‘സ്പേസ് ഇന്ത്യ’യുടെ SALF 2026 യുവ അംബാസഡറായി പത്തു വയസ്സുകാരൻ ‘ആസ്ട്രോ സഈം’
മഞ്ചേശ്വരം:
സോഷ്യൽ മീഡിയയിലൂടെ ബഹിരാകാശ ശാസ്ത്രം ലളിതമായി അവതരിപ്പിച്ച് ശ്രദ്ധേയനായ കാസർകോട്ടുകാരൻ പത്തു വയസ്സുകാരൻ സഈം കുബണൂറിന് ദേശീയ അംഗീകാരം. ഇന്ത്യയിലെ പ്രമുഖ ബഹിരാകാശ വിദ്യാഭ്യാസ സ്ഥാപനമായ ‘സ്പേസ് ഇന്ത്യ’ (SPACE India) സംഘടിപ്പിക്കുന്ന നാഷണൽ സ്പേസ് ആർട്ട് ആൻഡ് ലിറ്ററേച്ചർ ഫെസ്റ്റിവൽ (SALF 2026) യുവ അംബാസഡറായി സഈമിനെ തിരഞ്ഞെടുത്തു.
നാസയുടെ ‘ആർട്ടെമിസ് 2’ ചന്ദ്രയാത്രയെ ആസ്പദമാക്കി സഈം മുഹമ്മദ് തന്റെ ഇൻസ്റ്റാഗ്രാം പേജായ ‘AstroZaeem’ വഴി പങ്കുവെച്ച വീഡിയോ പരമ്പര വൈറലായതാണ് ഈ നേട്ടത്തിന് വഴിതെളിച്ചത്. ദശലക്ഷക്കണക്കിന് ആളുകൾ ഇതിനകം ഈ വീഡിയോകൾ കണ്ടുകഴിഞ്ഞു. ബഹിരാകാശ ശാസ്ത്രത്തിലെ സങ്കീർണ്ണമായ ആശയങ്ങൾ കുട്ടികൾക്കും മുതിർന്നവർക്കും ഒരുപോലെ മനസ്സിലാകുന്ന രീതിയിൽ അവതരിപ്പിക്കുന്ന കഴിവാണ് സഈമിനെ വേറിട്ടതാക്കുന്നത്.
സഈമിന്റെ ഈ കഴിവിനെ ‘സ്പേസ് ഇന്ത്യ’ പ്രത്യേകമായി അഭിനന്ദിക്കുകയും, രാജ്യത്തെ വിദ്യാർത്ഥികളിൽ ശാസ്ത്രബോധം വളർത്തുന്നതിനുള്ള തങ്ങളുടെ ദേശീയ പരിപാടിയിൽ അദ്ദേഹത്തെ പ്രതിനിധിയായി തിരഞ്ഞെടുക്കുകയും ചെയ്തു. ഐ.എസ്.ആർ.ഒയുടെ ഔദ്യോഗിക ‘സ്പേസ് ട്യൂട്ടർ’ പദവിയുള്ള സ്ഥാപനമായ സ്പേസ് ഇന്ത്യയുടെ ഈ അംഗീകാരം ഒരു മലയാളി ബാലന് ലഭിക്കുന്നത് ശ്രദ്ധേയമാണ്.
ദുബൈ കെ.എം.സി.സി കാസർഗോഡ് ജില്ലാ സെക്രട്ടറി സുബൈർ കുബണൂറിന്റെയും ഫാത്തിമത് റുബീനയുടെയും മകനാണ് സഈം. ‘ആസ്ട്രോ സഈം’ എന്ന സോഷ്യൽ മീഡിയ ഹാൻഡിലിലൂടെ ബഹിരാകാശത്തെക്കുറിച്ചുള്ള പുതിയ അറിവുകളും വിശേഷങ്ങളും പങ്കുവെക്കുന്ന ഈ കൊച്ചു മിടുക്കൻ ഇതിനകം തന്നെ നിരവധി ആരാധകരെ സ്വന്തമാക്കിയിട്ടുണ്ട്.
