കോക്പിറ്റിലെ അക്രമത്തിനിടയിലും മനസ്സാന്നിധ്യം വീണ്ടെടുത്ത് ദുരന്തം ഒഴിവാക്കിയ ക്യാപ്റ്റനെ ജെറുസലേമിലേക്ക് ക്ഷണിച്ച് ഇസ്രയേൽ പ്രസിഡന്റ് ഐസക് ഹെർസോഗ്
ജെറുസലേം / ദുബായ് —ഫ്ലൈദുബായ് യാത്രാവിമാനത്തിൽ സഹപൈലറ്റിൽനിന്നുണ്ടായ ആക്രമണത്തെ അതിജീവിച്ച് 174 യാത്രക്കാരുടെയും ജീവനക്കാരുടെയും ജീവൻ രക്ഷിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന് ഇസ്രയേലിന്റെ പരമോന്നത സിവിലിയൻ ധീരതാ പുരസ്കാരം.
ഇസ്രയേൽ പ്രസിഡന്റ് ഐസക് ഹെർസോഗാണ് സ്മിത് മച്ചാറിന് രാജ്യത്തിന്റെ അഭിമാനകരമായ ‘പ്രസിഡൻഷ്യൽ അവാർഡ് ഫോർ സിവിലിയൻ ഹീറോയിസം’ സമ്മാനിക്കുമെന്ന് വ്യക്തമാക്കിയത്. ഇസ്രയേലിന്റെയും ഇന്ത്യയുടെയും ഒപ്പം മുഴുവൻ മനുഷ്യരാശിയുടെയും രക്ഷകനാണ് ക്യാപ്റ്റൻ മച്ചാറെന്ന് പ്രസിഡന്റ് അയച്ച കത്തിൽ വിശേഷിപ്പിച്ചു. പരിക്കുകളിൽനിന്ന് പൂർണമായി മുക്തനായ ശേഷം പുരസ്കാരം സ്വീകരിക്കാൻ അദ്ദേഹത്തെ ഹെർസോഗ് ജെറുസലേമിലേക്ക് ക്ഷണിക്കുകയും ചെയ്തു.
ടെൽ അവീവിൽനിന്ന് ദുബായിലേക്ക് പറക്കുകയായിരുന്ന ഫ്ലൈദുബായ് എഫ്.സെഡ് 1073 (FZ1073) വിമാനത്തിലാണ് നാടകീയ സംഭവങ്ങൾ അരങ്ങേറിയത്. വിമാനം നിയന്ത്രിക്കുന്നതിനിടെ ഒമാൻ സ്വദേശിയായ ഫസ്റ്റ് ഓഫീസർ ക്യാപ്റ്റൻ സ്മിത് മച്ചാറിനെ കോക്പിറ്റിൽവെച്ച് ക്രൂരമായി ആക്രമിക്കുകയായിരുന്നു. തലയോട്ടിക്ക് ഗുരുതരമായി പരിക്കേറ്റിട്ടും അതികഠിനമായ വേദന വകവെക്കാതെ കോക്പിറ്റിന്റെ ലോക്ക് തുറക്കാൻ ക്യാപ്റ്റൻ കാണിച്ച ധീരതയാണ് വിമാനത്തെ വൻ ദുരന്തത്തിൽനിന്ന് രക്ഷിച്ചത്.
വാതിൽ തുറന്നതോടെ ക്യാബിൻ ക്രൂവും വിമാനത്തിലുണ്ടായിരുന്ന മറ്റ് യാത്രാ പൈലറ്റുമാരും യാത്രക്കാരും ചേർന്ന് അക്രമിയെ കീഴ്പ്പെടുത്തി. തുടർന്ന് വിമാനം സൗദി അറേബ്യയിലെ തബൂക്കിലുള്ള പ്രിൻസ് സുൽത്താൻ ബിൻ അബ്ദുൽ അസീസ് അന്താരാഷ്ട്ര വിമാനത്താവളത്തിൽ അടിയന്തരമായി സുരക്ഷിതമായി ഇറക്കി. സൗദിയിലെ പ്രാഥമിക ചികിത്സയ്ക്ക് ശേഷം ദുബായിലെ സ്വകാര്യ ആശുപത്രിയിലേക്ക് മാറ്റിയ മച്ചാർ നിലവിൽ തീവ്രപരിചരണ വിഭാഗത്തിൽ സുഖം പ്രാപിച്ചുവരികയാണ്.
ഒരു നൂറ്റാണ്ട് മുൻപ് ഒന്നാം ലോകമഹായുദ്ധ കാലത്ത് ഈ പ്രദേശങ്ങളിലെ നഗരങ്ങൾ മോചിപ്പിക്കാൻ ധീരമായി പോരാടിയ ഇന്ത്യൻ സൈനികരുടെ ത്യാഗത്തോടാണ് ഹെർസോഗ് ക്യാപ്റ്റൻ മച്ചാറിന്റെ ഇടപെടലിനെ ഉപമിച്ചത്. ആ ചരിത്രനേട്ടങ്ങൾക്ക് സമാനമായി സ്മിത് മച്ചാറും ഇസ്രയേലിന്റെ ചരിത്രത്തിൽ ഇടംപിടിച്ചുവെന്നും ഇരുരാജ്യങ്ങളും തമ്മിലുള്ള ബന്ധത്തിന് ഇത് പുതിയ കരുത്തുപകരുമെന്നും ഇസ്രയേൽ പ്രസിഡന്റ് വ്യക്തമാക്കി.
പ്രതിസന്ധി ഘട്ടങ്ങളിൽ അസാധാരണ ധീരത കാട്ടുന്ന സാധാരണ പൗരന്മാർക്കായി ഏർപ്പെടുത്തിയതാണ് ഇസ്രയേലിന്റെ പ്രസിഡൻഷ്യൽ അവാർഡ് ഫോർ സിവിലിയൻ ഹീറോയിസം. വിമാനത്തിൽ അക്രമിയെ കീഴ്പ്പെടുത്താൻ സഹായിച്ച ആറ് ഇസ്രയേൽ പൗരന്മാർക്കും കഴിഞ്ഞദിവസം പ്രസിഡന്റ് പുരസ്കാരം നൽകിയിരുന്നു. മച്ചാറിന്റെ ധീരതയെ പ്രകീർത്തിച്ച് യുഎസ് ജനപ്രതിനിധി സഭയിലും പ്രമേയം അവതരിപ്പിച്ചിട്ടുണ്ട്.
