ദുബായിൽ ഒക്ടോബർ ഒന്നു മുതൽ ട്രക്കുകൾക്ക് നിയന്ത്രണം; തിരക്കേറിയ റോഡുകളിൽ നിർദ്ദിഷ്ട സമയങ്ങളിൽ പ്രവേശന വിലക്ക്

എമിറേറ്റ്സ് റോഡിന് ഇളവ്; ശൈഖ് സായിദ് റോഡിൽ 16 മണിക്കൂർ നിയന്ത്രണം, തന്ത്രപ്രധാന പാതകളിൽ 24 മണിക്കൂറും വിലക്ക്

ദുബായ്, സെപ്റ്റംബർ 27, 2026 : നഗരത്തിലെ ഗതാഗതക്കുരുക്ക് കുറയ്ക്കുന്നതിനും സുരക്ഷിതയാത്ര ഉറപ്പാക്കുന്നതിനുമായി ഒക്ടോബർ 1 മുതൽ ദുബായിലെ വിവിധ റോഡുകളിൽ ഹെവി ട്രക്കുകൾക്ക് കർശന നിയന്ത്രണം ഏർപ്പെടുത്തുന്നു. ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയും (ആർ.ടി.എ) ദുബായ് പോലീസും സംയുക്തമായാണ് പുതിയ സമയക്രമം പ്രഖ്യാപിച്ചത്.

ഭരമേറ്റിയുള്ള ചരക്കുനീക്കത്തിന് തടസ്സമുണ്ടാകാതിരിക്കാൻ എമിറേറ്റ്സ് റോഡിനെ (E611) പൂർണമായും ഈ നിയന്ത്രണങ്ങളിൽ നിന്ന് ഒഴിവാക്കിയിട്ടുണ്ട്. എന്നാൽ മറ്റു പ്രധാന പാതകളിൽ ഗതാഗതസാന്ദ്രത അനുസരിച്ച് നിർദ്ദിഷ്ട സമയങ്ങളിലാണ് ചരക്കുവാഹനങ്ങൾക്ക് വിലക്കേർപ്പെടുത്തിയിട്ടുള്ളത്.

അൽ ഖുദ്ര സ്ട്രീറ്റ്, അൽ മെയ്ദാൻ സ്ട്രീറ്റ്, ദുബായ് എയർപോർട്ട് ടണൽ, ക്രീക്കിലെ മുഴുവൻ പാലങ്ങൾ എന്നിവയിലൂടെയുള്ള ട്രക്ക് യാത്രകൾക്ക് മുഴുവൻ സമയവും (24 മണിക്കൂർ) വിലക്കുണ്ട്. ഈ റൂട്ടുകളിലൂടെ ഒരു സമയത്തും ചരക്കുവാഹനങ്ങൾ കടത്തിവിടില്ല.

ശൈഖ് സായിദ് റോഡ്, ബെയ്റൂട്ട് സ്ട്രീറ്റ് എന്നീ പ്രധാന റോഡുകളിലും അൽ മിസ്ഹർ, മുഹൈസിന, ഔദ് അൽ മുതീന തുടങ്ങിയ ജനവാസ മേഖലകളിലും രാവിലെ 6:00 മുതൽ രാത്രി 10:00 വരെ 16 മണിക്കൂർ ട്രക്കുകൾക്ക് പ്രവേശനമുണ്ടാകില്ല.

നഗരത്തിലെ മറ്റു പ്രധാന വഴികളായ എയർപോർട്ട് സ്ട്രീറ്റ്, ഒമാൻ സ്ട്രീറ്റ്, ദമാസ്കസ് സ്ട്രീറ്റ് എന്നിവിടങ്ങളിൽ ദിവസേന മൂന്ന് പീക്ക് അവർ സമയങ്ങളിലാണ് നിയന്ത്രണം:

• രാവിലെ: 6:30 മുതൽ 8:30 വരെ
• ഉച്ചയ്ക്ക്: 1:00 മുതൽ 3:00 വരെ
• വൈകിട്ട്: 5:30 മുതൽ 8:00 വരെ

നിയന്ത്രണ സമയങ്ങളിൽ പ്രധാന റോഡുകളുടെ വശങ്ങളിലോ പാർപ്പിട മേഖലകളിലോ നിയമവിരുദ്ധമായി ട്രക്കുകൾ പാർക്ക് ചെയ്യുന്നത് ശ്രദ്ധയിൽപ്പെട്ടാൽ കർശന നടപടിയുണ്ടാകുമെന്ന് പോലീസ് വ്യക്തമാക്കി. ഡ്രൈവർമാർക്കായി ആർ.ടി.എ ബോധവൽക്കരണ പരിപാടികളും ആരംഭിച്ചിട്ടുണ്ട്.

യാത്രാനിയന്ത്രണമുള്ള സമയങ്ങളിൽ ഡ്രൈവർമാർക്ക് കാത്തിരിക്കാനായി ഹൈവേകൾക്ക് സമീപം അത്യാധുനിക സൗകര്യങ്ങളോടെയുള്ള റസ്റ്റ് സ്റ്റോപ്പുകൾ ക്രമീകരിച്ചിട്ടുണ്ട്. ആറ് പ്രധാന കേന്ദ്രങ്ങളിലായി നിർമ്മിക്കുന്ന 16 റസ്റ്റ് സ്റ്റോപ്പുകളിൽ 14 എണ്ണവും പൂർത്തിയായി. ഇതിലൂടെ നിലവിൽ 1,007 വലിയ ട്രക്കുകൾക്ക് ഒരേസമയം സുരക്ഷിതമായി പാർക്ക് ചെയ്യാനാകും. താമസസ്ഥലം, പ്രാർത്ഥനാ മുറികൾ, റെസ്റ്റോറന്റുകൾ, പെട്രോൾ പമ്പുകൾ എന്നിവയടക്കം വിപുലമായ സൗകര്യങ്ങളാണ് ഈ വിശ്രമകേന്ദ്രങ്ങളിൽ ഏർപ്പെടുത്തിയിട്ടുള്ളത്.

പ്രതിദിനം നാല് ലക്ഷത്തോളം ട്രക്ക് സർവീസുകളാണ് ദുബായിലൂടെ കടന്നുപോകുന്നത്. നിയന്ത്രണ സമയങ്ങളിൽ അടിയന്തരമായി സർവീസ് നടത്തേണ്ട വാണിജ്യ സ്ഥാപനങ്ങൾ ആർ.ടി.എയുടെ ഔദ്യോഗിക വെബ്‌സൈറ്റ് വഴി മുൻകൂട്ടി പ്രത്യേക അനുമതി പത്രം (മൊബിലിറ്റി പെർമിറ്റ്) കരസ്ഥമാക്കണമെന്ന് അധികൃതർ നിർദ്ദേശിച്ചു.