അബൂദബി: അബൂദബിയിലും അൽ ഐനിലുമായി അഞ്ച് പുതിയ വ്യാവസായികവും ലോജിസ്റ്റിക്സുമായ പദ്ധതികൾ പ്രഖ്യാപിച്ച് കിസാഡ് ഗ്രൂപ്പ്. ആകെ 14.7 കോടി ദിർഹം നിക്ഷേപമുള്ള പദ്ധതികൾ വഴി ഏകദേശം 500 പുതിയ തൊഴിലവസരങ്ങൾ സൃഷ്ടിക്കപ്പെടും
ഹാബിർ/എലിക്സിർ ഓയിൽ ഫീൽഡ് കെമിക്കൽ മിശ്രണ കേന്ദ്രം, ഗ്രാൻഡ് ലൈൻ ഇൻഡസ്ട്രീസ് കാർ ശുദ്ധീകരണ ഉൽപ്പന്ന നിർമ്മാണ കേന്ദ്രം, പ്രസന്റ് എൻറർപ്രൈസസ് മെറ്റൽസ് കോട്ടിങ് യൂണിറ്റ് എന്നിവയാണ് പ്രധാന പദ്ധതികൾ.
ഉനിബാൽ ഗ്രൂപ്പ് ഇൻവെസ്റ്റ്മെന്റ് അബൂദബിയിൽ ഇൻഡസ്ട്രിയൽ-ലോജിസ്റ്റിക്സ് വെയർഹൗസിങ് പദ്ധതി ആരംഭിക്കും. കിസാഡ് അൽ മാമൂറയിൽ അൽ ലുൽ ട്രാൻസ്പോർട്ട് ആൻഡ് ജനറൽ കോൺട്രാക്ടിങ് ഇൻഡസ്ട്രിയൽ-ലോജിസ്റ്റിക്സ് വെയർഹൗസിങ് കേന്ദ്രവും തുടങ്ങും.
അഞ്ച് പദ്ധതികളിൽ നാല് കിസാഡ് അൽ ഐനിലാണ് നടപ്പാക്കുന്നത്. ഇവയ്ക്കായി 37,400 ചതുരശ്ര മീറ്റർ സ്ഥലമാണ് വിനിയോഗിക്കുന്നത്. ഏകദേശം 4.7 കോടി ദിർഹമാണ് ചെലവ്, ഇതിലൂടെ 200 പേർക്ക് തൊഴിൽ ലഭിക്കും.
അഞ്ചാമത്തെ പദ്ധതി കിസാഡ് അൽ മാമൂറയിലാണ്. 46,500 ചതുരശ്ര മീറ്റർ വിസ്തൃതിയിൽ 10 കോടി ദിർഹം ചെലവിൽ നടപ്പാക്കുന്ന ഈ പദ്ധതിയിലൂടെ 300 പേർക്ക് തൊഴിൽ ലഭിക്കും.
വ്യാവസായികവും ലോജിസ്റ്റിക്സ് മേഖലയുമായുള്ള സ്ഥിരമായ ആവശ്യകതയുടെ തെളിവാണ് ഈ പുതിയ നിക്ഷേപങ്ങളെന്ന് അബൂദബി പോർട്സ് ഗ്രൂപ്പിലെ ഇക്കോണമിക് സിറ്റീസ് ആൻഡ് ഫ്രീ സോൺസ് സി.ഇ.ഒ അബ്ദുല്ല അൽ ഹമേലി വ്യക്തമാക്കി.
