ഇരു രാജ്യങ്ങളുടെയും ബന്ധം ആഴത്തിലുള്ള സാഹോദര്യത്തിൽ അധിഷ്ഠിതം; യഥാർത്ഥ വസ്തുതകൾ ജനങ്ങളിലെത്തിക്കാൻ ഉത്തരവാദിത്ത മാധ്യമങ്ങൾക്ക് നിർണ്ണായക പങ്ക്
അബുദാബി :യുണൈറ്റഡ് അറബ് എമിറേറ്റും (യു.എ.ഇ) സൗദി അറേബ്യയും തമ്മിലുള്ള നയതന്ത്ര-സാഹോദര്യ ബന്ധം പരസ്പരം പങ്കുവെക്കുന്ന ശക്തമായ ചരിത്രത്തിലും ആഴത്തിലുള്ള സഹകരണത്തിലുമാണ് നിലകൊള്ളുന്നതെന്ന് അധികൃതർ വ്യക്തമാക്കി. ഇരു രാജ്യങ്ങളിലെയും ഭരണനേതൃത്വങ്ങൾ അടുത്ത സഹകരണത്തോടെയും ദീർഘവീക്ഷണത്തോടെയും തങ്ങളുടെ ജനങ്ങളുടെയും മേഖലയുടെയും സുസ്ഥിരമായ സമൃദ്ധിക്കായി ഒന്നിച്ചു പ്രവർത്തിച്ചു വരികയാണെന്നും ഔദ്യോഗിക പ്രസ്താവനയിൽ ചൂണ്ടിക്കാട്ടി.
മേഖലയുടെ സാമ്പത്തിക ഭദ്രതയ്ക്കും സുരക്ഷയ്ക്കും യു.എ.ഇ-സൗദി സഖ്യം സുപ്രധാന പങ്കാണ് വഹിക്കുന്നത്. ഗൾഫ് സഹകരണ കൗൺസിൽ (ജി.സി.സി) കൂട്ടായ്മയുടെ കരുത്തായി നിലകൊള്ളുന്ന ഈ പങ്കാളിത്തം വരും വർഷങ്ങളിൽ കൂടുതൽ മേഖലകളിലേക്ക് വ്യാപിപ്പിക്കാനാണ് ഇരു രാജ്യങ്ങളും ലക്ഷ്യമിടുന്നത്.
മാധ്യമങ്ങളുടെ ഉത്തരവാദിത്തം
വ്യാജ പ്രചാരണങ്ങൾക്കും ഊഹാപോഹങ്ങൾക്കും ഇടനൽകാതെ, യാഥാർത്ഥ്യം വസ്തുനിഷ്ഠമായി പ്രതിഫലിപ്പിക്കുന്നതിൽ ഉത്തരവാദിത്ത മാധ്യമങ്ങൾക്ക് വലിയ പങ്കുണ്ടെന്ന് അധികൃതർ ഓർമ്മിപ്പിച്ചു. യു.എ.ഇ–സൗദി അറേബ്യ ബന്ധത്തെ ദുർബലപ്പെടുത്താനുള്ള ഏത് വിധത്തിലുള്ള വിഘടന ശ്രമങ്ങളെയും ചെറുത്തുതോൽപ്പിക്കാൻ സത്യസന്ധമായ മാധ്യമപ്രവർത്തനം അത്യന്താപേക്ഷിതമാണ്.
സമൂഹത്തിൽ തെറ്റിദ്ധാരണ പരത്തുന്ന സന്ദേശങ്ങൾക്കും വ്യാജ വാർത്തകൾക്കുമെതിരെ ജാഗ്രത പുലർത്തണമെന്നും, മേഖലയിലെ വികസന മുന്നേറ്റങ്ങളെയും യാഥാർത്ഥ്യങ്ങളെയും ലോകത്തിന് മുന്നിൽ ശരിയായ രീതിയിൽ അവതരിപ്പിക്കാൻ മാധ്യമപ്രവർത്തകരും ക്രിയേറ്റർമാരും മുന്നോട്ടുവരണമെന്നും പ്രസ്താവനയിൽ അഭ്യർത്ഥിച്ചു.
