ദുബായ്: സുസ്ഥിരവും സ്മാർട്ടുമായ ഗതാഗത ഭാവി ലക്ഷ്യമിട്ട് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) പ്രഥമ ‘ദുബായ് ഇന്റർനാഷനൽ ഇലക്ട്രിക് വാഹന പ്രദർശനവും സമ്മേളനവും’ സംഘടിപ്പിക്കുന്നു. ‘സ്മാർട്ടും സുസ്ഥിരവുമായ മൊബിലിറ്റി ഭാവി നയിക്കുക’ എന്ന പ്രമേയത്തിൽ നവംബർ 10 മുതൽ 12 വരെ Dubai World Trade Centre വേദിയാകുന്ന പ്രദർശനം ദുബായെ ആഗോള ഇവി ഹബ്ബാക്കി മാറ്റുന്നതിനുള്ള നിർണായക ചുവടുവയ്പ്പായി വിലയിരുത്തപ്പെടുന്നു.
മുന്നൂറിലധികം പ്രാദേശിക-രാജ്യാന്തര കമ്പനികളും സംഘടനകളും തങ്ങളുടെ അത്യാധുനിക സാങ്കേതികവിദ്യകളും കണ്ടെത്തലുകളും അവതരിപ്പിക്കും. വൈദ്യുത വാഹനങ്ങൾ, സ്മാർട്ട് ചാർജിങ് ഇൻഫ്രാസ്ട്രക്ചർ, ബാറ്ററി റീസൈക്ലിങ്, ഹൈഡ്രജൻ ഫ്യൂവൽ സെല്ലുകൾ, സോളാർ എനർജി സംവിധാനങ്ങൾ എന്നിവയുൾപ്പെടെയുള്ള സമഗ്ര ഇക്കോസിസ്റ്റം ഇവിടെ പ്രദർശിപ്പിക്കും.
പതിനായിരത്തിലധികം സന്ദർശകരെയും മുപ്പതോളം ബിസിനസ് പങ്കാളികളെയും പ്രതീക്ഷിക്കുന്ന സംഗമത്തിൽ സുസ്ഥിര ഗതാഗത മേഖലയിലെ ആഗോള വിദഗ്ധർ പങ്കെടുക്കും. ആർടിഎയുടെ ‘സീറോ എമിഷൻ’ ലക്ഷ്യങ്ങളിലേക്കുള്ള പ്രവർത്തനങ്ങൾക്ക് ശക്തി പകരുന്നതായിരിക്കും ഈ വേദി.
ഇലക്ട്രിക് വെർട്ടിക്കൽ ടേക്ക്-ഓഫ് വിമാനങ്ങൾ (eVTOL), ഡ്രോണുകൾ, സ്വയം നിയന്ത്രിത വാഹനങ്ങൾ എന്നിവയുടെ നവീകരണങ്ങളും പ്രദർശനത്തിലെ പ്രധാന ആകർഷണങ്ങളാകും. നിക്ഷേപകർക്കും സ്വകാര്യ സ്ഥാപനങ്ങൾക്കും സഹകരണം ശക്തിപ്പെടുത്താനുള്ള അവസരങ്ങളും ഒരുക്കിയിട്ടുണ്ട്.
പ്രദർശനത്തോടനുബന്ധിച്ച് നടക്കുന്ന കോൺഫറൻസിൽ സാങ്കേതിക ശിൽപശാലകൾ, വിദഗ്ധ ചർച്ചകൾ, പ്രായോഗിക ഡെമോകൾ എന്നിവയും ഉൾപ്പെടും. നവോത്ഥാന ആശയങ്ങളെ പ്രോത്സാഹിപ്പിക്കുന്നതിനായി ഹാക്കത്തണും സംഘടിപ്പിക്കും. രജിസ്ട്രേഷനും കൂടുതൽ വിവരങ്ങൾക്കും www.evworld.ae സന്ദർശിക്കാം.
2050ഓടെ കാർബൺ വിമുക്ത യുഎഇ എന്ന ലക്ഷ്യത്തിലേക്കുള്ള പ്രധാന നാഴികക്കല്ലായി ഈ പ്രദർശനം മാറുമെന്നാണ് അധികൃതരുടെ പ്രതീക്ഷ.
English Short Summary
Dubai’s Roads and Transport Authority (RTA) will host the first Dubai International Electric Vehicle Exhibition and Conference from November 10–12 at Dubai World Trade Centre. The event will showcase global EV innovations, smart mobility solutions, battery recycling, hydrogen fuel cells, and autonomous transport technologies, supporting the UAE’s zero-emission and carbon neutrality goals for 2050.
