ദുബായ്∙ നഗരത്തിലെ വർധിച്ചുവരുന്ന വാഹനത്തിരക്കിനും ഗതാഗതക്കുരുക്കിനും ശാശ്വത പരിഹാരം കാണുന്നതിനായി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) ‘റാപ്പിഡ് ട്രാഫിക് സൊല്യൂഷൻസ്’ പദ്ധതി നടപ്പിലാക്കുന്നു. ആദ്യഘട്ടത്തിൽ എട്ട് പ്രധാന കേന്ദ്രങ്ങളിൽ അടിയന്തര ഗതാഗത പരിഷ്കാരങ്ങൾ ആരംഭിച്ചിരിക്കുകയാണ്. 2026ഓടെ എമിറേറ്റിലുടനീളം 45ലധികം കേന്ദ്രങ്ങളിൽ ഗതാഗത സൗകര്യം മെച്ചപ്പെടുത്തുക എന്നതാണ് ലക്ഷ്യം.
ഷാർജയിൽ നിന്ന് വാദി അൽ അമർദി സ്ട്രീറ്റിലേക്കുള്ള എമിറേറ്റ്സ് റോഡ്, ഷെയ്ഖ് സായിദ് റോഡിൽ നിന്ന് അൽ വസൽ സ്ട്രീറ്റിലേക്കുള്ള ഉമ്മു അമാറ സ്ട്രീറ്റ്, ജബൽ അലി – ലേബാബ് സ്ട്രീറ്റ്, അൽ ജദ്ദാഫ് മെട്രോ സ്റ്റേഷനു സമീപമുള്ള സമാ അൽ ജദ്ദാഫ് – അൽ ജദ്ദാഫ് വാട്ടർഫ്രണ്ട് മേഖല, അൽ ബർഷ വണ്ണിലെ അൽ നയാത്ത് സ്ട്രീറ്റ്, സത്വയിലെ അൽ മക്തൂം സ്കൂൾ പരിസരം, അൽ ഇത്തിഹാദ് സ്ട്രീറ്റും അൽ ഖുദ്സ് സ്ട്രീറ്റും ചേരുന്ന ജങ്ഷൻ, ഗ്രാൻഡ് ഹയാത്തിന് സമീപം ഷെയ്ഖ് റാഷിദ് സ്ട്രീറ്റിൽ നിന്ന് ബർ ദുബായിലേക്കുള്ള ഭാഗം എന്നിവിടങ്ങളിലാണ് ആദ്യഘട്ട പ്രവൃത്തികൾ നടക്കുന്നത്.
ട്രാഫിക് കൺട്രോൾ സെന്ററുകളിൽ നിന്നുള്ള തത്സമയ ഡാറ്റയും ഫീൽഡ് ഇൻസ്പെക്ഷൻ റിപ്പോർട്ടുകളും വിലയിരുത്തിയാണ് പ്രധാന ഗതാഗത കുരുക്കുകൾ തിരിച്ചറിഞ്ഞത്. റമസാനിൽ വാഹനത്തിരക്ക് വർധിക്കാനിടയുള്ള സാഹചര്യത്തിൽ ഈ വേഗപരിഹാരങ്ങൾ പൊതുജനങ്ങൾക്ക് ആശ്വാസമാകും. നഗരവൽക്കരണവും ജനസംഖ്യ വർധനവും പരിഗണിച്ച് ഗതാഗത ശൃംഖല കൂടുതൽ കാര്യക്ഷമമാക്കുകയാണ് ആർടിഎയുടെ ലക്ഷ്യം.
English Summary:
Dubai’s Roads and Transport Authority (RTA) has launched a ‘Rapid Traffic Solutions’ initiative to tackle congestion across the city. Initial upgrades are underway at eight major locations, with plans to improve traffic flow at over 45 centers across the emirate by 2026. The move aims to ensure smoother mobility amid growing urban expansion and increasing vehicle density.
