തിരുവനന്തപുരം: സ്വകാര്യ ആശുപത്രികളിലെ നഴ്സുമാരുടെ ശമ്പളപരിഷ്കരണവുമായി ബന്ധപ്പെട്ട മധ്യസ്ഥ ചർച്ച പരാജയപ്പെട്ടതിനെ തുടർന്ന് സമരം വീണ്ടും ശക്തമാകുന്നു. യുനൈറ്റഡ് നഴ്സസ് അസോസിയേഷനും (യു.എൻ.എ) മാനേജ്മെന്റുകളും തമ്മിൽ നടത്തിയ ചർച്ചയാണ് പരാജയപ്പെട്ടത്.
ഇതോടെ വെള്ളിയാഴ്ച മുതൽ 26 ആശുപത്രികളിൽ അനിശ്ചിതകാല സമരം ആരംഭിക്കുമെന്ന് യു.എൻ.എ അറിയിച്ചു. ഹൈക്കോടതിയിലെ മീഡിയേഷൻ സെന്ററിൽ മുതിർന്ന അഭിഭാഷകന്റെ നേതൃത്വത്തിൽ നടത്തിയ ചർച്ചയിൽ ശമ്പളവർധന ഉൾപ്പെടെയുള്ള ആവശ്യങ്ങളിൽ ഏകോപനം സാധിക്കാത്തതിനാൽ കൂടുതൽ സമയം വേണമെന്ന മധ്യസ്ഥന്റെ നിർദേശത്തോടെയാണ് ചർച്ച അവസാനിച്ചത്. ഇതോടെ സ്വകാര്യ ആശുപത്രികളിലെ സേവനങ്ങൾക്ക് തടസ്സമുണ്ടാകാനും രോഗികളെ ബാധിക്കാനും സാധ്യതയുണ്ടെന്ന് വിലയിരുത്തുന്നു.
