സിംഗപ്പൂരിനെയും മലേഷ്യയെയും പിന്നിലാക്കി യുഎഇ ഒന്നാം സ്ഥാനം നിലനിർത്തി; ആർട്ടൺ ക്യാപിറ്റൽ പാസ്‌പോർട്ട് ഇൻഡക്സിൽ യുകെ ഏഴാമതും യുഎസ് പത്താമതും.
ദുബായ്, ഒക്ടോബർ 14 : മുൻകൂട്ടിയുള്ള വിസയില്ലാതെ 182 രാജ്യങ്ങളിലേക്ക് പ്രവേശനാനുമതി ഉറപ്പാക്കി യുഎഇ പാസ്‌പോർട്ട് ലോകത്തെ ഏറ്റവും കരുത്തുറ്റ യാത്രാരേഖയെന്ന പദവി നിലനിർത്തി. ആഗോള സിറ്റിസൺഷിപ്പ് കൺസൾട്ടൻസി സ്ഥാപനമായ ആർട്ടൺ ക്യാപിറ്റലിന്റെ പാസ്‌പോർട്ട് ഇൻഡക്സിലാണ് യുഎഇ വീണ്ടും ഒന്നാം സ്ഥാനത്തെത്തിയത്.
യുഎഇയുടെ ഔദ്യോഗിക വാർത്താ ഏജൻസിയായ വാം (WAM) പുറത്തുവിട്ട വിവരങ്ങൾ പ്രകാരം, 175 വീതം മൊബിലിറ്റി സ്കോറുകളോടെ സിംഗപ്പൂരും മലേഷ്യയുമാണ് രണ്ടാം സ്ഥാനം പങ്കിടുന്നത്. 174 രാജ്യങ്ങളിലേക്ക് പ്രവേശനമുള്ള സ്പെയിൻ മൂന്നാം സ്ഥാനത്തെത്തി. രണ്ടാം സ്ഥാനക്കാരുമായി താരതമ്യം ചെയ്യുമ്പോൾ ഏഴ് രാജ്യങ്ങളുടെയും സ്പെയിനിനേക്കാൾ എട്ട് രാജ്യങ്ങളുടെയും അധിക മുൻതൂക്കം യുഎഇ പൗരന്മാർക്കുണ്ട്.
182 മൊബിലിറ്റി സ്കോറിൽ 138 രാജ്യങ്ങളിലേക്ക് പൂർണ്ണമായും വിസാരഹിത യാത്രയും 44 രാജ്യങ്ങളിൽ ഓൺ-അറൈവൽ വിസ അല്ലെങ്കിൽ ഇലക്ട്രോണിക് ട്രാവൽ ഓതറൈസേഷൻ (eTA) സൗകര്യവുമാണ് ലഭ്യമാകുന്നത്. വെറും 16 രാജ്യങ്ങളിലേക്ക് മാത്രമാണ് നിലവിൽ യുഎഇ പൗരന്മാർക്ക് മുൻകൂട്ടി എംബസി വഴി വിസ നേടേണ്ടതുള്ളൂ.
ഫ്രാൻസ്, ജർമ്മനി, ഇറ്റലി, നെതർലൻഡ്‌സ്, സ്വിറ്റ്‌സർലൻഡ്, നോർവേ, ജപ്പാൻ ഉൾപ്പെടെയുള്ള 17 രാജ്യങ്ങൾ 173 മൊബിലിറ്റി സ്കോറോടെ നാലാം സ്ഥാനത്തുണ്ട്. ദക്ഷിണ കൊറിയ, ഹംഗറി, പോളണ്ട് എന്നിവ ഉൾപ്പെടുന്ന എട്ട് രാജ്യങ്ങൾ 172 സ്കോറോടെ അഞ്ചാം സ്ഥാനം നേടി. റൊമാനിയ, ചെക്ക് റിപ്പബ്ലിക്, ബൾഗേറിയ, ലിത്വാനിയ എന്നിവ 171 സ്കോറോടെ ആറാം സ്ഥാനത്താണ്.
പാശ്ചാത്യ രാജ്യങ്ങളിൽ പലതും പട്ടികയിൽ പിന്നോട്ട് പോയിട്ടുണ്ട്. യുണൈറ്റഡ് കിങ്ഡവും (യുകെ) സൈപ്രസും 170 പോയിന്റുമായി ഏഴാം സ്ഥാനത്താണ്. കാനഡ, ന്യൂസിലൻഡ്, ലിച്ചെൻസ്റ്റൈൻ എന്നിവർ എട്ടാം സ്ഥാനത്തും (169), ഓസ്‌ട്രേലിയയും ഐസ്‌ലൻഡും ഒൻപതാം സ്ഥാനത്തും (168) ഇടംപിടിച്ചു. 167 മൊബിലിറ്റി സ്കോറോടെ അമേരിക്ക പത്താം സ്ഥാനത്താണ്.
ഐക്യരാഷ്ട്രസഭയിലെ 193 അംഗരാജ്യങ്ങളുടെയും തായ്‌വാൻ, മക്കാവു, ഹോങ്കോങ്, കൊസോവോ, പലസ്തീൻ, വത്തിക്കാൻ എന്നീ ആറ് സ്വയംഭരണ പ്രദേശങ്ങളുടെയും ഉൾപ്പെടെ 199 യാത്രാരേഖകളാണ് ആർട്ടൺ ക്യാപിറ്റൽ പരിശോധിക്കുന്നത്. നിശ്ചിത ഇടവേളകളിൽ റിപ്പോർട്ട് ഇറക്കുന്ന വാർഷിക റാങ്കിങ്ങുകളിൽ നിന്ന് വ്യത്യസ്തമായി, ഓരോ രാജ്യവും വരുത്തുന്ന വിസ ഇളവുകൾക്കനുസരിച്ച് തത്സമയം മാറുന്ന പ്ലാറ്റ്‌ഫോമാണിത്.
തുല്യ സ്കോറുകൾ വരുന്ന ഘട്ടത്തിൽ വിസാരഹിത പ്രവേശനങ്ങളുടെ എണ്ണവും യുഎൻ വികസന സൂചികയും (HDI) പരിഗണിച്ചാണ് റാങ്ക് നിശ്ചയിക്കുന്നത്. യുഎഇ വിദേശകാര്യ മന്ത്രാലയത്തിന്റെ ശക്തമായ നയതന്ത്ര ഇടപെടലുകളും രാജ്യാന്തര തലത്തിലുള്ള സ്വീകാര്യതയുമാണ് ഈ മുൻതൂക്കത്തിന് പിന്നിലെന്ന് ഔദ്യോഗിക വൃത്തങ്ങൾ വ്യക്തമാക്കി.
