ഷാർജ: ഇന്ന് നടക്കുന്ന ലോകകപ്പ് ട്വന്റി20യിൽ ന്യൂസീലൻഡിനാണ് വിജയ സാധ്യതയെന്ന് മുൻ ഇന്ത്യൻ ക്യാപ്റ്റനും ബിസിസിഐ പ്രസിഡന്റുമായ സൗരവ് ഗാംഗുലി പറഞ്ഞു. ഷാർജ രാജ്യാന്തര പുസ്തകമേളയിൽ ‘ദാദ-അൺ പ്ലഗ്ഗ്ഡ്’ എന്ന പരിപാടിയിൽ സംവദിക്കുകയായിരുന്നു അദ്ദേഹം.ഓസ്ട്രേലിയ മികച്ച ടീം തന്നെയാണ്. മാത്യു വെയ്ഡ്, മാർക്കസ് സ്റ്റോയിനസ് എന്നിവർ പാക്കിസ്ഥാനെതിരെ പുറത്തെടുത്ത പ്രകടനം ഫൈനലിൽ ന്യൂസീലൻഡിനെതിരെ പുറത്തെടുത്താൽ സാധ്യത തള്ളിക്കളയാനാവില്ല. എങ്കിലും ഇത് ന്യൂസീലൻഡിന്റെ സമയമാണെന്നാണ് കരുതുന്നതെന്നും സൗരവ് പറഞ്ഞു.ഇന്ത്യ സെമിയിൽ പോലും എത്താതെ പുറത്തായതിനാൽ ഫൈനൽ ആര് ജയിക്കുമെന്ന താത്പര്യവും ആകാംക്ഷയും ഇല്ലാതായെന്ന് തമാശ രൂപേണ അദ്ദേഹം പറഞ്ഞു.
