പണം തനിയെ ഈടാക്കും, പാർക്കിങ്ങും സ്മാർട്ട്; അബുദാബിയിൽ എഐ അധിഷ്ഠിത പാർക്കിങ് സംവിധാനം നിലവിൽ വന്നു

ദർബ് ആപ്പിലെ ഇ-വോലറ്റുമായി ബന്ധിപ്പിച്ച് പ്രവർത്തിക്കുന്ന നൂതന സംവിധാനം ക്യു മൊബിലിറ്റിയാണ് പുറത്തിറക്കിയത്

അബുദാബി: എമിറേറ്റിലെ പാർക്കിങ് സംവിധാനം കൂടുതൽ ലളിതവും സുഗമവുമാക്കാൻ ലക്ഷ്യമിട്ട് നിർമ്മിത ബുദ്ധി (AI) അടിസ്ഥാനമാക്കിയുള്ള പുതിയ സ്മാർട്ട് പാർക്കിങ് സേവനത്തിന് അബുദാബിയിൽ തുടക്കമായി. പ്രമുഖ സാങ്കേതികവിദ്യാ ദാതാക്കളായ ‘ക്യു മൊബിലിറ്റിയാണ്’ ‘ഫ്രീ ഫ്ലോ പെയ്ഡ് പാർക്കിങ് സിസ്റ്റം’ എന്ന ഈ നൂതന സംവിധാനം പുറത്തിറക്കിയത്. ഉപഭോക്താക്കളുടെ ദർബ് (Darb) ആപ്പിലെ ഇ-വോലറ്റുമായി ബന്ധിപ്പിച്ചാണ് പാർക്കിങ് ഫീസ് ഈടാക്കുക.

നിർമിതബുദ്ധിയും ഓട്ടോമാറ്റിക് ലൈസൻസ് പ്ലേറ്റ് തിരിച്ചറിയൽ സാങ്കേതികവിദ്യയും ഉപയോഗിച്ചാണ് ഇത് പ്രവർത്തിക്കുന്നത്. വാഹനം പാർക്കിങ് ഏരിയയിലേക്ക് പ്രവേശിക്കുമ്പോഴും പുറത്തേക്കെടുക്കുമ്പോഴും സമയം രേഖപ്പെടുത്തി കൃത്യമായ തുക ദർബ് വോലറ്റിൽ നിന്ന് തനിയെ ഈടാക്കും. ഇതിലൂടെ ടിക്കറ്റുകൾ എടുക്കാനോ പേയ്‌മെന്റ് മെഷീനുകൾക്ക് മുന്നിൽ കാത്തുനിൽക്കാനോ ഉള്ള ബുദ്ധിമുട്ട് ഒഴിവാകും.

ആദ്യ ഘട്ടത്തിൽ അബുദാബിയിലെ തിരഞ്ഞെടുത്ത മൾട്ടി-സ്റ്റോറി പാർക്കിങ് കേന്ദ്രങ്ങളിലും ചില സ്വകാര്യ പാർക്കിങ് ഏരിയകളിലുമാണ് ഈ സേവനം ലഭ്യമാകുക. വരും ദിവസങ്ങളിൽ എമിറേറ്റിലുടനീളമുള്ള കൂടുതൽ സ്ഥലങ്ങളിലേക്ക് ഈ സംവിധാനം വ്യാപിപ്പിക്കും. പരമ്പരാഗത പാർക്കിങ് രീതികൾ വരുത്തുന്ന സമയനഷ്ടം ഒഴിവാക്കാനും ക്യാഷ്‌ലെസ്സ് ഇടപാടുകൾ പ്രോത്സാഹിപ്പിക്കാനും പുതിയ എഐ സംവിധാനം സഹായിക്കുമെന്ന് അധികൃതർ വ്യക്തമാക്കി.