സർവകലാശാല റാങ്കിംഗിൽ കർശന മാനദണ്ഡങ്ങൾ; തൊഴിൽ, സാങ്കേതിക മേഖലകൾക്ക് ഊന്നൽ നൽകി ഉന്നതവിദ്യാഭ്യാസ മന്ത്രാലയത്തിന്റെ പുതിയ തീരുമാനം.
ദുബായ്:സ്വദേശി വിദ്യാർത്ഥികൾക്കുള്ള വിദേശ സർവകലാശാല സ്കോളർഷിപ്പ് വ്യവസ്ഥകളിൽ സമഗ്രമായ മാറ്റങ്ങൾ വരുത്തി യുഎഇ ഉന്നതവിദ്യാഭ്യാസ ശാസ്ത്ര ഗവേഷണ മന്ത്രാലയം. പുതിയ നയം അനുസരിച്ച് സ്കോളർഷിപ്പ് ലഭിക്കുന്നതിനുള്ള സർവകലാശാലാ റാങ്കിംഗ് മാനദണ്ഡങ്ങൾ കർശനമാക്കുകയും എട്ട് പ്രമുഖ രാജ്യങ്ങളെ മുൻഗണനാ പട്ടികയിൽ ഉൾപ്പെടുത്തുകയും ചെയ്തു.
രാജ്യത്തിന്റെ സാമ്പത്തിക പുരോഗതിക്കും ഭാവി ആവശ്യങ്ങൾക്കും അനുയോജ്യമായ രീതിയിൽ ഉന്നതവിദ്യാഭ്യാസ രംഗത്തെ മാറ്റിയെടുക്കുകയെന്ന ലക്ഷ്യത്തോടെയാണ് 2026-ലെ 179-ാം നമ്പർ മന്ത്രാലയ തീരുമാനം പുറപ്പെടുവിച്ചിരിക്കുന്നത്. സർക്കാർ ഫണ്ട് കാര്യക്ഷമമായി വിനിയോഗിക്കുന്നതിനും മികവുറ്റ ഉന്നതവിദ്യാഭ്യാസം ഉറപ്പാക്കുന്നതിനും പുതിയ നിർദ്ദേശങ്ങൾ വഴിതുറക്കും.
പുതിയ നിബന്ധനകൾ പ്രകാരം, വിദേശ സർവകലാശാലകളുടെ ആഗോള റാങ്കിംഗ് അടിസ്ഥാനമാക്കിയാകും സ്കോളർഷിപ്പുകൾ അനുവദിക്കുക. തിരഞ്ഞെടുക്കുന്ന വിഷയത്തിൽ ലോകത്തെ ആദ്യ 50 റാങ്കുകളിൽ ഉൾപ്പെടുന്ന സർവകലാശാലകൾക്ക് നേരിട്ട് യോഗ്യതയുണ്ടാകും. യുഎസ്, ഓസ്ട്രേലിയ എന്നിവിടങ്ങളിലെ സ്ഥാപനങ്ങൾക്ക് മൊത്തത്തിലുള്ള റാങ്കിംഗിലും വിഷയാധിഷ്ഠിത റാങ്കിംഗിലും ആദ്യ 100-ൽ ഇടം വേണം. മറ്റ് ഇംഗ്ലീഷ് സംസാരിക്കുന്ന രാജ്യങ്ങളിലെ സ്ഥാപനങ്ങൾക്ക് ആദ്യ 200-ഉം ഇംഗ്ലീഷ് ഇതര ഭാഷാ രാജ്യങ്ങളിലെ സർവകലാശാലകൾക്ക് ആദ്യ 300-ഉം ആണ് നിശ്ചയിച്ചിട്ടുള്ള റാങ്കിംഗ് പരിധി.
വിദ്യാഭ്യാസ സഹകരണം വിപുലമാക്കുന്നതിന്റെ ഭാഗമായി ചൈന, ജപ്പാൻ, ദക്ഷിണ കൊറിയ, സിംഗപ്പൂർ, സ്വിറ്റ്സർലൻഡ്, നെതർലാൻഡ്സ്, ജർമ്മനി, ഫിൻലാൻഡ് എന്നീ രാജ്യങ്ങളെ മന്ത്രാലയം മുൻഗണനാ പട്ടികയിൽ ഉൾപ്പെടുത്തി. സാങ്കേതിക വിജ്ഞാനവും ശാസ്ത്രീയ മുന്നേറ്റവും കൈവരിച്ച ഈ രാജ്യങ്ങളിലെ പഠനം സ്വദേശി ചെറുപ്പക്കാരുടെ ശേഷി വർദ്ധിപ്പിക്കുമെന്ന് കരുതപ്പെടുന്നു.
സ്കോളർഷിപ്പ് അപേക്ഷകൾ പരിഗണിക്കുമ്പോൾ രക്തസാക്ഷികളുടെ മക്കൾ, സാമൂഹിക ക്ഷേമ പദ്ധതികളുടെ ആനുകൂല്യം ലഭിക്കുന്ന കുടുംബങ്ങളിലെ കുട്ടികൾ, വിദൂര മേഖലകളിൽ വസിക്കുന്നവർ എന്നിവർക്ക് പ്രത്യേക മുൻഗണന നൽകും. അക്കാദമിക് മികവ്, പഠന വിഷയം, സർവകലാശാലയുടെ നിലവാരം എന്നിവ വിലയിരുത്തിയാകും അന്തിമ തിരഞ്ഞെടുപ്പ്.
ഊർജ്ജം, ഗതാഗതം, ലോജിസ്റ്റിക്സ്, സാങ്കേതികവിദ്യ, എൻജിനീയറിംഗ്, ആരോഗ്യ സംരക്ഷണം, പരിസ്ഥിതി ജല പരിപാലനം, ക്രിയേറ്റീവ് വ്യവസായങ്ങൾ, ധനകാര്യം എന്നീ മേഖലകളിലെ കോഴ്സുകൾക്കാണ് മുൻഗണന. സ്കോളർഷിപ്പ് നേടുന്ന വിദ്യാർത്ഥികൾ പഠന പുരോഗതി വ്യക്തമാക്കുന്ന രേഖകൾ കൃത്യമായി സമർപ്പിക്കണം. നിയമാവലികൾ ലംഘിക്കുകയോ തെറ്റായ വിവരങ്ങൾ നൽകുകയോ ചെയ്താൽ സ്കോളർഷിപ്പ് താൽക്കാലികമായി റദ്ദാക്കാനും തുക തിരിച്ചുപിടിക്കാനും വ്യവസ്ഥയുണ്ട്.
