ന്യൂഡൽഹി: ലോക്സഭയിലും സംസ്ഥാന നിയമസഭകളിലും സ്ത്രീകൾക്ക് 33 ശതമാനം സംവരണം ഉറപ്പാക്കുന്ന വനിതാ സംവരണ ഭേദഗതി ബിൽ പാസാക്കുന്നതിനായി വിളിച്ചുകൂട്ടിയ പ്രത്യേക പാർലമെന്റ് സമ്മേളനത്തിൽ നിർബന്ധമായും പങ്കെടുക്കണമെന്ന് ആവശ്യപ്പെട്ട് കോൺഗ്രസ് പാർട്ടി എംപിമാർക്ക് മൂന്നുവരി വിപ് നൽകി.
ഏപ്രിൽ 16 മുതൽ 18 വരെ നടക്കുന്ന സമ്മേളനത്തിൽ എംപിമാർ ലോക്സഭയിൽ ഹാജരായി പാർട്ടിയുടെ നിലപാട് പിന്തുണയ്ക്കണമെന്ന് വിപിൽ വ്യക്തമാക്കുന്നു. ഈ ദിവസങ്ങളിൽ നിർണായകമായ ചർച്ചകളും വോട്ടെടുപ്പും നടക്കുന്നതിനാൽ എല്ലാ അംഗങ്ങളും രാവിലെ 11 മുതൽ സഭയിൽ സന്നിഹിതരാകണം എന്നും നിർദ്ദേശമുണ്ട്.
വനിതാ സംവരണ ബിൽ ഉൾപ്പെടെയുള്ള പ്രധാന നിയമനിർമാണ വിഷയങ്ങളാണ് ഈ പ്രത്യേക സമ്മേളനത്തിൽ പരിഗണിക്കുക. പാർട്ടിയുടെ ഔദ്യോഗിക നിലപാടിനെ പിന്തുണച്ച് വോട്ടെടുപ്പിൽ പങ്കെടുക്കുന്നത് അതീവ പ്രധാനമാണെന്ന് കോൺഗ്രസ് നേതൃത്വവും വ്യക്തമാക്കി.
