ദുബായ് : സാമൂഹിക ഐക്യം ശക്തിപ്പെടുത്താനുള്ള ശ്രമങ്ങളുടെ ഭാഗമായി, ദുബൈ കമ്മ്യൂണിറ്റി ഡെവലപ്‌മെന്റ് അതോറിറ്റി (സി.ഡി.എ) ഈദ് അൽ അദ്ഹ വേളയിൽ അനാഥർ ഉൾപ്പെടെ സി.ഡി.എ സേവനങ്ങളിൽ നിന്ന് പ്രയോജനം നേടുന്ന കുടുംബങ്ങളിലെ 10,000 കുട്ടികൾക്ക് ഈദിയ (ഈദ് സമ്മാനത്തുക) വിതരണം ചെയ്തു.ഈദിയ’ സംരംഭത്തിന് കീഴിലും എൻഡോവ്‌മെന്റ്‌സ് ആൻഡ് മൈനേഴ്‌സ് ട്രസ്റ്റ് ഫൗണ്ടേഷനു(ഔഖാഫ് ദുബൈ)മായി സഹകരിച്ചും സംഘടിപ്പിച്ച ഈ വിതരണം, സാമൂഹിക ബന്ധങ്ങൾ ശക്തിപ്പെടുത്താനും ഐക്യദാർഢ്യവും സാംസ്കാരിക മൂല്യങ്ങളും മെച്ചപ്പെടുത്താനുമുള്ള പങ്കിട്ട പ്രതിബദ്ധതയെ പ്രതിഫലിപ്പിക്കുന്നു. ഈ സംരംഭം ‘യു.എ.ഇ സമൂഹ വർഷം 2025’ന്റെ ലക്ഷ്യങ്ങളുമായി യോജിക്കുന്നു.വികസനത്തിന്റെ ഹൃദയ ഭാഗത്ത് ആളുകളെ പ്രതിഷ്ഠിക്കുക എന്ന ഭരണ നേതൃത്വത്തിന്റെ ദർശനത്തെ ഈ സംരംഭം പ്രതിഫലിപ്പിക്കുന്നുവെന്ന് സി.ഡി.എ ഡയരക്ടർ ജനറൽ ഹിസ്സാ ബിൻത് ഈസ ബൂ ഹുമൈദ് പറഞ്ഞു. സാമൂഹിക വികസന പങ്കാളികൾക്കിടയിലെ ഫലപ്രദമായ സഹകരണത്തിന്റെ തെളിവായും അവർ ഈ സംരംഭത്തെ എടുത്തു കാട്ടി.
ഉദാരമതിത്വവും സമൂഹ പരിചരണവും പ്രോത്സാഹിപ്പിക്കുന്ന സംരംഭങ്ങളെ പിന്തുണയ്ക്കുന്നതിൽ ഔഖാഫ് ദുബൈയുടെ പ്രധാന പങ്കിനെ അവർ പ്രശംസിച്ചു.“ഈദിയ വെറും സാമ്പത്തിക സഹായം മാത്രമല്ല; ഈ അനുഗൃഹീത ദിവസങ്ങളിൽ കുട്ടികൾക്ക് സന്തോഷം നൽകാനും അവരെ വിലമതിക്കുകയും പരിപാലിക്കുകയും ചെയ്യുന്നതായി അനുഭവിപ്പിക്കാനും ഉദ്ദേശിച്ചുള്ള ഹൃദയംഗമമായ സന്ദേശമാണിത്” -അവർ പറഞ്ഞു.ഈദിയ നമ്മുടെ സംസ്കാരത്തിലെ പ്രിയപ്പെട്ട പാരമ്പര്യമാണ്. അത് കുട്ടികൾക്ക് നൽകുന്ന സന്തോഷം ശരിക്കും വിലമതിക്കാനാവാത്തതാണ് -അവർ കൂട്ടിച്ചേർത്തു.
കുടുംബങ്ങളുടെ ആവശ്യങ്ങൾ നിറവേറ്റുന്നതിനും ശക്തവും സുസ്ഥിരവുമായ സമൂഹ സംവിധാനം കെട്ടിപ്പടുക്കാൻ സഹായിക്കുന്നതുമായ സംരംഭങ്ങൾ ആരംഭിക്കാനുള്ള സി.ഡി.എയുടെ നിരന്തര പ്രതിബദ്ധതയും ഹിസ്സാ ബിൻത് ആവർത്തിച്ചു.സമൂഹത്തിലെ ഓരോ വ്യക്തിയുടെയും മൂല്യം ഉയർത്തിക്കാട്ടുന്നതിന് മതപരവും ദേശീയവും സാമൂഹികവുമായ അവസരങ്ങൾ പരമാവധി പ്രയോജനപ്പെടുത്തുക എന്നതാണ് ലക്ഷ്യം എന്നും അവർ വിശദീകരിച്ചു.
