വത്തിക്കാൻ സിറ്റി: യുദ്ധത്തെ ന്യായീകരിക്കാൻ മതവിശ്വാസങ്ങളെ ഉപയോഗിക്കുന്ന ലോക നേതാക്കളെതിരെ ശക്തമായ വിമർശനവുമായി ലിയോ മാർപ്പാപ്പ രംഗത്ത്. ബൈബിൾ ഉദ്ധരിച്ച് യുദ്ധം ചെയ്യുന്നവരുടെ പ്രാർത്ഥന ദൈവം കേൾക്കില്ലെന്നും അദ്ദേഹം പറഞ്ഞു.
വത്തിക്കാനിലെ സെന്റ് പീറ്റേഴ്സ് സ്ക്വയറിൽ നടന്ന ഓശാന ഞായർ ശുശ്രൂഷയ്ക്കിടെയായിരുന്നു മാർപ്പാപ്പയുടെ പരാമർശം. “ദൈവം യുദ്ധത്തിന് എതിരാണ്. യേശു സമാധാനത്തിന്റെ പ്രതീകമാണ്. യുദ്ധത്തെ ന്യായീകരിക്കാൻ യേശുവിനെ ഉപയോഗിക്കാൻ കഴിയില്ല,” എന്ന് അദ്ദേഹം വ്യക്തമാക്കി.
ഇറാനെതിരായ യുദ്ധം രണ്ടാം മാസത്തിലേക്ക് കടക്കുന്ന സാഹചര്യത്തിലാണ് ഈ പ്രസ്താവന. യുദ്ധം മൂലം മധ്യേഷ്യയിലെ ക്രൈസ്തവർ കടുത്ത ദുരിതം നേരിടുകയാണെന്നും ഈസ്റ്റർ ആഘോഷങ്ങൾ പോലും സാധ്യമാകാത്ത അവസ്ഥയാണെന്നും അദ്ദേഹം പറഞ്ഞു.
യുദ്ധം നയിക്കുന്നവരുടെ കൈകൾ “രക്തപങ്കിലമാണെന്നും” അവരുടെ പ്രാർത്ഥനകൾ ദൈവം നിരസിക്കുമെന്നും അദ്ദേഹം മുന്നറിയിപ്പ് നൽകി. മതത്തെ രാഷ്ട്രീയത്തിനും യുദ്ധത്തിനും ഉപകരണമാക്കരുതെന്നും അദ്ദേഹം ആഹ്വാനം ചെയ്തു.
ഫെബ്രുവരി 28ന് അമേരിക്കയും ഇസ്രായേലും ചേർന്ന് ഇറാനിൽ നടത്തിയ ആക്രമണത്തിന് പിന്നാലെയാണ് സംഘർഷം രൂക്ഷമായത്. ഇതിന് പിന്നാലെ മേഖലയിൽ തുടർച്ചയായ സൈനിക ഏറ്റുമുട്ടലുകളും ആക്രമണങ്ങളും തുടരുകയാണ്.
യുദ്ധം ഉടൻ അവസാനിപ്പിക്കണമെന്നും വെടിനിർത്തൽ പ്രഖ്യാപിക്കണമെന്നും വത്തിക്കാൻ വീണ്ടും ആവശ്യപ്പെട്ടു. നിരപരാധികളായ സാധാരണ ജനങ്ങളെയാണ് യുദ്ധം ഏറ്റവും കൂടുതൽ ബാധിക്കുന്നതെന്നും മാർപ്പാപ്പ ഓർമ്മിപ്പിച്ചു.
