ദുബായ് — കേരള പത്രപ്രവർത്തക യൂണിയൻ (KUWJ) മിഡിൽ ഈസ്റ്റ് ഘടകത്തിന്റെ പുതിയ ഭാരവാഹികളെ തിരഞ്ഞെടുത്തു. 2026–2028 പ്രവർത്തന കാലയളവിലേക്ക് ജയ്ഹിന്ദ് ടിവിയിലെ എൽവിസ് ചുമ്മാർ പ്രസിഡന്റായും മാതൃഭൂമി ന്യൂസിലെ സുരേഷ് വെള്ളിമുറ്റത്ത് സെക്രട്ടറിയായും പ്രവർത്തിക്കും. മീഡിയവണ്ണിലെ ഷിനോജ് ഷംസുദ്ധീനാണ് പുതിയ ട്രഷറർ.
വരണാധികാരികളായ എൻ.എസ്. നിസാർ (ഗൾഫ് മാധ്യമം), സഹൽ സി. മുഹമ്മദ് (ഏഷ്യാനെറ്റ് ന്യൂസ്) എന്നിവരുടെ മേൽനോട്ടത്തിലാണ് തെരഞ്ഞെടുപ്പ് പൂർത്തിയായത്.
മാതൃഭൂമിയിലെ വനിത വിനോദ്, മലയാള മനോരമ ഓൺലൈനിലെ സാദിഖ് കാവിൽ എന്നിവരെ വൈസ് പ്രസിഡന്റുമാരായും മനോരമ ന്യൂസിലെ പ്രമദ് ബി. കുട്ടിയെ ജോയിന്റ് സെക്രട്ടറിയായും തിരഞ്ഞെടുത്തു.
എൻ.എം. അബൂബക്കർ (മലയാള മനോരമ, അബുദാബി), എൻ.എ.എം. ജാഫർ (ഗൾഫ് ചന്ദ്രിക), അരുൺ രാഘവൻ (എഡിറ്റോറിയൽ), മുബഷീർ (ഏഷ്യാനെറ്റ് ന്യൂസ്), മാനസ മനോജ് (യുഎഇ വാർത്ത) എന്നിവരാണ് പുതിയ എക്സിക്യൂട്ടീവ് കമ്മിറ്റി അംഗങ്ങൾ.
കേരളത്തിലെ മുഴുവൻ ജില്ലകളിലും ഇതര സംസ്ഥാന ഘടകങ്ങളിലും പുതിയ കമ്മിറ്റികൾ നിലവിൽ വന്നതിന് പിന്നാലെയാണ് പ്രവാസ മേഖലയിലെ ഏറ്റവും വലിയ മലയാളി മാധ്യമപ്രവർത്തക കൂട്ടായ്മയായ മിഡിൽ ഈസ്റ്റ് ചാപ്റ്ററിലും പുതിയ നേതൃത്വം ചുമതലയേൽക്കുന്നത്.
