കിഴക്കൻ മലയോര മേഖലകളിലും ഉൾനാടുകളിലും മഴ പെയ്യാൻ സാധ്യത; പൊടിപടലങ്ങൾ കാഴ്ചമറയ്ക്കുമെന്ന് മുന്നറിയിപ്പ്.
ദുബായ്: യുഎഇയുടെ വിവിധ ഭാഗങ്ങളിൽ വരും ദിവസങ്ങളിൽ വേനൽക്കാല മഴയ്ക്കും ശക്തമായ കാറ്റിനും സാധ്യതയെന്ന് നാഷണൽ സെന്റർ ഓഫ് മെറ്റീരിയോളജി (NCM) മുന്നറിയിപ്പ് നൽകി. രാജ്യത്തിന്റെ ഉൾനാടൻ മേഖലകളിൽ താപനില 48 ഡിഗ്രി സെൽഷ്യസ് വരെ ഉയർന്നേക്കും.
കിഴക്കൻ പർവതനിരകൾക്ക് മുകളിൽ രൂപപ്പെടുന്ന മഴമേഘങ്ങൾ (Convective Clouds) ഉൾനാടൻ പ്രദേശങ്ങളിലേക്ക് വ്യാപിക്കുന്നതോടെയാണ് പലയിടങ്ങളിലും മഴയ്ക്ക് കളമൊരുങ്ങുന്നത്. കിഴക്കുനിന്നുള്ള ഉപരിതല കുറഞ്ഞ മർദ്ദമേഖലയുടെ സാന്നിധ്യമാണ് ഈ പെട്ടെന്നുള്ള കാലാവസ്ഥാ വ്യതിയാനത്തിന് കാരണം.
ഉൾനാടുകളിൽ താപനില 43 മുതൽ 48 ഡിഗ്രി സെൽഷ്യസ് വരെ ഉയരുമ്പോൾ, തീരദേശ മേഖലകളിലും ദ്വീപുകളിലും 37 മുതൽ 42 ഡിഗ്രി വരെയായിരിക്കും ചൂട്. മലയോര മേഖലകളിൽ 31 മുതൽ 37 ഡിഗ്രി സെൽഷ്യസ് വരെ താപനില രേഖപ്പെടുത്താൻ സാധ്യതയുണ്ട്.
മണിക്കൂറിൽ 45 കിലോമീറ്റർ വരെ വേഗതയിൽ ശക്തമായ കാറ്റ് വീശിയടിക്കാൻ സാധ്യതയുള്ളതിനാൽ തുറസ്സായ സ്ഥലങ്ങളിലും ഹൈവേകളിലും പൊടിപടലങ്ങൾ ഉയർന്നുപൊങ്ങി കാഴ്ചപരിധി കുറയാൻ ഇടയുണ്ട്. അതിനാൽ വാഹനമോടിക്കുന്നവർ ജാഗ്രത പാലിക്കണമെന്ന് അധികൃതർ നിർദേശിച്ചു. അതേസമയം, അറേബ്യൻ ഉൾക്കടലിലും ഒമാൻ കടലിലും കടൽക്ഷോഭത്തിന് സാധ്യതയില്ലെന്നും കടൽ ശാന്തമായിരിക്കുമെന്നും അറിയിപ്പിലുണ്ട്.
ഈ അസ്ഥിര കാലാവസ്ഥ ശനിയാഴ്ച വരെ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ. വ്യാഴാഴ്ച മുതൽ താപനിലയിൽ വീണ്ടും നേരിയ വർധനവുണ്ടായേക്കാം. കിഴക്കൻ, തെക്കൻ മേഖലകളിൽ ഇടയ്ക്കിടെ മഴമേഘങ്ങൾ രൂപപ്പെടാനും മഴ പെയ്യാനുമുള്ള സാധ്യത നിലനിൽക്കുന്നുണ്ട്.
