അന്ന് പങ്കുവെച്ച സ്വപ്നം ഇന്ന് യാഥാർത്ഥ്യത്തിലേക്ക്; ബുർജീലിന്റെ തുടക്കകാലത്തെ കൂടിക്കാഴ്ച അനുസ്മരിച്ച് മെഡിക്കൽ സിറ്റിയുടെ ഭാവി വികസനരേഖ പ്രസിഡന്റിന് മുന്നിൽ അവതരിപ്പിച്ച് ഡോ. ഷംഷീർ.
അബുദാബി: യുഎഇയുടെ ആരോഗ്യപരിരക്ഷാ രംഗത്ത് വൻ മുന്നേറ്റം ലക്ഷ്യമിടുന്ന ബുർജീൽ മെഡിക്കൽ സിറ്റിയുടെ രണ്ടാം ഘട്ട വികസന പദ്ധതികൾ യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന് മുന്നിൽ വിശദീകരിച്ച് ബുർജീൽ ഹോൾഡിങ്സ് ചെയർമാനും സിഇഒയുമായ ഡോ. ഷംഷീർ വയലിൽ. അബുദാബിയിൽ നടന്ന ‘മേക്ക് ഇറ്റ് ഇൻ ദി എമിറേറ്റ്സ് 2026’ ഫോറത്തിന്റെ ഭാഗമായുള്ള ബുർജീൽ ഹോൾഡിങ്സ് പവിലിയൻ സന്ദർശിച്ച പ്രസിഡന്റിനെ ഡോ. ഷംഷീർ സ്വീകരിച്ചു. മെഡിക്കൽ വിദ്യാഭ്യാസം, ഗവേഷണം എന്നീ രംഗങ്ങളിൽ വൻ നിക്ഷേപം ലക്ഷ്യമിടുന്ന വിപുലീകരണ പദ്ധതി ഡോ. ഷംഷീർ വിശദീകരിച്ചു.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം, ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം എന്നിവരും പവിലിയൻ സന്ദർശിച്ച് പദ്ധതികൾ വിലയിരുത്തി. ഐഎച്ച്സി (IHC) മാനേജിങ് ഡയറക്ടറും സിഇഒയുമായ സയിദ് ബസർ ഷുഐബും സന്നിഹിതനായിരുന്നു.
ഹൃദ്യമായ കൂടിക്കാഴ്ച; പഴയ ഓർമ്മകളിൽ പുതിയ വികസനം
ബുർജീൽ മെഡിക്കൽ സിറ്റിയുടെ വികസനരേഖ അവതരിപ്പിക്കുന്ന വേളയിൽ പഴയൊരു കൂടിക്കാഴ്ചയുടെ ഹൃദ്യമായ ഓർമ്മകൾ ഡോ. ഷംഷീർ പങ്കുവെച്ചു. മെഡിക്കൽ സിറ്റി എന്ന ആശയം ആദ്യഘട്ടത്തിലായിരുന്ന കാലത്ത് ശൈഖ് മുഹമ്മദ് ബിൻ സായിദ് അൽ നഹ്യാനെ കണ്ട് പദ്ധതികൾ വിശദീകരിച്ചത് അദ്ദേഹം അനുസ്മരിച്ചു. അന്ന് കണ്ട വലിയ സ്വപ്നത്തിന്റെ തുടർച്ചയാണ് വരാനിരിക്കുന്ന വിപുലീകരണമെന്ന് അദ്ദേഹം പറഞ്ഞു. 3,87,000 ചതുരശ്ര മീറ്ററിലായി വ്യാപിച്ചുകിടക്കുന്ന പുതിയ വികസനത്തിലൂടെ അബുദാബി മുഹമ്മദ് ബിൻ സായിദ് സിറ്റിയെ ലോകോത്തര ചികിത്സാ കേന്ദ്രമാക്കി മാറ്റുകയാണ് ലക്ഷ്യം.
കാന്സർ ചികിത്സ, മെഡിക്കൽ ഗവേഷണം, വിദ്യാഭ്യാസം എന്നിവ ഏകോപിപ്പിച്ചുകൊണ്ടുള്ള അതിനൂതന സൗകര്യങ്ങളാണ് ബുർജീൽ മെഡിക്കൽ സിറ്റിയുടെ അടുത്ത ഘട്ടത്തിൽ വിഭാവനം ചെയ്തിരിക്കുന്നത്. സങ്കീർണ്ണമായ ചികിത്സാ സൗകര്യങ്ങൾക്കായി വിദേശ രാജ്യങ്ങളെ ആശ്രയിക്കാതെ തന്നെ മികച്ച പരിചരണം സ്വദേശികൾക്കും പ്രവാസികൾക്കും ഇവിടെ ലഭ്യമാകും.
നിക്ഷേപങ്ങളിൽ വൻ കുതിപ്പ്
വിപിഎസ് ഹെൽത്ത്കെയറിന് കീഴിലുള്ള ലൈഫ് ഫാർമയുടെ വിപുലീകരണത്തിനായി കിസാദിൽ 700 മില്യൺ ദിർഹത്തിന്റെ നിക്ഷേപം ഗ്രൂപ്പ് പ്രഖ്യാപിച്ചു. കൂടാതെ, അപൂർവ രക്തരോഗങ്ങൾക്കുള്ള അത്യാധുനിക ജനിതക ചികിത്സാരംഗത്ത് 100 മില്യൺ ദിർഹത്തിന്റെ പുതിയ പദ്ധതിക്കും തുടക്കമിട്ടു. ഈ ചികിത്സാരീതികൾ യുഎഇയിൽ തന്നെ വികസിപ്പിക്കാനും നിർമ്മിക്കാനും സാധിക്കുന്ന പ്ലാറ്റ്ഫോമിനാണ് ഗ്രൂപ്പ് രൂപം നൽകുന്നത്. യുഎഇയെ ആഗോള ആരോഗ്യ ഇന്നൊവേഷൻ കേന്ദ്രമാക്കി മാറ്റാനുള്ള ദേശീയ ലക്ഷ്യത്തിന് കരുത്തുപകരുന്നതാണ് ഈ ചുവടുവെപ്പുകളെന്ന് ഗ്രൂപ്പ് വ്യക്തമാക്കി.
