കിങ് ഖാലിദ് വിമാനത്താവളത്തിലെ മിസൈൽ ആക്രമണത്തിൽ പരുക്കേറ്റവരെ ആശുപത്രിയിൽ സന്ദർശിച്ച് ആരോഗ്യ മന്ത്രി ഫഹദ് അൽ ജലാജിൽ
റിയാദ് : റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിലുണ്ടായ വ്യോമാക്രമണത്തിൽ പരുക്കേറ്റ യുഎഇയിലെ അധ്യാപികയ്ക്ക് വിദഗ്ധ ചികിത്സയും ഉംറ തീർഥാടനത്തിനുള്ള സൗകര്യവും സൗദി അറേബ്യ ഉറപ്പുനൽകി.
കിങ് ഖാലിദ് വിമാനത്താവള ടെർമിനലുകൾ ലക്ഷ്യമിട്ട് ഹൂതികൾ നടത്തിയ മിസൈൽ-ഡ്രോൺ ആക്രമണങ്ങളിൽ പരുക്കേറ്റവരെ സൗദി ആരോഗ്യ മന്ത്രി ഫഹദ് അൽ ജലാജിൽ ആശുപത്രികളിൽ നേരിട്ടെത്തി സന്ദർശിച്ചു.
അബുദാബിയിൽ നിന്ന് കണക്റ്റിങ് വിമാനത്തിൽ റിയാദിലിറങ്ങി മക്കയിലേക്ക് ഉംറ നിർവഹിക്കാൻ പോകുകയായിരുന്ന യുഎഇയിലെ അധ്യാപികയും സംഘവുമാണ് പരുക്കേറ്റവരിൽ ഉൾപ്പെടുന്നത്. സൽമാൻ രാജാവിന്റെയും കിരീടാവകാശി മുഹമ്മദ് ബിൻ സൽമാന്റെയും പ്രത്യേക നിർദേശപ്രകാരം മുഴുവൻ ചികിത്സാച്ചെലവുകളും ഭരണകൂടം വഹിക്കുമെന്നും രോഗമുക്തി നേടിയ ശേഷം ഉംറ പൂർത്തിയാക്കാൻ ഔദ്യോഗിക സൗകര്യമൊരുക്കുമെന്നും മന്ത്രി അറിയിച്ചു. സർക്കാർ ടെലിവിഷൻ ചാനലായ അൽ ഇഖ്ബാരിയയാണ് ആശുപത്രി സന്ദർശന ദൃശ്യങ്ങൾ പുറത്തുവിട്ടത്.
ആക്രമണത്തിൽ പരുക്കേറ്റ സുഡാനീസ് എയർഹോസ്റ്റസ് റഹം യാസീൻ അഹമ്മദിനെയും മന്ത്രി സന്ദർശിച്ചു. പരുക്കേറ്റ വിമാന ജീവനക്കാർ വിദഗ്ധ ഡോക്ടർമാരുടെ നിരീക്ഷണത്തിലാണ്.
ശനിയാഴ്ചത്തെ ആക്രമണത്തിൽ ഗുരുതരമായി പരുക്കേറ്റ് ചികിത്സയിലായിരുന്ന ഒരു ഇന്ത്യൻ പൗരൻ ഞായറാഴ്ച മരിച്ചതായി റിയാദിലെ ഇന്ത്യൻ എംബസി സ്ഥിരീകരിച്ചു. ഇതോടെ ആകെ മരണസംഖ്യ 14 ആയി ഉയർന്നു. ആക്രമണങ്ങളിൽ പരിക്കേറ്റ മറ്റ് 10 ഇന്ത്യക്കാർ വിവിധ ആശുപത്രികളിൽ ചികിത്സയിലാണ്. മരിച്ചയാളുടെ മൃതദേഹം നാട്ടിലെത്തിക്കാനുള്ള നടപടികൾ പുരോഗമിക്കുകയാണെന്ന് നയതന്ത്ര പ്രതിനിധികൾ വ്യക്തമാക്കി.
ശനിയാഴ്ചത്തെ ആക്രമണത്തിൽ 309 പേർക്ക് പരുക്കേറ്റതായി ജനറൽ അതോറിറ്റി ഓഫ് സിവിൽ ഏവിയേഷൻ (ഗാക്ക) സ്ഥിരീകരിച്ചു. നാല് സൗദി പൗരന്മാരും ബംഗ്ലാദേശ്, സിറിയ, ഈജിപ്ത്, ഫലസ്തീൻ, ജോർദാൻ, യുഎസ്, സുഡാൻ, ഇന്ത്യ എന്നിവിടങ്ങളിൽ നിന്നുള്ള വിദേശികളുമാണ് കൊല്ലപ്പെട്ടത്.
ഞായറാഴ്ച ഡൊമസ്റ്റിക് ടെർമിനലിലേക്ക് വീണ്ടും പ്രൊജക്ടൈൽ പതിച്ചതിനെ തുടർന്ന് ഒരു പാകിസ്ഥാൻ പൗരൻ കൊല്ലപ്പെടുകയും 11 പേർക്ക് പരുക്കേൽക്കുകയും ചെയ്തിരുന്നു. അഞ്ച് ദിവസത്തിനിടെ നാലാം തവണയാണ് കിങ് ഖാലിദ് വിമാനത്താവളത്തിന് നേരെ ആക്രമണമുണ്ടാകുന്നത്. നിലവിൽ വിമാനത്താവളത്തിന്റെ പ്രവർത്തനം താൽക്കാലികമായി നിർത്തിവെച്ചിരിക്കുകയാണ്. ദമ്മാമിലെ കിങ് ഫഹദ് വിമാനത്താവളത്തിന് നേരെയും ആക്രമണശ്രമമുണ്ടായതായി സുരക്ഷാ കേന്ദ്രങ്ങൾ അറിയിച്ചു.
യാത്രാ ടെർമിനലുകൾക്ക് നേരെയുണ്ടായ ആക്രമണം അന്താരാഷ്ട്ര മാനുഷിക നിയമങ്ങളുടെ ലംഘനമാണെന്നും തക്കതായ തിരിച്ചടിയുണ്ടാകുമെന്നും അറബ് സഖ്യസേന വക്താവ് മേജർ ജനറൽ തുർക്കി അൽ മാലികി വ്യക്തമാക്കി.
