ദുബായ്: രാജ്യാന്തര വിപണിയിൽ അസംസ്കൃത എണ്ണവില കുതിച്ചുയരുന്ന സാഹചര്യത്തിൽ യുഎഇയിൽ ഇന്ധനവില വീണ്ടും വർധിക്കുമെന്ന സൂചന. ജൂലൈ മാസത്തേക്കുള്ള പുതുക്കിയ ഇന്ധനവില പ്രഖ്യാപിക്കുന്നതിന് മുന്നോടിയായി ഇന്ധനവില നിർണയ സമിതിയുടെ യോഗം ഉടൻ ചേരും. ആഗോള എണ്ണവിലയിലെ മാറ്റങ്ങൾ പരിഗണിച്ചായിരിക്കും പുതിയ നിരക്കുകൾ പ്രഖ്യാപിക്കുക.
ഇത്തവണയും വില വർധനവ് പ്രഖ്യാപിച്ചാൽ യുഎഇയിൽ തുടർച്ചയായ നാലാം മാസമായിരിക്കും ഇന്ധനവില ഉയരുന്നത്. സ്വകാര്യ വാഹന ഉടമകൾക്കും ടാക്സി മേഖലയ്ക്കും ചരക്ക് ഗതാഗത രംഗത്തിനും ഇത് കൂടുതൽ സാമ്പത്തിക ബാധ്യത സൃഷ്ടിക്കുമെന്നാണ് വിലയിരുത്തൽ.
അമേരിക്ക, ഇസ്രയേൽ, ഇറാൻ എന്നിവയെ ചുറ്റിപ്പറ്റിയുള്ള പ്രാദേശിക സംഘർഷങ്ങളും ഹോർമുസ് കടലിടുക്കുമായി ബന്ധപ്പെട്ട അനിശ്ചിതത്വങ്ങളും ആഗോള എണ്ണ വിതരണത്തെ ബാധിച്ചിരിക്കുകയാണ്. ഇതിന്റെ പ്രതിഫലനമായാണ് അന്താരാഷ്ട്ര വിപണിയിൽ ക്രൂഡ് ഓയിൽ വില ഉയർന്ന നിലയിൽ തുടരുന്നത്.
വിപണി റിപ്പോർട്ടുകൾ പ്രകാരം ഏപ്രിലിൽ ബാരലിന് ശരാശരി 99 ഡോളറായിരുന്ന ബ്രെന്റ് ക്രൂഡിന്റെ വില മേയ് മാസത്തിൽ 106 ഡോളറിലേക്ക് ഉയർന്നു. ഈ വർധനവാണ് യുഎഇയിലെ ഇന്ധനവില നിർണയത്തെയും നേരിട്ട് സ്വാധീനിക്കുന്നത്.
ഇന്ധനവിലയിലെ തുടർച്ചയായ വർധനവ് സാധാരണ കുടുംബങ്ങളുടെ പ്രതിമാസ ചെലവുകളെയും ബാധിക്കുന്നുണ്ട്. ജോലിക്കും ദൈനംദിന ആവശ്യങ്ങൾക്കുമായി സ്വകാര്യ വാഹനങ്ങളെ ആശ്രയിക്കുന്നവരാണ് കൂടുതൽ പ്രതിസന്ധി നേരിടുന്നത്. ചെറിയ തോതിലുള്ള വില വർധനവ് പോലും മാസാവസാന ബജറ്റിൽ വലിയ സ്വാധീനം ചെലുത്തുന്നതായി ഉപഭോക്താക്കൾ ചൂണ്ടിക്കാട്ടുന്നു.
ഇന്ധനച്ചെലവിനായി വരുമാനത്തിന്റെ കൂടുതൽ ഭാഗം മാറ്റിവെക്കേണ്ടി വരുന്നത് കുടുംബങ്ങളുടെ സമ്പാദ്യത്തെയും മറ്റ് ചെലവുകളെയും ബാധിക്കുമെന്ന ആശങ്കയും ഉയരുന്നുണ്ട്. പുതിയ വില സംബന്ധിച്ച ഔദ്യോഗിക പ്രഖ്യാപനം അടുത്ത ദിവസങ്ങളിൽ ഉണ്ടാകുമെന്നാണ് പ്രതീക്ഷ.
