മനുഷ്യത്വം മരിച്ചിട്ടില്ലാത്ത ദുബായുടെ നേർക്കാഴ്ചയായി നയീം അബ്ബാസ് മുഹമ്മദ് എന്ന ആർടിഎ ബസ് ഡ്രൈവർ.
ദുബായ്: അംബരചുംബികളായ കെട്ടിടങ്ങൾക്കും കണ്ണഞ്ചിപ്പിക്കുന്ന സാമ്പത്തിക വളർച്ചയ്ക്കും അപ്പുറം, കരുണയുടെയും കരുതലിന്റെയും വലിയൊരു ലോകമാണ് ദുബായെന്ന് ഒരിക്കൽ കൂടി തെളിയിക്കപ്പെട്ടിരിക്കുന്നു. തിരക്കേറിയ റോഡിന് നടുവിൽ പകച്ചുനിന്ന അന്ധനായ കാൽനടയാത്രക്കാരനെ സുരക്ഷിതമായി ലക്ഷ്യസ്ഥാനത്തെത്തിച്ച ദുബായ് റോഡ് ട്രാൻസ്പോർട്ട് അതോറിറ്റി (ആർടിഎ) ബസ് ഡ്രൈവർ നയീം അബ്ബാസ് മുഹമ്മദിനെ തേടിയിപ്പോൾ അഭിനന്ദന പ്രവാഹമാണ്.
ബസ് നിർത്തിയിറങ്ങി, കൈപിടിച്ച് റോഡ് മുറിച്ചുകടത്തി
ദുബായ് നഗരത്തിലെ വാഹനത്തിരക്കുള്ള ഒരു പാതയിലായിരുന്നു സംഭവം. കാഴ്ചയില്ലാത്ത വ്യക്തി റോഡ് മുറിച്ചുകടക്കാൻ പ്രയാസപ്പെടുന്നത് ശ്രദ്ധയിൽപ്പെട്ട നയീം, ഉടൻ തന്നെ ബസ് സുരക്ഷിതമായി നിർത്തി പുറത്തിറങ്ങുകയായിരുന്നു. തുടർന്ന് ആ വ്യക്തിയുടെ കൈപിടിച്ച് വാഹനങ്ങൾക്കിടയിലൂടെ സാവധാനം നടന്ന് റോഡിന്റെ മറുവശത്തെത്തിച്ചു. താൻ ചെയ്തത് വലിയൊരു കാര്യമാണെന്ന ഭാവമേതുമില്ലാതെ തിരികെ ബസിലേക്ക് കയറി യാത്ര തുടർന്ന നയീമിന്റെ ദൃശ്യങ്ങൾ ആർടിഎ തന്നെയാണ് സോഷ്യൽ മീഡിയയിലൂടെ പങ്കുവെച്ചത്.
അധികൃതരുടെ ആദരം
നയീം അബ്ബാസ് മുഹമ്മദിന്റെ മാതൃകാപരമായ ഈ പ്രവർത്തനത്തെ ആർടിഎ ഡയറക്ടർ ജനറൽ മത്തർ അൽ തായർ നേരിട്ട് പ്രശംസിച്ചു. ആർടിഎ ആസ്ഥാനത്ത് നടന്ന പ്രത്യേക ചടങ്ങിൽ അദ്ദേഹത്തിന് പ്രശസ്തിപത്രം കൈമാറി. “മറ്റുള്ളവരെ സഹായിക്കുക എന്നത് എന്റെ ശീലമാണ്, അത് ദുബായുടെ സംസ്കാരം കൂടിയാണ്”– പുരസ്കാരം ഏറ്റുവാങ്ങിയ ശേഷം നയീം വിനയാന്വിതനായി പറഞ്ഞു.
ദുബായുടെ ആത്മാവ് അവിടുത്തെ ജനങ്ങളിലാണെന്ന ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെ വാക്കുകളെ അന്വർത്ഥമാക്കുന്നതാണ് ഈ സംഭവമെന്ന് ആർടിഎ കുറിച്ചു.
തൊഴിലാളികളെ ചേർത്തുപിടിക്കുന്ന ദുബായ്
സാധാരണക്കാരായ തൊഴിലാളികളുടെ നന്മകളെ എക്കാലവും ദുബായ് ഭരണകൂടം ആദരിക്കാറുണ്ട്. 2025-ൽ മാത്രം മികച്ച സേവനം കാഴ്ചവെച്ച രണ്ടായിരത്തിലേറെ ഡ്രൈവർമാരെ ‘റോഡ് അംബാസഡർ’ പദ്ധതിയിലൂടെ ആർടിഎ ആദരിച്ചിരുന്നു. നിയമങ്ങൾ പാലിക്കുന്നതിനൊപ്പം സഹജീവികളോട് കാരുണ്യം കാണിക്കുന്ന ഇത്തരം വ്യക്തിത്വങ്ങൾ പ്രവാസി സമൂഹത്തിന് വലിയ പ്രചോദനമാണ്.
