ഷാർജ∙ വാഹനങ്ങളുടെ എൻജിൻ ഓഫാക്കാതെയും ലോക്ക് ചെയ്യാതെയും പോകുന്ന ഡ്രൈവർമാർക്കെതിരെ ജാഗ്രതാ നിർദേശവുമായി ഷാർജ പോലീസ്.
ചെറിയൊരു അശ്രദ്ധ പോലും വാഹനങ്ങൾ മോഷ്ടിക്കപ്പെടാൻ കാരണമാകുമെന്ന് വ്യക്തമാക്കുന്ന ബോധവൽക്കരണ വിഡിയോ പൊലീസ് പുറത്തുവിട്ടു. പൊതുജനങ്ങളുടെ സുരക്ഷ മുൻനിർത്തി ഷാർജ പൊലീസ് ആരംഭിച്ച പ്രത്യേക ക്യാംപെയ്ന്റെ ഭാഗമായാണ് ഈ നടപടി.
ഒരു രാത്രികാല ദൃശ്യമാണ് വിഡിയോയിൽ ആവിഷ്കരിച്ചിരിക്കുന്നത്. റോഡരികിൽ വാഹനം നിർത്തി എൻജിൻ ഓഫാക്കാതെയും ലോക്ക് ചെയ്യാതെയും ഡ്രൈവർ പുറത്തേക്ക് പോകുന്നതും, തൊട്ടുപിന്നാലെ എത്തുന്ന മോഷ്ടാവ് നിമിഷങ്ങൾക്കകം വാഹനം ഓടിച്ചുപോകുന്നതുമാണ് ദൃശ്യങ്ങളിലുള്ളത്. ചെറിയൊരു ആവശ്യത്തിനാണെങ്കിൽ പോലും വാഹനം സുരക്ഷിതമാക്കാതെ പോകുന്നത് വൻ നഷ്ടങ്ങൾക്ക് കാരണമാകുമെന്ന് പൊലീസ് ഓർമിപ്പിക്കുന്നു.
വാഹനത്തിൽ നിന്ന് ഇറങ്ങുമ്പോൾ എൻജിൻ പൂർണമായും ഓഫാക്കി, താക്കോൽ കയ്യിൽ കരുതുകയും ഡോറുകൾ ലോക്ക് ചെയ്യുകയും വേണം. ഇത്തരം ലളിതമായ സുരക്ഷാ മുൻകരുതലുകളിലൂടെ വലിയൊരു പരിധി വരെ മോഷണങ്ങൾ തടയാൻ സാധിക്കുമെന്നും, കുറ്റകൃത്യങ്ങൾ കുറയ്ക്കാൻ പൊതുജനങ്ങൾ പൊലീസുമായി സഹകരിക്കണമെന്നും അധികൃതർ ആവശ്യപ്പെട്ടു.
