വാഷിങ്ടൺ: ഇറാനുമായി സമാധാന കരാറിൽ ഒപ്പുവെക്കുന്നതിനുള്ള നടപടികൾ അന്തിമഘട്ടത്തിലാണെന്നും കരാർ ഇന്ന് തന്നെ നിലവിൽ വന്നേക്കാമെന്നും അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. കരാർ പ്രാബല്യത്തിൽ വന്നാൽ ആഗോള വ്യാപാരത്തിന് നിർണായകമായ ഹോർമുസ് കടലിടുക്ക് ഉടൻ എല്ലാ രാജ്യങ്ങൾക്കും തുറന്നുകൊടുക്കുമെന്നും അദ്ദേഹം പറഞ്ഞു. എന്നാൽ ധാരണയിലെത്താൻ സാധിക്കാത്ത പക്ഷം മറ്റ് നടപടികൾ സ്വീകരിക്കുമെന്നും ട്രംപ് മുന്നറിയിപ്പ് നൽകി.
ഇറാന്റെ ആണവ പദ്ധതികളെ കുറിച്ചും ട്രംപ് കടുത്ത നിലപാട് ആവർത്തിച്ചു. ആവശ്യമെങ്കിൽ ഇറാന്റെ ശേഷിക്കുന്ന ആണവ അടിസ്ഥാന സൗകര്യങ്ങൾ പൂർണമായും നശിപ്പിക്കുമെന്നും അദ്ദേഹം മുന്നറിയിപ്പ് നൽകി. ട്രംപിന്റെ പ്രസ്താവന പശ്ചിമേഷ്യയിലെ രാഷ്ട്രീയ സാഹചര്യങ്ങളെ കൂടുതൽ ചൂടുപിടിപ്പിക്കുന്നതാണ്.
അതേസമയം, കരാർ ഇന്ന് ഒപ്പിടപ്പെടാനുള്ള സാധ്യത കുറവാണെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായി പ്രതികരിച്ചു. ചർച്ചകൾ പുരോഗമിക്കുകയാണെങ്കിലും അന്തിമ ധാരണയിലെത്താൻ കൂടുതൽ സമയം ആവശ്യമായേക്കാമെന്നും അടുത്ത ദിവസങ്ങളിൽ കരാർ യാഥാർഥ്യമാകാൻ സാധ്യതയുണ്ടെന്നും അദ്ദേഹം വ്യക്തമാക്കി.
യുദ്ധവിരാമം, ഹോർമുസ് കടലിടുക്ക് തുറക്കൽ, നാവിക ഉപരോധം പിൻവലിക്കൽ എന്നിവയാണ് ഇരുരാജ്യങ്ങളും ചർച്ച ചെയ്യുന്ന ഇടക്കാല ധാരണാപത്രത്തിലെ പ്രധാന വ്യവസ്ഥകളെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. ഇതുവരെ ഇറാനുമായി രൂപപ്പെടുത്തിയതിൽ ഏറ്റവും ശക്തമായ ധാരണാപത്രമാണ് നിലവിൽ ചർച്ചയിലുള്ളതെന്നാണ് അമേരിക്കയുടെ വിലയിരുത്തൽ.
ഇതിനിടെ, അമേരിക്ക-ഇറാൻ ധാരണാപത്രത്തിൽ 24 മണിക്കൂറിനകം ഇലക്ട്രോണിക് സംവിധാനത്തിലൂടെ ഒപ്പുവെച്ചേക്കാമെന്ന് പാകിസ്താൻ പ്രധാനമന്ത്രി ഷെഹബാസ് ഷെരീഫ് അറിയിച്ചു. ഇരുരാജ്യങ്ങളും സമാധാന കരാറിനോട് ഏറെ അടുത്തെത്തിയതായും സാങ്കേതിക തലത്തിലുള്ള ചർച്ചകൾ അടുത്തയാഴ്ച ആരംഭിക്കുമെന്നും അദ്ദേഹം വ്യക്തമാക്കി.
“അമേരിക്കയും ഇറാനും തമ്മിലുള്ള സമാധാന കരാറിലേക്ക് ഇത്രയും അടുത്തെത്തുന്നത് ആദ്യമായാണ്. അടുത്ത 24 മണിക്കൂറിനുള്ളിൽ ധാരണാപത്രത്തിൽ ഒപ്പുവെച്ചേക്കുമെന്നാണ് പ്രതീക്ഷ. ഇലക്ട്രോണിക് സംവിധാനത്തിലൂടെ കരാർ നടപടികൾ പൂർത്തിയാക്കാൻ പാകിസ്താൻ ആവശ്യമായ പിന്തുണ നൽകും,” എന്ന് ഷെഹബാസ് ഷെരീഫ് എക്സ് പ്ലാറ്റ്ഫോമിൽ കുറിച്ചു.
മേഖലയിലെ സംഘർഷാവസ്ഥ അവസാനിപ്പിക്കാൻ സഹായകമാകുമെന്ന പ്രതീക്ഷയിലാണ് അന്താരാഷ്ട്ര സമൂഹം. സമാധാന കരാർ യാഥാർഥ്യമായാൽ പശ്ചിമേഷ്യയിലെ രാഷ്ട്രീയ-സുരക്ഷാ സാഹചര്യങ്ങളിലും ആഗോള എണ്ണവിപണിയിലും വലിയ സ്വാധീനം ചെലുത്തുമെന്നാണ് വിലയിരുത്തൽ.
