ന്യൂഡൽഹി: ഫ്ലൈദുബായ് വിമാനത്തിലുണ്ടായ ഗുരുതരമായ സുരക്ഷാ സംഭവത്തിനിടെ അസാമാന്യ ധൈര്യം പ്രകടിപ്പിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന് നൽകിയ സഹായത്തിന് യുഎഇ, സൗദി അറേബ്യ സർക്കാരുകൾക്ക് നന്ദി അറിയിച്ച് ഇന്ത്യൻ പ്രധാനമന്ത്രി നരേന്ദ്ര മോദി.
ദുബായിൽ നിന്ന് ടെൽ അവീവിലേക്ക് പോയ ഫ്ലൈദുബായ് FZ1073 വിമാനത്തിൽ സെപ്റ്റംബർ 30-നാണ് സംഭവം ഉണ്ടായത്. ഗുരുതരമായി പരിക്കേറ്റിട്ടും യാത്രക്കാരുടെ ജീവൻ സംരക്ഷിക്കാൻ ക്യാപ്റ്റൻ സ്മിത് മച്ചാർ നടത്തിയ ഇടപെടലിനെ പ്രധാനമന്ത്രി പ്രശംസിച്ചു. വിമാനത്തിലെ പ്രതിസന്ധിക്ക് പിന്നാലെ വിമാനം സൗദി അറേബ്യയിലെ തബൂക്കിൽ സുരക്ഷിതമായി ഇറക്കുകയായിരുന്നു.
സൗദി അറേബ്യയിൽ അടിയന്തര ചികിത്സ ലഭിച്ച സ്മിത് മച്ചാറിനെ പിന്നീട് തുടർ ചികിത്സയ്ക്കായി അബുദാബിയിലേക്ക് മാറ്റി. അദ്ദേഹത്തിന്റെ ചികിത്സയ്ക്കും സുരക്ഷിതമായ മാറ്റത്തിനും ആവശ്യമായ സഹായം നൽകിയ സൗദി, യുഎഇ അധികൃതരോടാണ് ഇന്ത്യ നന്ദി അറിയിച്ചത്. നിലവിൽ അദ്ദേഹം സുഖം പ്രാപിച്ചുവരികയാണെന്നാണ് റിപ്പോർട്ടുകൾ.
ഒക്ടോബർ 2-ന് ക്യാപ്റ്റൻ സ്മിത് മച്ചാറുമായി സംസാരിച്ച പ്രധാനമന്ത്രി മോദി, പ്രതിസന്ധിഘട്ടത്തിൽ അദ്ദേഹം പ്രകടിപ്പിച്ച ധൈര്യത്തെയും മനഃസാന്നിധ്യത്തെയും അഭിനന്ദിക്കുകയും വേഗത്തിൽ പൂർണ ആരോഗ്യം വീണ്ടെടുക്കട്ടെയെന്ന് ആശംസിക്കുകയും ചെയ്തു. സംഭവത്തിന്റെ സാഹചര്യങ്ങളെക്കുറിച്ചുള്ള അന്വേഷണം യുഎഇ അധികൃതർ തുടരുകയാണ്.
