ബംഗളൂരു: സഹപാഠികളുടെ മാനസിക പീഡനത്തെ തുടർന്ന് കർണാടകയിൽ മെഡിക്കൽ വിദ്യാർത്ഥിനി ആത്മഹത്യ ചെയ്ത സംഭവം ഞെട്ടൽ സൃഷ്ടിച്ചു. മല്ലാദിഹള്ളിയിലെ രാഘവേന്ദ്ര ആയുർവേദിക് കോളേജിലെ അവസാന വർഷ ബി.എ.എം.എസ് വിദ്യാർത്ഥിനിയായ നിഖിത (22)യെ വീട്ടിൽ മരിച്ച നിലയിലാണ് കണ്ടെത്തിയത്.
സംഭവത്തിന് പിന്നാലെ പുറത്ത് വന്ന വിവരങ്ങൾ പ്രകാരം, കോളേജിൽ നടന്ന പ്രചാരണങ്ങളാണ് വിദ്യാർത്ഥിനിയെ മാനസികമായി തളർത്തിയത്. ലക്ചററുമായുള്ള ബന്ധത്തെക്കുറിച്ച് സഹപാഠികൾ തെറ്റായ വാർത്തകൾ പ്രചരിപ്പിച്ചതാണ് പ്രശ്നങ്ങൾക്ക് കാരണമായതെന്ന് കുടുംബം ആരോപിക്കുന്നു.
ഇത്തരം ആരോപണങ്ങളും നിരന്തര പരിഹാസവും നിഖിതയെ ഗുരുതരമായ മാനസിക സമ്മർദത്തിലാക്കി. മാതാപിതാക്കൾ ഇത് അവഗണിക്കാൻ ഉപദേശിച്ചിരുന്നുവെങ്കിലും സഹപാഠികളുടെ പീഡനം തുടരുകയായിരുന്നുവെന്നാണ് വിവരം.
ഒടുവിൽ ഈ സമ്മർദം സഹിക്കാനാകാതെ വിദ്യാർത്ഥിനി ആത്മഹത്യ ചെയ്തതായാണ് പ്രാഥമിക നിഗമനം. സംഭവസ്ഥലത്ത് നിന്ന് ആത്മഹത്യക്കുറിപ്പും പോലീസ് കണ്ടെത്തിയിട്ടുണ്ട്.
ഇതിനിടെ, മകളുടെ മരണത്തിന് ഉത്തരവാദികളായ സഹപാഠികളുടെ വിവരങ്ങൾ പിതാവ് പോലീസിന് കൈമാറിയിട്ടുണ്ട്. കുറ്റക്കാർക്കെതിരെ കർശന നടപടി സ്വീകരിക്കണമെന്നാവശ്യപ്പെട്ട് പരാതി നൽകിയിട്ടുണ്ട്.
സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. കോളേജ് പരിസരത്തും വിദ്യാർത്ഥികൾക്കിടയിലും ഉണ്ടായ സാഹചര്യങ്ങൾ വിശദമായി പരിശോധിക്കുമെന്ന് അധികൃതർ അറിയിച്ചു.
ഈ സംഭവം വീണ്ടും വിദ്യാഭ്യാസ സ്ഥാപനങ്ങളിലെ മാനസിക പീഡനവും ബുള്ളിയിംഗും സംബന്ധിച്ച ആശങ്കകൾ ഉയർത്തുകയാണ്.
