ദുബൈ, മാർച്ച് 02, 2026: ഇന്ത്യയിലെ പ്രമുഖ അസറ്റ് മാനേജ്മെന്റ് സ്ഥാപനങ്ങളിലൊന്നായ ഐസിഐസിഐ പ്രുഡൻഷ്യൽ അസറ്റ് മാനേജ്മെന്റ് കമ്പനി ലിമിറ്റഡ് (ICICI Prudential AMC) ദുബായ് ഇന്റർനാഷണൽ ഫിനാൻഷ്യൽ സെന്ററിൽ (DIFC) പുതിയ ശാഖ തുറന്ന് പ്രവർത്തനം ആരംഭിച്ചു. മിഡിൽ ഈസ്റ്റ്, ആഫ്രിക്ക, ദക്ഷിണേഷ്യ മേഖലകളിലേക്കുള്ള നിക്ഷേപ പ്രവാഹങ്ങളെ ലക്ഷ്യമിട്ടുള്ള തന്ത്രപ്രധാന നീക്കമായാണ് കമ്പനിയുടെ പുതിയ ശാഖയെ വിലയിരുത്തുന്നത്.
ഡി.ഐ.എഫ്.സി അതോറിറ്റി സിഇഒ ഹിസ് എക്സലൻസി ആരിഫ് അമീരിയും, ഐസിഐസിഐ പ്രുഡൻഷ്യൽ എഎംസിയുടെ മാനേജിംഗ് ഡയറക്ടറും സിഇഒയുമായ നിമേഷ് ഷായും ചേർന്നാണ് ഓഫീസ് ഉദ്ഘാടനം ചെയ്തത്. ചീഫ് ഫിനാൻഷ്യൽ ഓഫീസർ നവീൻ അഗർവാൾ, ദുബായ് ഫിനാൻഷ്യൽ സെന്റർ ബ്രാഞ്ച് സീനിയർ എക്സിക്യൂട്ടീവ് ഓഫീസർ ആനന്ദ് വരദരാജൻ, ബിസിനസ് പങ്കാളികൾ, ജീവനക്കാർ, മാധ്യമപ്രവർത്തകർ എന്നിവർ ചടങ്ങിൽ പങ്കെടുത്തു.
അന്താരാഷ്ട്ര വിപുലീകരണത്തിന് പുതിയ കവാടം
ദുബായ് ഇന്റർനാഷണൽ ഫിനാൻഷ്യൽ സെന്റർ അന്താരാഷ്ട്ര നിക്ഷേപ പ്രവാഹങ്ങളുടെ പ്രധാന കേന്ദ്രമായി വളർന്ന സാഹചര്യത്തിൽ, ആഗോള നിക്ഷേപകരിലേക്കുള്ള സേവനം വിപുലീകരിക്കാനാണ് പുതിയ ശാഖയിലൂടെ ലക്ഷ്യമിടുന്നതെന്ന് കമ്പനി അറിയിച്ചു. ഗൾഫ് രാജ്യങ്ങളിലെയും ആഫ്രിക്കൻ രാജ്യങ്ങളിലെയും കോർപ്പറേറ്റ് നിക്ഷേപകരെയും ഉയർന്ന സമ്പന്നരായ വ്യക്തികളെയും ഇന്ത്യൻ നിക്ഷേപ അവസരങ്ങളുമായി ബന്ധിപ്പിക്കാനാണ് ശ്രമം.
ഡിഐഎഫ്സിയുടെ ശക്തമായ നിയന്ത്രണ സംവിധാനവും ആഗോള സാമ്പത്തിക ബന്ധങ്ങളും ഐസിഐസിഐ പ്രുഡൻഷ്യലിന് ഇന്ത്യൻ കേന്ദ്രീകൃത നിക്ഷേപ പദ്ധതികളെ ജിസിസി, ആഫ്രിക്കൻ വിപണികളിലേക്ക് വ്യാപിപ്പിക്കാൻ സഹായകരമാകുമെന്ന് ആരിഫ് അമീരി പറഞ്ഞു.
ഇന്ത്യ – ജിസിസി സാമ്പത്തിക ബന്ധങ്ങൾക്ക് ബലം
ഇന്ത്യയും ജിസിസി രാജ്യങ്ങളും തമ്മിലുള്ള ശക്തമായ സാമ്പത്തിക ബന്ധം മുൻനിർത്തി ദുബായ് ശാഖ സ്ഥാപിച്ചതായി നിമേഷ് ഷാ വ്യക്തമാക്കി. വളർന്നു വരുന്ന ഇന്ത്യൻ മൂലധന വിപണികളിൽ ഇക്വിറ്റി, സ്ഥിര നിക്ഷേപം, മൾട്ടി അസറ്റ് പദ്ധതികൾ എന്നിവയിലേക്ക് ഗവേഷണാധിഷ്ഠിതവും ദീർഘകാലവും ആയ നിക്ഷേപ സാധ്യതകൾ ഒരുക്കുകയാണ് ലക്ഷ്യമെന്ന് അദ്ദേഹം പറഞ്ഞു.
സിസ്റ്റമാറ്റിക് ഇൻവെസ്റ്റ്മെന്റ് പ്ലാനുകളുടെ (SIP) വളർച്ച, മെച്ചപ്പെട്ട കോർപ്പറേറ്റ് ഗവർണൻസ്, ശക്തമായ ആഭ്യന്തര നിക്ഷേപ പങ്കാളിത്തം എന്നിവ ഇന്ത്യൻ വിപണിയുടെ കരുത്ത് വർധിപ്പിച്ചുവെന്നും അദ്ദേഹം കൂട്ടിച്ചേർത്തു.
സർക്കാർ നിയന്ത്രിത വെൽത്ത് ഫണ്ടുകൾ, സ്വകാര്യ ബാങ്കുകൾ, വെൽത്ത് മാനേജർമാർ, ഫണ്ട് വിതരണ പങ്കാളികൾ എന്നിവരുമായി ബന്ധം സ്ഥാപിച്ച് അന്താരാഷ്ട്ര ബിസിനസിന്റെ പ്രധാന കേന്ദ്രമായി ദുബായ് ഓഫീസ് മാറുമെന്ന് പ്രതീക്ഷിക്കുന്നു.
English Summary
ICICI Prudential Asset Management Company (ICICI Prudential AMC), one of India’s leading asset management firms, has officially launched its new branch at the Dubai International Financial Centre (DIFC). The inauguration was jointly conducted by DIFC Authority CEO Arif Amiri and ICICI Prudential AMC Managing Director & CEO Nimesh Shah, along with senior executives and business partners.
