ലൂയിസിയാന: യു.എസിലെ ലൂയിസിയാനയിൽ അക്രമി നടത്തിയ വെടിവെപ്പിൽ എട്ടുകുട്ടികൾക്ക് ദാരുണാന്ത്യം. ഒന്നിനും 14 വയസ്സിനുമിടയിൽ പ്രായമുള്ള കുട്ടികളാണ് മരണപ്പെട്ടത്. കൂടാതെ രണ്ട് സ്ത്രീകൾക്ക് ഗുരുതരമായി പരിക്കേറ്റിട്ടുണ്ട്. ആകെ 10 പേർക്ക് വെടിയേറ്റതായി പൊലീസ് സ്ഥിരീകരിച്ചു.
ഞായറാഴ്ച പുലർച്ചെ പ്രാദേശിക സമയം ആറുമണിയോടെയായിരുന്നു സംഭവം. തോക്കുമായെത്തിയ അക്രമി മൂന്ന് വീടുകളിൽ കയറിയിറങ്ങി വെടിയുതിർക്കുകയായിരുന്നു. ആദ്യം രണ്ട് വീടുകളിൽ വെടിവെച്ച ശേഷം സമീപത്തെ മറ്റൊരു വീട്ടിലേക്കും കടന്നുകയറി ആക്രമണം തുടരുകയായിരുന്നു. സംഭവസ്ഥലത്ത് വലിയ ഭീതിയും കലാപസാഹചര്യവും രൂപപ്പെട്ടു.
ആക്രമണത്തിന് പിന്നാലെ രക്ഷപ്പെടാൻ ശ്രമിച്ച പ്രതിയെ പൊലീസ് പിന്തുടർന്ന് വെടിവെച്ച് കൊന്നു. അക്രമിയെ കുറിച്ചുള്ള കൂടുതൽ വിവരങ്ങൾ പൊലീസ് പുറത്തുവിട്ടിട്ടില്ലെങ്കിലും, കുടുംബവുമായി ബന്ധപ്പെട്ട തർക്കമാണ് ഈ ക്രൂരതയ്ക്ക് പിന്നിലെന്ന് പ്രാഥമിക സൂചനകൾ വ്യക്തമാക്കുന്നു. മരിച്ച കുട്ടികളിൽ ചിലർ പ്രതിയുമായി ബന്ധമുള്ളവരാണെന്നും അന്വേഷണസംഘം പറഞ്ഞു.
അമേരിക്കയിൽ പൊതുസ്ഥലങ്ങളിലും വസതിപ്രദേശങ്ങളിലും വെടിവെപ്പുകൾ പതിവാകുന്ന സാഹചര്യത്തിൽ, കുട്ടികളെ ലക്ഷ്യമിട്ട് നടന്ന ഈ ആക്രമണം രാജ്യവ്യാപകമായി വലിയ ആശങ്ക ഉയർത്തിയിരിക്കുകയാണ്.
അതേസമയം, യു.എസിലെ അയോവ സർവകലാശാലക്കുസമീപം നടന്ന മറ്റൊരു വെടിവെപ്പിൽ മൂന്ന് വിദ്യാർഥികളടക്കം അഞ്ചുപേർക്കും പരിക്കേറ്റു. ഇതിൽ ഒരാളുടെ നില ഗുരുതരമാണെന്നും പൊലീസ് അറിയിച്ചു.
