ന്യൂഡൽഹി ∙ ചോദ്യപ്പേപ്പർ ചോർച്ചയെ തുടർന്ന് റദ്ദാക്കിയ NEET UG 2026 പരീക്ഷ വീണ്ടും നടത്തുമ്പോൾ വിദ്യാർഥികൾ പുതുതായി രജിസ്റ്റർ ചെയ്യേണ്ടതില്ലെന്ന് National Testing Agency (എൻ.ടി.എ) വ്യക്തമാക്കി.
22 ലക്ഷത്തിലധികം വിദ്യാർഥികളെയും രക്ഷിതാക്കളെയും ആശങ്കയിലാഴ്ത്തിയ സാഹചര്യത്തിലാണ് എൻ.ടി.എ വിശദീകരണവുമായി രംഗത്തെത്തിയത്. പുനഃപരീക്ഷയുടെ തീയതി ഉൾപ്പെടെയുള്ള കൂടുതൽ വിവരങ്ങൾ ഔദ്യോഗിക ചാനലുകൾ വഴി ഉടൻ പ്രഖ്യാപിക്കുമെന്ന് അധികൃതർ അറിയിച്ചു.
2026 മേയ് പരീക്ഷാ സൈക്കിളിൽ ശേഖരിച്ച വിവരങ്ങളുടെ അടിസ്ഥാനത്തിലായിരിക്കും പുനഃപരീക്ഷ നടത്തുക. വിദ്യാർഥികൾ വീണ്ടും അപേക്ഷ സമർപ്പിക്കുകയോ രജിസ്ട്രേഷൻ നടപടികൾ പൂർത്തിയാക്കുകയോ വേണ്ടതില്ലെന്ന് എൻ.ടി.എ വ്യക്തമാക്കി.
പുനഃപരീക്ഷയ്ക്കായി അധിക ഫീസ് ഈടാക്കില്ല. നിലവിൽ വിദ്യാർഥികൾ അടച്ച പരീക്ഷാഫീസ് തിരികെ നൽകുമെന്നും എൻ.ടി.എ അറിയിച്ചു. പരീക്ഷയ്ക്കായി പുതിയ അഡ്മിറ്റ് കാർഡുകൾ പിന്നീട് അനുവദിക്കും.
ചോദ്യപ്പേപ്പർ ചോർച്ച വിവാദത്തെ തുടർന്ന് പരീക്ഷ റദ്ദാക്കിയ സാഹചര്യത്തിൽ വിദ്യാർഥികൾക്ക് ആവശ്യമായ തയ്യാറെടുപ്പിനുള്ള സമയം ലഭിക്കുമോ എന്ന ആശങ്ക തുടരുകയാണ്. പുതിയ പരീക്ഷ തീയതി എത്രയും വേഗം പ്രഖ്യാപിക്കണമെന്ന ആവശ്യവും വിവിധ ഭാഗങ്ങളിൽ നിന്ന് ഉയരുന്നുണ്ട്.
