ദുബൈ: ഈദ് അൽ അദ്ഹ അവധികൾ പ്രഖ്യാപിച്ച് ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്സസ്.. മേയ് 25 മുതൽ 29 വരെയാണ് യു.എ.ഇയിലെ സർക്കാർ സ്ഥാപനങ്ങൾക്ക് ബലി പെരുന്നാൾ അവധി അനുവദിച്ചിരിക്കുന്നത്.
വാരാന്ത്യ അവധികളായ ശനി, ഞായർ ദിവസങ്ങളും ചേർന്നതോടെ ഷാർജ ഒഴികെയുള്ള എമിറേറ്റുകളിലെ സർക്കാർ ജീവനക്കാർക്ക് ഒമ്പത് ദിവസത്തെ നീണ്ട അവധിയാണ് ലഭിക്കുക. ഷാർജയിൽ വെള്ളിയാഴ്ചയും ഔദ്യോഗിക അവധിയായതിനാൽ അവിടെ സർക്കാർ ജീവനക്കാർക്ക് 10 ദിവസത്തെ അവധി ലഭിക്കും.
സ്വകാര്യ മേഖലയിലെ സ്ഥാപനങ്ങൾക്ക് മേയ് 26 മുതൽ 29 വരെ നാല് ദിവസത്തെ ബലി പെരുന്നാൾ അവധിയായിരിക്കും.
അതേസമയം, നോളജ് ആൻഡ് ഹ്യൂമൻ ഡവലപ്മെന്റ് അതോറിറ്റി (കെ.എച്ച്.ഡി.എ) ദുബൈയിലെ സ്വകാര്യ സ്കൂളുകൾക്ക് മേയ് 25 മുതൽ 31 വരെ അവധി പ്രഖ്യാപിച്ചു. അവധിക്ക് ശേഷം ജൂൺ ഒന്നിന് ക്ലാസുകൾ പുനരാരംഭിക്കും.
ജ്യോതിശാസ്ത്ര കണക്കുകൾ പ്രകാരം മേയ് 17ന് മാസപ്പിറ ദൃശ്യമാകാനാണ് സാധ്യത. ഇതനുസരിച്ച് മേയ് 27നാകും ബലി പെരുന്നാൾ ആചരിക്കുക എന്നാണ് സൂചന. മേയ് 18 തിങ്കളാഴ്ച ദുൽഹജ്ജ് മാസം ആരംഭിക്കുമെന്നും മേയ് 26 അറഫ ദിനമായിരിക്കുമെന്നും റിപ്പോർട്ടുകളുണ്ട്.
ദുബൈയിൽ പൊതുജനങ്ങൾക്ക് മാസപ്പിറ ദർശനത്തിനായി പ്രത്യേക പരിപാടികളും സംഘടിപ്പിക്കാറുണ്ട്. ഇസ്ലാമിക് അഫേഴ്സ് ആക്ടിവിറ്റീസ് ഡിപാർട്ട്മെന്റിന്റെ നേതൃത്വത്തിൽ ജെബൽ നസ്വയിൽ വൈകിട്ട് അഞ്ചു മുതൽ സൂര്യാസ്തമയം വരെയാണ് മാസപ്പിറ ദർശനത്തിന് പൊതുജനങ്ങൾക്ക് അവസരമൊരുക്കുന്നത്.
