താമസ–വിദേശകാര്യ മേഖലയിൽ പരമോന്നത റേറ്റിങ് നേടുന്ന ലോകത്തെ ആദ്യ സ്ഥാപനം
ദുബായ്: ഭാവിയിലെ മാറ്റങ്ങൾ മുൻകൂട്ടി തിരിച്ചറിഞ്ഞ് അവയ്ക്കനുസരിച്ച് സേവനങ്ങളും പദ്ധതികളും രൂപപ്പെടുത്തുന്നതിലെ മികവിന് ദുബായ് ജി.ഡി.ആർ.എഫ്.എ- ക്ക് ആഗോള അംഗീകാരം. ഗ്ലോബൽ ഇന്നൊവേഷൻ ഇൻസ്റ്റിറ്റ്യൂട്ട് (GInI) നടത്തിയ ‘ഫ്യൂച്ചർ ഷേപ്പിങ് മെച്യൂരിറ്റി’,- വിലയിരുത്തലിൽ പരമോന്നതമായ 7 സ്റ്റാർ റേറ്റിങ് ജനറൽ ഡയറക്ടറേറ്റ് സ്വന്തമാക്കി. ഇതോടെ താമസ–വിദേശകാര്യ മേഖലയിൽ ഈ അംഗീകാരം നേടുന്ന ലോകത്തെ ആദ്യ സ്ഥാപനമായി ജി.ഡി.ആർ.എഫ്.എ
ഭാവിയെക്കുറിച്ചുള്ള പഠനങ്ങളെ ജനങ്ങൾക്ക് പ്രയോജനപ്പെടുന്ന സേവനങ്ങളാക്കി മാറ്റിയതാണ് നേട്ടത്തിന്റെ പ്രധാന സവിശേഷത. യാത്രക്കാരുടെ ഇമിഗ്രേഷൻ നടപടികൾ വെറും 3.4 സെക്കൻഡിൽ പൂർത്തിയാക്കുന്ന ‘റെഡ് കാർപെറ്റ്’ പദ്ധതി ഇതിന്റെ ശ്രദ്ധേയ ഉദാഹരണമായി വിലയിരുത്തൽ റിപ്പോർട്ട് ചൂണ്ടിക്കാട്ടി. ആവശ്യങ്ങൾ മുൻകൂട്ടി തിരിച്ചറിഞ്ഞുള്ള സേവനങ്ങളും പ്രവർത്തനക്ഷമതയും ഉപഭോക്തൃ അനുഭവവും മെച്ചപ്പെടുത്തുന്ന സ്മാർട്ട് പരിഹാരങ്ങളും റിപ്പോർട്ടിൽ ഇടംനേടി.
നിർമിതബുദ്ധിയും നൂതന സാങ്കേതികവിദ്യകളും ഉപയോഗിക്കുന്ന ‘ഫ്യൂച്ചർ റഡാർ’ സംവിധാനത്തിനും പ്രത്യേക പരാമർശമുണ്ട്. ആഗോള പ്രവണതകളും മാറ്റങ്ങളുടെ പ്രാരംഭ സൂചനകളും നിരീക്ഷിച്ച് വിവരങ്ങൾ വിശകലനം ചെയ്യുന്ന ഈ സംവിധാനം, ഭാവിയിലെ സാധ്യതകളും വെല്ലുവിളികളും തിരിച്ചറിയാൻ സഹായിക്കുന്നു. ഇതിലൂടെ ലഭിക്കുന്ന അറിവുകൾ തന്ത്രപരമായ ആസൂത്രണത്തിനും വ്യക്തമായ വിവരങ്ങളുടെ അടിസ്ഥാനത്തിലുള്ള തീരുമാനങ്ങൾക്കും ഉപയോഗപ്പെടുത്തുന്നു.
ഫലപ്രദമായ ഭരണസംവിധാനം, നേതൃത്വത്തിന്റെ തുടർച്ചയായ പിന്തുണ, ഭാവിപഠനത്തിലെ മികവ് എന്നിവയും റിപ്പോർട്ട് പ്രശംസിച്ചു. ഭാവിപഠനം, നവീകരണം, സ്ഥാപനതല ആസൂത്രണം എന്നിവ ഏകോപിപ്പിച്ച സമീപനം ആഗോള മാറ്റങ്ങളോട് വേഗത്തിലും കാര്യക്ഷമമായും പ്രതികരിക്കാൻ വകുപ്പിനെ പ്രാപ്തമാക്കുന്നതായും വിലയിരുത്തി.
യു.എ.ഇ ശതാബ്ദി ദർശനം 2071, ഭാവിക്കായുള്ള യു.എ.ഇയുടെ ദേശീയ തന്ത്രം, ദുബായ് സർക്കാരിന്റെ ഭാവി സജ്ജതയ്ക്കായുള്ള നയങ്ങൾ എന്നിവയോട് ചേർന്നാണ് ഈ പ്രവർത്തനങ്ങൾ മുന്നോട്ടുപോകുന്നത്. പ്രത്യേക പരിശീലനങ്ങളും ഭാവിപഠന ഡിപ്ലോമകളും വഴി ജീവനക്കാരുടെ കഴിവുകൾ വികസിപ്പിക്കുന്നതിനൊപ്പം, പ്രവണതകൾ വിശകലനം ചെയ്യുന്നതിലും ഭാവിയിലെ വിവിധ സാഹചര്യങ്ങൾ വിലയിരുത്തുന്നതിലും ജീവനക്കാരെയും വിദഗ്ധരെയും പങ്കാളികളാക്കുന്നു.
വിവിധ മേഖലകൾ തമ്മിലുള്ള ഏകോപനം, വിദഗ്ധ സംഘങ്ങളുടെ സംഭാവനകൾ, ‘ഫ്യൂച്ചർ അംബാസഡർമാരുടെ’ പ്രവർത്തനം എന്നിവയും അംഗീകാരത്തിൽ നിർണായകമായി. ഭാവിയെക്കുറിച്ചുള്ള അറിവ് പ്രചരിപ്പിക്കാനും ജീവനക്കാരുടെ പങ്കാളിത്തം വർധിപ്പിക്കാനുമുള്ള ഈ ശ്രമങ്ങൾ, ദീർഘവീക്ഷണത്തെ സ്ഥാപനത്തിന്റെ സ്ഥിരം പ്രവർത്തനരീതിയാക്കാൻ സഹായിക്കുന്നതായി റിപ്പോർട്ട് വ്യക്തമാക്കി.
ഭാവിയിലെ വെല്ലുവിളികളെ വികസനാവസരങ്ങളാക്കി മാറ്റാനും ജീവിതനിലവാരവും ആഗോള മത്സരക്ഷമതയും ഉയർത്താനുമുള്ള ജനറൽ ഡയറക്ടറേറ്റിന്റെ പ്രവർത്തനങ്ങൾക്കുള്ള അംഗീകാരമാണ് സെവൻ സ്റ്റാർ റേറ്റിങ്. താമസിക്കാനും ജോലി ചെയ്യാനും സന്ദർശിക്കാനുമുള്ള ലോകത്തിലെ മികച്ച നഗരമായി ദുബായിയെ ഉയർത്തുകയെന്ന ലക്ഷ്യത്തിന് കരുത്തുപകരുന്നതാണ് ഈ നേട്ടമെന്ന് ജനറൽ ഡയറക്ടറേറ്റ് വ്യക്തമാക്കി
