ന്യൂഡൽഹി: പശ്ചിമേഷ്യയിലെ സംഘർഷാവസ്ഥക്കിടെ ഹുർമുസ് കടലിടുക്കിനെ ചുറ്റിപ്പറ്റിയ ആശങ്കകൾ തുടരുന്നതിനിടെ ഇന്ത്യക്ക് ആശ്വാസവാർത്തയായി വീണ്ടും ഇറാൻ രംഗത്ത്. ഇന്ത്യൻ കപ്പലുകളും പൗരന്മാരും സുരക്ഷിതരാണെന്ന് ഇന്ത്യയിലെ ഇറാൻ എംബസി അറിയിച്ചു.
വ്യാഴാഴ്ച സാമൂഹ്യമാധ്യമമായ എക്സ് പ്ലാറ്റ്ഫോമിലൂടെയാണ് ഇറാൻ ഈ ഉറപ്പ് ആവർത്തിച്ചത്. “ഞങ്ങളുടെ ഇന്ത്യൻ സുഹൃത്തുക്കൾ സുരക്ഷിതരാണ്, ആശങ്കപ്പെടേണ്ട” എന്ന സന്ദേശമാണ് എംബസി പങ്കുവെച്ചത്.
ലോകത്തിലെ ഊർജ വിതരണത്തിന്റെ വലിയൊരു പങ്ക് കടന്നുപോകുന്ന ഹുർമുസ് കടലിടുക്ക് നിലവിൽ തന്ത്രപ്രധാന മേഖലയാണ്. സംഘർഷം രൂക്ഷമായ സാഹചര്യത്തിൽ ഇറാൻ ഇവിടെ കർശന നിയന്ത്രണങ്ങൾ ഏർപ്പെടുത്തിയിരുന്നു.
എന്നാൽ, ഇന്ത്യ ഉൾപ്പെടെയുള്ള സൗഹൃദ രാജ്യങ്ങളുടെ കപ്പലുകൾക്ക് കടന്നുപോകാൻ പ്രത്യേക അനുമതി നൽകിയിട്ടുണ്ടെന്ന് ഇറാൻ മുമ്പ് വ്യക്തമാക്കിയിരുന്നു. ഇപ്പോഴത്തെ ഉറപ്പ് ഈ നിലപാട് വീണ്ടും ആവർത്തിക്കുന്നതാണ്.
അതേസമയം, പ്രായോഗികമായി ചില വെല്ലുവിളികൾ തുടരുകയാണ്. ഇന്ത്യയിലേക്കുള്ള ഊർജ ചരക്കുകളുമായി വന്ന നിരവധി കപ്പലുകൾ ഇപ്പോഴും ഹുർമുസ് മേഖലയിൽ കുടുങ്ങിയിരിക്കുകയാണ്.
കേന്ദ്ര സർക്കാരിന്റെ വിവരങ്ങൾ പ്രകാരം, എൽ.പി.ജി, ക്രൂഡ് ഓയിൽ, എൽ.എൻ.ജി എന്നിവയുമായി ബന്ധപ്പെട്ട ഏകദേശം 10 വിദേശ കപ്പലുകൾ നിലവിൽ തടസ്സപ്പെട്ട നിലയിലാണ്. ഇതിന് പുറമെ ഇന്ത്യൻ പതാകയിലുള്ള ചില കപ്പലുകളും പ്രദേശത്ത് തുടരുന്നുണ്ട്.
ഇതിനിടെ, ഇറാന്റെ സഹായത്തോടെ ചില കപ്പലുകൾ സുരക്ഷിതമായി കടന്നുപോയതും ആശ്വാസകരമായ വാർത്തയായി വിലയിരുത്തപ്പെടുന്നു. ഏകദേശം 94,000 ടൺ എൽ.പി.ജി കൊണ്ടുപോയ കപ്പലുകൾ ഉൾപ്പെടെ എട്ട് കപ്പലുകൾ ഇതിനകം കടന്നതായി റിപ്പോർട്ടുണ്ട്.
എന്നിരുന്നാലും, ആകെ 500ഓളം കപ്പലുകൾ ഇപ്പോഴും ഈ കടലിടുക്കിൽ കുടുങ്ങിയിരിക്കുകയാണ്. ഇതോടെ ആഗോള ഊർജ വിതരണ ശൃംഖലയിലും സമ്മർദം തുടരുന്നു.
ഈ സാഹചര്യത്തിൽ, ഇന്ത്യയുടെ വിദേശകാര്യ മന്ത്രാലയവും ഷിപ്പിങ് മന്ത്രാലയവും സ്ഥിതിഗതികൾ നിരന്തരം നിരീക്ഷിച്ച് ആവശ്യമായ നടപടികൾ സ്വീകരിക്കുന്നുണ്ടെന്ന് അധികൃതർ അറിയിച്ചു.
ഇതോടെ, ഇറാന്റെ ഉറപ്പുകൾ ആശ്വാസം നൽകുന്നുണ്ടെങ്കിലും ഹുർമുസ് പ്രതിസന്ധി ഇന്ത്യയുടെ ഊർജ സുരക്ഷയിൽ ഇപ്പോഴും നിർണായക ഘടകമായി തുടരുകയാണ്.
