ആഗോള ജലനയതന്ത്രത്തിൽ യുവാക്കൾക്ക് പങ്കാളിത്തം; ‘ഗ്ലോബൽ യൂത്ത് വാട്ടർ എൻവോയ്സ്’ പദ്ധതിക്ക് യുഎന്നിൽ തുടക്കമായി

അബുദാബിയിൽ നടക്കുന്ന ഐക്യരാഷ്ട്രസഭ ജല ഉച്ചകോടിയുടെ മുന്നോടിയായി 100 യുവ പ്രതിനിധികളെ തിരഞ്ഞെടുക്കുന്നു; അപേക്ഷകൾ ക്ഷണിച്ചു.

ന്യൂയോർക്ക് — ജൂലൈ 14, 2026 — ആഗോള ജലനയ രൂപീകരണത്തിൽ യുവതലമുറയുടെ പങ്കാളിത്തം ഉറപ്പാക്കുന്നതിനുള്ള ‘ഗ്ലോബൽ യൂത്ത് വാട്ടർ എൻവോയ്സ് പ്രോഗ്രാം’ ന്യൂയോർക്കിൽ നടന്ന ഐക്യരാഷ്ട്രസഭയുടെ ഹൈ-ലെവൽ പൊളിറ്റിക്കൽ ഫോറത്തിൽ (HLPF) പ്രഖ്യാപിച്ചു. യുഎഇ വിദേശകാര്യ മന്ത്രാലയത്തിന്റെ തന്ത്രപരമായ പങ്കാളിത്തത്തോടെ അറബ് യൂത്ത് സെന്ററാണ് (AYC) ഈ പദ്ധതിക്ക് തുടക്കം കുറിച്ചത്. 2026 ഡിസംബർ 8 മുതൽ 10 വരെ അബുദാബിയിൽ നടക്കുന്ന യുഎൻ ജല ഉച്ചകോടിക്ക് മുന്നോടിയായാണ് ഈ ആഗോള പരിശീലന പരിപാടി സംഘടിപ്പിച്ചിരിക്കുന്നത്. ചിൽഡ്രൻസ് ഇൻവെസ്റ്റ്‌മെന്റ് ഫണ്ട് ഫൗണ്ടേഷന്റെ (CIFF) പിന്തുണയോടെ നടപ്പിലാക്കുന്ന ഈ പ്രോഗ്രാമിലേക്ക് 18-35 പ്രായപരിധിയിലുള്ളവരിൽ നിന്ന് അപേക്ഷകൾ ക്ഷണിച്ചു.

ശുദ്ധജലവും ശുചിത്വവും ഉറപ്പാക്കുന്നതിനുള്ള ഐക്യരാഷ്ട്രസഭയുടെ സുസ്ഥിര വികസന ലക്ഷ്യം 6 (SDG 6) മുൻനിർത്തിയാണ് ഈ പദ്ധതി ആവിഷ്കരിച്ചിരിക്കുന്നത്. ആഫ്രിക്ക, അറബ് രാജ്യങ്ങൾ, ഏഷ്യ-പസഫിക് തുടങ്ങിയ ജലക്ഷാമം നേരിടുന്ന പ്രദേശങ്ങൾക്ക് മുൻഗണന നൽകിക്കൊണ്ട് ലോകത്തിന്റെ ആറ് വിവിധ മേഖലകളിൽ നിന്നായി 100 യുവ പ്രതിനിധികളെയാണ് ഈ പ്രോഗ്രാമിലേക്ക് തിരഞ്ഞെടുക്കുന്നത്.

തിരഞ്ഞെടുക്കപ്പെടുന്ന പ്രതിനിധികൾക്ക് 2026 സെപ്റ്റംബർ മുതൽ നവംബർ വരെ വിദൂരവിദ്യാഭ്യാസ രീതിയിൽ (Remote Capacity-Building) പ്രത്യേക പരിശീലനം നൽകും. ജല ഭരണനിർവഹണം, നയരൂപീകരണം, വിവിധ രാജ്യങ്ങളുടെ ഔദ്യോഗിക പ്രതിനിധികളുമായുള്ള ആശയവിനിമയം എന്നിവയിലാണ് പരിശീലനം നൽകുക. തുടർന്ന് അബുദാബിയിൽ നടക്കുന്ന അന്താരാഷ്ട്ര ജല ഉച്ചകോടിയുടെ ഔദ്യോഗിക സംവാദങ്ങളിൽ പങ്കെടുക്കാൻ ഇവർക്ക് അവസരം ലഭിക്കും.

യുനെസ്കോ (UNESCO), ഗ്രീൻ ആഫ്രിക്ക യൂത്ത് ഓർഗനൈസേഷൻ (GAYO), വാട്ടർ എയ്ഡ് തുടങ്ങിയ പ്രമുഖ അന്താരാഷ്ട്ര സംഘടനകളുടെ പങ്കാളിത്തത്തോടെയാണ് ഈ പ്രോഗ്രാം നടപ്പിലാക്കുന്നത്.

യുവതലമുറയെ ശാക്തീകരിക്കുന്നത് സുസ്ഥിരമായ ഭാവിയിലേക്കുള്ള നിക്ഷേപമാണെന്ന് അറബ് യൂത്ത് സെന്റർ വൈസ് ചെയർമാനും യുഎഇ യുവജനക്ഷേമ മന്ത്രിയുമായ ഡോ. സുൽത്താൻ ബിൻ സൈഫ് അൽ നെയാദി പറഞ്ഞു. ആഗോള വെല്ലുവിളികൾക്ക് പരിഹാരം കാണാൻ യുവാക്കളെ പ്രാപ്തരാക്കുകയാണ് യുഎഇ ഇതിലൂടെ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.

ആഗോള ജലനയതന്ത്രത്തിൽ യുവതലമുറയുടെ കാഴ്ചപ്പാടുകൾ പ്രതിഫലിക്കേണ്ടതുണ്ടെന്ന് യുഎഇ വിദേശകാര്യ അസിസ്റ്റന്റ് മന്ത്രി അബ്ദുള്ള ബലാല വ്യക്തമാക്കി. ജലക്ഷാമം കുട്ടികളുടെയും യുവാക്കളുടെയും ജീവിത അവസരങ്ങളെ ബാധിക്കുന്നുണ്ടെന്നും അവർക്ക് അന്താരാഷ്ട്ര തലത്തിൽ ശബ്ദമുയർത്താൻ ഈ വേദിയൊരുക്കുമെന്നും സി.ഐ.എഫ്.എഫ് സിഇഒ കേറ്റ് ഹാംപ്ടൺ ഓർമ്മിപ്പിച്ചു.

ഇംഗ്ലീഷ് ഭാഷാ പ്രാവീണ്യമുള്ളവർക്കും ജലവിഭവ സംരക്ഷണം, കാലാവസ്ഥാ വ്യതിയാനം, സുസ്ഥിര വികസനം തുടങ്ങിയ മേഖലകളിൽ താല്പര്യമുള്ള 18 നും 35 നും ഇടയിൽ പ്രായമുള്ളവർക്ക് അപേക്ഷിക്കാം. അറബ് യൂത്ത് സെന്ററിന്റെ ഔദ്യോഗിക വെബ്‌സൈറ്റ് വഴി അപേക്ഷകൾ സമർപ്പിക്കാവുന്നതാണ്.