ആറ് പ്രധാന റോഡുകളിലായി 14.5 കിലോമീറ്റർ പാത; യാത്രാസമയം 59 ശതമാനം വരെ കുറയുമെന്ന് ആർടിഎ.
ദുബായ്: ദുബായിലെ പൊതുഗതാഗത സംവിധാനം കൂടുതൽ വേഗമേറിയതാക്കാനുള്ള റോഡ്സ് ആൻഡ് ട്രാൻസ്പോർട്ട് അതോറിറ്റിയുടെ (RTA) 14.5 കിലോമീറ്റർ നീളമുള്ള പ്രത്യേക ബസ്-ടാക്സി ലൈൻ പദ്ധതിയുടെ 30 ശതമാനം ജോലികൾ പൂർത്തിയായി. എമിറേറ്റിലെ ആറ് പ്രധാന റോഡുകളിലായി നടപ്പിലാക്കുന്ന ഈ പദ്ധതി പൂർത്തിയാകുന്നതോടെ ബസുകളുടെ യാത്രാസമയം ഗണ്യമായി കുറയുകയും സമയനിഷ്ഠ വർദ്ധിക്കുകയും ചെയ്യും.
ഷെയ്ഖ് സബാഹ് അൽ അഹമ്മദ് അൽ ജാബർ അൽ സബാഹ് സ്ട്രീറ്റ്, സെക്കൻഡ് ഡിസംബർ സ്ട്രീറ്റ്, അൽ സത്വ സ്ട്രീറ്റ്, അൽ നഹ്ദ സ്ട്രീറ്റ്, ഒമർ ബിൻ അൽ ഖത്താബ് സ്ട്രീറ്റ്, നായിഫ് സ്ട്രീറ്റ് എന്നീ ആറ് പ്രധാന റോഡുകളിലാണ് പുതിയ പ്രത്യേക പാതകൾ ഒരുങ്ങുന്നത്. നിലവിലുള്ള റൂട്ടുകൾക്ക് പുറമെ ഈ ഘട്ടം കൂടി പൂർത്തിയാകുമ്പോൾ ദുബായിലെ ആകെ പ്രത്യേക ബസ് ലൈനുകളുടെ നീളം 20.6 കിലോമീറ്ററായി ഉയരും.
ദുബായുടെ സുസ്ഥിരമായ ഗതാഗത ലക്ഷ്യങ്ങൾ കൈവരിക്കുന്നതിൽ പ്രത്യേക ബസ്-ടാക്സി ലൈനുകൾ നിർണായക പങ്കുവഹിക്കുമെന്ന് ആർടിഎ ഡയറക്ടർ ജനറലും എക്സിക്യൂട്ടീവ് ഡയറക്ടർ ബോർഡ് ചെയർമാനുമായ മത്തർ അൽ തായർ വ്യക്തമാക്കി. വേഗതയേറിയതും കൃത്യതയുള്ളതുമായ സർവീസുകൾ ലഭ്യമാക്കുന്നതിലൂടെ പൊതുഗതാഗത സംവിധാനം ജനങ്ങൾക്ക് കൂടുതൽ പ്രിയപ്പെട്ടതാക്കി മാറ്റാൻ ഇതിലൂടെ സാധിക്കുമെന്നും അദ്ദേഹം കൂട്ടിച്ചേർത്തു.
തിരക്കേറിയ സമയങ്ങളിൽ ബസ് യാത്രാസമയം 24% മുതൽ 59% വരെ കുറയ്ക്കാൻ പുതിയ പാതകൾക്ക് കഴിയും. നായിഫ് സ്ട്രീറ്റിൽ 59 ശതമാനവും, അൽ സത്വ സ്ട്രീറ്റിൽ 54 ശതമാനവും, ഒമർ ബിൻ അൽ ഖത്താബ് സ്ട്രീറ്റിൽ 50 ശതമാനവും യാത്രാസമയം ലാഭിക്കാൻ സാധിക്കും. കൂടാതെ സെക്കൻഡ് ഡിസംബർ സ്ട്രീറ്റ് ഉൾപ്പെടെയുള്ള റൂട്ടുകളിൽ ബസുകളുടെ സമയനിഷ്ഠയിൽ 56% വരെ പുരോഗതിയുണ്ടാകും. ഇത് യാത്രാക്ലേശം കുറയ്ക്കുന്നതിനൊപ്പം സ്വകാര്യ വാഹനങ്ങളുടെ ഉപയോഗം കുറയ്ക്കാനും അന്തരീക്ഷ മലിനീകരണം തടയാനും സഹായിക്കും.
