അബൂദബി: യു.എ.ഇയിൽ വരും ദിവസങ്ങളിൽ താപനില ഗണ്യമായി ഉയരാനിടയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രമായ എൻ.സി.എം. മുന്നറിയിപ്പ് നൽകി. ബലിപെരുന്നാൾ അവധി ദിനങ്ങളോടനുബന്ധിച്ച് രാജ്യത്തിന്റെ വിവിധ ഭാഗങ്ങളിൽ കടുത്ത ചൂട് അനുഭവപ്പെടാനിടയുണ്ടെന്നാണ് അറിയിപ്പ്.
ബുധനാഴ്ച രാജ്യത്ത് പൊതുവേ തെളിഞ്ഞ കാലാവസ്ഥ തുടരുമെങ്കിലും രാത്രിയിലും വ്യാഴാഴ്ച പുലർച്ചെയും ചില തീരദേശ മേഖലകളിൽ അന്തരീക്ഷ ഈർപ്പം വർധിക്കുമെന്നും അധികൃതർ അറിയിച്ചു. ഉയർന്ന താപനിലയും ഈർപ്പവും ചേർന്ന സാഹചര്യത്തിൽ പുറം ജോലികളിൽ ഏർപ്പെടുന്നവർ ജാഗ്രത പാലിക്കണമെന്നും നിർദേശം നൽകിയിട്ടുണ്ട്.
അബൂദബിയിൽ ബുധനാഴ്ച ഉയർന്ന താപനില 41 ഡിഗ്രി സെൽഷ്യസും കുറഞ്ഞ താപനില 28 ഡിഗ്രി സെൽഷ്യസും രേഖപ്പെടുത്താനിടയുണ്ട്. ദുബൈയിൽ 39 ഡിഗ്രി സെൽഷ്യസ് വരെയും ഷാർജയിൽ 40 ഡിഗ്രി സെൽഷ്യസ് വരെയും താപനില ഉയരുമെന്നാണ് പ്രവചനം. ഇരു എമിറേറ്റുകളിലും കുറഞ്ഞ താപനില 25 മുതൽ 28 ഡിഗ്രി സെൽഷ്യസ് വരെയായിരിക്കും.
അതേസമയം, രാജ്യത്തിന്റെ ഉൾപ്രദേശങ്ങളിലാണ് ഏറ്റവും കൂടുതൽ ചൂട് അനുഭവപ്പെടുക. ഇവിടെ താപനില 47 ഡിഗ്രി സെൽഷ്യസ് വരെ ഉയരാനിടയുണ്ടെന്ന് എൻ.സി.എം. വ്യക്തമാക്കി. റാസൽഖൈമയിലെ മലയോര മേഖലകളിൽ താരതമ്യേന കുറഞ്ഞ ചൂടായിരിക്കുമെന്നും അവിടെ താപനില 28 മുതൽ 31 ഡിഗ്രി സെൽഷ്യസ് വരെ മാത്രമായിരിക്കുമെന്നും റിപ്പോർട്ടിൽ പറയുന്നു.
കടുത്ത ചൂട് മുന്നിൽക്കണ്ട് മതിയായ അളവിൽ വെള്ളം കുടിക്കാനും ഉച്ചസമയങ്ങളിൽ നേരിട്ടുള്ള സൂര്യപ്രകാശം ഒഴിവാക്കാനും ആരോഗ്യ വിദഗ്ധർ നിർദേശിക്കുന്നു.
