മുൻകാലങ്ങളിലെ മികച്ച സംഭാവനകൾക്കുള്ള അംഗീകാരമായാണ് ഈ പദവി പുതുക്കി നൽകിയിരിക്കുന്നത്.
റിയാദ്: സൗദി ആരോഗ്യ മന്ത്രാലയത്തിന്റെ പ്ലാനിങ് ആൻഡ് ഡെവലപ്മെന്റ് വിഭാഗം വൈസ് മിനിസ്റ്ററായി അബ്ദുൽ അസീസ് ബിൻ അബ്ദുറഹ്മാൻ അൽ റുമൈഹിയെ വീണ്ടും നിയമിച്ച് സൗദി ഭരണാധികാരിയുടെ ഉത്തരവ് പുറത്തിറങ്ങി.
ആരോഗ്യ മേഖലയിലെ വികസനത്തിനും പുരോഗതിക്കും മുൻകാലങ്ങളിൽ നൽകിയ മികച്ച സംഭാവനകൾക്കും നേതൃപാടവത്തിനുമുള്ള അംഗീകാരമായാണ് അദ്ദേഹത്തിന്റെ നിയമനം പുതുക്കിയിരിക്കുന്നത്.
തന്റെ സേവന കാലാവധി നീട്ടിനൽകിയതിന് സൽമാൻ രാജാവിനും, കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ രാജകുമാരനും അൽ റുമൈഹി നന്ദിയും ആദരവും രേഖപ്പെടുത്തി. തനിക്ക് നൽകിയ പിന്തുണക്കും മാർഗനിർദേശങ്ങൾക്കും ആരോഗ്യ മന്ത്രി ഫഹദ് അൽ ജലാജിലിനോടും, രാജ്യത്തെ ജനങ്ങളുടെ ആരോഗ്യം സംരക്ഷിക്കുന്നതിനായി അശ്രാന്തം പരിശ്രമിക്കുന്ന മുഴുവൻ ആരോഗ്യപ്രവർത്തകരോടും അദ്ദേഹം പ്രത്യേകം നന്ദി അറിയിച്ചു.
സൗദി അറേബ്യയുടെ ആരോഗ്യ മേഖലയെ കൂടുതൽ ഉയരങ്ങളിലേക്ക് നയിക്കാൻ ഈ പുനർനിയമനം കരുത്താകുമെന്ന് അൽ റുമൈഹി പ്രതികരിച്ചു.
