മലപ്പുറം: സംസ്ഥാന നിയമസഭാ തെരഞ്ഞെടുപ്പിൽ മുസ്ലിം ലീഗ് നേടിയ വൻവിജയം ചരിത്രപരമാണെന്ന് പാർട്ടിയുടെ ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി പറഞ്ഞു. തവനൂരിൽ നേടിയ വിജയം മതേതര മൂല്യങ്ങളുടെ വിജയമാണെന്നും അത് ലീഗിന്റെ “മതേതര തൊപ്പിയിലെ പൊൻതൂവൽ” ആണെന്നും അദ്ദേഹം വിശേഷിപ്പിച്ചു.
വർഗീയ പ്രചാരണങ്ങൾ ശക്തമായി ഉയരുന്ന രാഷ്ട്രീയ സാഹചര്യത്തിൽ തവനൂരിലെ ഫലം വലിയ സന്ദേശമാണ് നൽകുന്നതെന്ന് കുഞ്ഞാലിക്കുട്ടി ചൂണ്ടിക്കാട്ടി. കോൺഗ്രസും ലീഗും ഉൾപ്പെടുന്ന യു.ഡി.എഫ് സഖ്യം ചേർന്നാലോചിച്ച് മുന്നോട്ട് പോകുമെന്നും യാതൊരു പ്രശ്നങ്ങളും ഉണ്ടാകില്ലെന്നും അദ്ദേഹം വ്യക്തമാക്കി. “മുസ്ലിം ലീഗ് എന്നും ചരിത്രം സൃഷ്ടിക്കുന്ന പാർട്ടിയാണ്” എന്ന ആത്മവിശ്വാസവും അദ്ദേഹം പ്രകടിപ്പിച്ചു.
യു.ഡി.എഫ് വിജയത്തെക്കുറിച്ച് പ്രതികരിച്ച സാദിഖലി ശിഹാബ് തങ്ങൾ ഇത് ശക്തമായ ടീംവർക്കിന്റെ ഫലമാണെന്ന് പറഞ്ഞു. കാത്തിരുന്ന വിജയമാണ് ഇതെന്നും നൂറിലധികം സീറ്റുകളിൽ മുന്നേറ്റം നേടിയതായും അദ്ദേഹം കൂട്ടിച്ചേർത്തു.
ഇതേസമയം, എം.കെ മുനീര് എൽ.ഡി.എഫ് സർക്കാരിന്റെ ധാർഷ്ട്യത്തിന് ജനങ്ങൾ നൽകിയ മറുപടിയാണ് ഈ ഫലമെന്ന് അഭിപ്രായപ്പെട്ടു. ഉപമുഖ്യമന്ത്രി സ്ഥാനം പോലുള്ള വിഷയങ്ങൾ ഇപ്പോൾ ചർച്ച ചെയ്യേണ്ട സാഹചര്യമല്ലെന്നും വൻവിജയം സമ്മാനിച്ച ജനങ്ങൾക്ക് നന്ദി അറിയിക്കുന്നതിലാണ് മുൻഗണനയെന്നും അദ്ദേഹം പറഞ്ഞു.
യു.ഡി.എഫ് വിജയത്തെക്കുറിച്ച് പ്രതികരിച്ച ശശി തരൂർ ഇത് ജനങ്ങളുടെ വ്യക്തമായ സന്ദേശമാണെന്നും ഭരണവിരുദ്ധ വികാരവും മാറ്റത്തിനുള്ള ആഗ്രഹവുമാണ് ഫലത്തിൽ പ്രതിഫലിച്ചതെന്നും പറഞ്ഞു. “ജനങ്ങൾക്ക് മുന്നിൽ അവതരിപ്പിച്ച പുതിയ ആശയങ്ങൾക്കാണ് പിന്തുണ ലഭിച്ചത്” എന്നും അദ്ദേഹം കൂട്ടിച്ചേർത്തു.
അതേസമയം കോഴിക്കോട് ജില്ലയിലെ രാഷ്ട്രീയ ചിത്രം സംബന്ധിച്ച് കെ. പ്രവീൺ കുമാർ ആത്മവിശ്വാസം പ്രകടിപ്പിച്ചു. ജില്ലയിലെ മുഴുവൻ സീറ്റുകളും യു.ഡി.എഫ് നേടുമെന്ന പ്രതീക്ഷയുണ്ടെന്നും നിരവധി മണ്ഡലങ്ങളിൽ വലിയ ഭൂരിപക്ഷം ലഭിക്കുമെന്നും അദ്ദേഹം പറഞ്ഞു. ചില പ്രധാന നേതാക്കൾ പോലും പരാജയപ്പെടുമെന്ന് പ്രവചിച്ച അദ്ദേഹം ജില്ലയിലെ രാഷ്ട്രീയത്തിൽ വലിയ മാറ്റം സംഭവിക്കുമെന്ന് സൂചിപ്പിച്ചു.
സംസ്ഥാനത്താകെ പ്രകടമായ യു.ഡി.എഫ് തരംഗം മുസ്ലിം ലീഗിനും വലിയ കരുത്ത് നൽകിയിരിക്കുകയാണ്. പ്രത്യേകിച്ച് മലപ്പുറം ഉൾപ്പെടെയുള്ള ശക്തികേന്ദ്രങ്ങളിൽ നേടിയ വിജയം മുന്നണിയുടെ ആത്മവിശ്വാസം ഇരട്ടിയാക്കിയിരിക്കുകയാണ്.
