ദുബായ്: ദുബായിലെ യാത്രക്കാരുടെ ഇമിഗ്രേഷൻ നടപടികൾ അഞ്ചു സെക്കൻഡിനകം പൂർത്തിയാക്കുന്ന ‘റെഡ് കാർപറ്റ്’ പദ്ധതിക്ക് ലഭിച്ച ദുബായ്–ഇറ്റ് പുരസ്‌കാരത്തിന്റെ അഭിമാനത്തിൽ ജിഡിആർഎഫ്എ ദുബായ്. വിമാനത്താവളത്തിലെ കാത്തിരിപ്പ് കുറച്ച് യാത്ര കൂടുതൽ സുഗമമാക്കിയ പദ്ധതിയുടെ വിജയം, അതിനു പിന്നിൽ പ്രവർത്തിച്ച ഉദ്യോഗസ്ഥർക്കൊപ്പം നേതൃത്വം ആഘോഷിച്ചു. ജിഡിആർഎഫ്എ ആസ്ഥാനത്ത് ഉന്നത ഉദ്യോഗസ്ഥരും ടീം അംഗങ്ങളും ചേർന്ന് കേക്ക് മുറിച്ച് സന്തോഷം പങ്കിട്ടു.
യാത്രാരേഖകൾ കാണിക്കാനോ പരിശോധനയ്ക്കായി നിൽക്കാനോ ആവശ്യമില്ലാതെ, ഒന്നിലധികം യാത്രക്കാരുടെ ഇമിഗ്രേഷൻ നടപടികൾ ഒരേസമയം നടന്നുനീങ്ങുന്നതിനിടെ പൂർത്തിയാക്കുന്ന ലോകത്തിലെ ആദ്യ സംവിധാനമാണ് ദുബായ് രാജ്യാന്തര വിമാനത്താവളത്തിലെ ‘റെഡ് കാർപറ്റ്’ കോറിഡോർ. വിമാനത്താവളങ്ങളിലെ യാത്രാനടപടികൾക്ക് പുതിയ മാതൃകയൊരുക്കിയ സംവിധാനത്തിന്റെ വിജയത്തിനു പിന്നിലെ കൂട്ടായ പരിശ്രമത്തിനുള്ള അഭിനന്ദനവേദിയായി ആഘോഷം.
ജിഡിആർഎഫ്എ ദുബായ് ഡയറക്ടർ ജനറൽ ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറി, മേജർ ജനറൽ ഉബൈദ് മുഹൈർ ബിൻ സുറൂർ, ദുബായ് വിമാനത്താവളങ്ങളിലെ ഇമിഗ്രേഷൻ കാര്യവിഭാഗം അസിസ്റ്റന്റ് ഡയറക്ടർ ജനറൽ മേജർ ജനറൽ തലാൽ അഹ്മദ് അൽ ശൻഖീതി ഉൾപ്പെടെയുള്ള ഉന്നത ഉദ്യോഗസ്ഥർ പങ്കെടുത്തു.
ആഘോഷത്തിനിടെ, റെഡ് കാർപറ്റ് പദ്ധതി യാഥാർഥ്യമാക്കാനും വിജയകരമായി പ്രവർത്തിപ്പിക്കാനും സംഭാവന നൽകിയ ടീം അംഗങ്ങളെ അൽ മർറി പ്രത്യേകം അഭിനന്ദിച്ചു. ദുബായുടെ ദീർഘവീക്ഷണത്തിന്റെയും യാത്രക്കാർക്ക് മികച്ച സേവനം നൽകാനുള്ള നിരന്തര പരിശ്രമത്തിന്റെയും തെളിവാണ് ഈ വിജയമെന്ന് അദ്ദേഹം പറഞ്ഞു. പദ്ധതിയുമായി സഹകരിച്ച ദുബായ് എയർപോർട്ട് അധികൃതർക്കും നന്ദിയും അഭിനന്ദനവും അറിയിച്ചു.
സർക്കാർ പദ്ധതികളുടെ വിഭാഗത്തിലാണ് ‘റെഡ് കാർപറ്റ് ട്രാവൽ കോറിഡോറിന്’ ദുബായ്–ഇറ്റ് പുരസ്‌കാരം ലഭിച്ചത്. ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധമന്ത്രിയും ദുബായ് എക്‌സിക്യൂട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമാണ് കഴിഞ്ഞ ദിവസം പുരസ്‌കാരം പ്രഖ്യാപിച്ചത്. പദ്ധതിയുടെ പിന്നണിയിൽ പ്രവർത്തിച്ച സംഘത്തെയും അദ്ദേഹം അഭിനന്ദിച്ചിരുന്നു.
വിമാനത്താവളത്തിൽ ലാഭിക്കാനാകുന്ന ഓരോ നിമിഷത്തിനും യാത്രക്കാരുടെ ജീവിതത്തിൽ വിലയുണ്ട്. നീണ്ട യാത്രയ്ക്കുശേഷം വിശ്രമത്തിലേക്ക് എത്തേണ്ടവരും കുടുംബത്തിനരികിലേക്ക് മടങ്ങുന്നവരും പ്രിയപ്പെട്ടവരെ കാണാൻ കാത്തിരിക്കുന്നവരുമെല്ലാം അവരിലുണ്ട്. പരിശോധനകൾ എളുപ്പത്തിലും വേഗത്തിലും പൂർത്തിയാകുമ്പോൾ ലഭിക്കുന്ന ആശ്വാസമാണ് റെഡ് കാർപറ്റ് പോലുള്ള സേവനങ്ങളെ ജനങ്ങളോട് കൂടുതൽ അടുപ്പിക്കുന്നത്.
നിർമിതബുദ്ധിയും ബയോമെട്രിക് തിരിച്ചറിയൽ സാങ്കേതികവിദ്യയും ഉപയോഗിച്ച് യാത്രക്കാരെ തിരിച്ചറിഞ്ഞാണ് സംവിധാനത്തിൽ ഇമിഗ്രേഷൻ നടപടികൾ സ്വയമേവ പൂർത്തിയാക്കുന്നത്. കോറിഡോറിലൂടെ നടന്നുനീങ്ങുന്നതിനിടെ പരിശോധനകൾ പൂർത്തിയാകുന്നതിനാൽ യാത്രക്കാർക്ക് തടസ്സമില്ലാതെ മുന്നോട്ടുപോകാനാകും.
പരമ്പരാഗത പരിശോധനാപാതയിൽ ഒരേസമയം ഒരാളുടെ നടപടികൾ നടത്തുമ്പോൾ, റെഡ് കാർപറ്റ് കോറിഡോറിൽ പത്തുപേരുടെ നടപടികൾ ഒരേസമയം പൂർത്തിയാക്കാനാകും. യാത്രക്കാരെ കൈകാര്യം ചെയ്യാനുള്ള ശേഷി പത്തിരട്ടിയായി വർധിപ്പിച്ച സംവിധാനത്തിൽ യാത്രക്കാരുടെ സംതൃപ്തി നിരക്ക് 99 ശതമാനത്തിലേറെയാണ്. അഞ്ചു സെക്കൻഡിൽ താഴെയുള്ള നടപടിസമയവും ഉയർന്ന പ്രവർത്തനക്ഷമതയുമാണ് പദ്ധതിയുടെ പ്രധാന നേട്ടങ്ങൾ.
ജനങ്ങളുടെ ജീവിതം എളുപ്പമാക്കാനും പ്രതീക്ഷകൾക്കപ്പുറമുള്ള സേവനാനുഭവങ്ങൾ നൽകാനുമാണ് ദുബായ് സാങ്കേതികവിദ്യ പ്രയോജനപ്പെടുത്തേണ്ടതെന്ന് പുരസ്‌കാരം പ്രഖ്യാപിച്ചുകൊണ്ട് ശൈഖ് ഹംദാൻ വ്യക്തമാക്കിയിരുന്നു.
ആ കാഴ്ചപ്പാടിനെ യാത്രക്കാർക്ക് നേരിട്ട് അനുഭവിക്കാവുന്ന സേവനമാക്കി മാറ്റിയവരാണ് ആഘോഷവേളയിൽ ഒരുമിച്ചുനിന്നത്. ഏതാനും നിമിഷങ്ങൾക്കുള്ളിൽ പൂർത്തിയാകുന്ന ഓരോ യാത്രാനടപടിക്കും പിന്നിലുള്ള അവരുടെ പരിശ്രമത്തെ നേതൃത്വം അഭിനന്ദിച്ചു. പുരസ്‌കാരത്തിന്റെ അഭിമാനത്തിനൊപ്പം, ജനങ്ങളുടെ യാത്ര എളുപ്പമാക്കാനായതിന്റെ സന്തോഷവും ജിഡിആർഎഫ്എ ആസ്ഥാനത്ത് പങ്കുവെക്കപ്പെട്ടു.
