച്ചു.
അടിയന്തര സാഹചര്യങ്ങളിൽ 999 നമ്പറിലും അന്വേഷണങ്ങൾക്കും പൊതുവിവരങ്ങൾക്കും 901 നമ്പറിലും 24 മണിക്കൂറും പൊതുജനങ്ങൾക്ക് പൊലീസ് സേവനം ലഭ്യമാണ്.
ബോധവത്കരണവും കായിക പരിപാടികളും
മീഡിയ പബ്ലിക് റിലേഷൻസ് വകുപ്പിന്റെ നേതൃത്വത്തിൽ വിവിധ ബോധവത്കരണ, സാംസ്കാരിക-സുരക്ഷാ പരിപാടികൾ സംഘടിപ്പിക്കും. റമദാൻ കായിക മത്സരങ്ങൾ, ട്രാഫിക് വകുപ്പുമായി ചേർന്ന് ഗതാഗത ബോധവത്കരണ പ്രവർത്തനങ്ങൾ എന്നിവയും നടക്കും.
ഇഫ്താർ സമയത്തെ വേഗത നിയന്ത്രണം നിർബന്ധം
ഇഫ്താർ സമയത്ത് വാഹന വേഗം വർധിപ്പിച്ച് അപകടങ്ങൾ ക്ഷണിച്ച് വരുത്തരുതെന്ന് പൊലീസ് നിർദേശം നൽകി. പടക്കങ്ങൾ പോലുള്ള അപകടകരമായ വസ്തുക്കളുടെ ഉപയോഗത്തിൽ നിന്ന് വിട്ടുനിൽക്കണമെന്നും വിശുദ്ധ മാസത്തിന്റെ ആത്മീയ അന്തരീക്ഷം ശാന്തമായി നിലനിർത്താൻ എല്ലാവരും സഹകരിക്കണമെന്നും അധികൃതർ അഭ്യർത്ഥിച്ചു.
