റാസല്ഖൈമ: മിഡില് ഈസ്റ്റ്-നോര്ത്ത് ആഫ്രിക്ക (മെന) മേഖലയിലെ ഏറ്റവും വലുതും ആഴമേറിയതുമായ പ്രോജക്ട് കാര്ഗോ തുറമുഖ വികസന പദ്ധതിയായ ‘സഖര് 2.0’യുടെ നിര്മാണ പ്രവര്ത്തനങ്ങള് പുരോഗമിക്കുന്നു. ഏകദേശം 367 കോടി ദിര്ഹം ചെലവില് നടപ്പാക്കുന്ന ഈ വമ്പന് പദ്ധതിയുടെ ആദ്യഘട്ടം 2028ഓടെ പൂര്ത്തിയാകുമെന്നാണ് അധികൃതര് അറിയിച്ചിരിക്കുന്നത്.
നിലവില് മിഡില് ഈസ്റ്റിലെയും ആഫ്രിക്കയിലെയും പ്രധാന ചരക്ക് കൈമാറ്റ കേന്ദ്രങ്ങളിലൊന്നായ സഖര് തുറമുഖം പ്രതിവര്ഷം ഏകദേശം 100 മില്യണ് ടണ് ചരക്കുകള് കൈകാര്യം ചെയ്യുന്നു. 47 ബര്ത്തുകളുള്ള ഈ തുറമുഖം ഖനനോല്പന്നങ്ങള്, സിമന്റ്, നിര്മാണ സാമഗ്രികള് എന്നിവയുടെ കയറ്റുമതിയില് നിര്ണായക പങ്കുവഹിക്കുന്നുണ്ട്.
സഖര് 2.0 പദ്ധതി യാഥാര്ഥ്യമാകുന്നതോടെ ലോകത്തിലെ ഏറ്റവും വലിയ ചരക്കുകപ്പലുകള്ക്ക് പോലും റാസല്ഖൈമയിലെത്താന് കൂടുതല് സൗകര്യമൊരുങ്ങും. പദ്ധതിയുടെ ഭാഗമായി 12 മുതല് 18 മീറ്റര് വരെ ആഴമുള്ള ഡീപ് വാട്ടര് ബര്ത്തുകള് നിര്മിക്കും. ഇതിലൂടെ വന്കിട ‘ക്യാപ്സൈസ്’ ചരക്കുകപ്പലുകള്ക്കും തുറമുഖത്തിലേക്ക് നേരിട്ട് പ്രവേശിക്കാനാകും.
പെട്രോകെമിക്കല്സ്, ലിക്വിഡ് ബള്ക്ക് ചരക്കുകള്, ഗ്യാസ് ട്രാന്സ്ഷിപ്മെന്റ് എന്നിവയ്ക്കായി 24 മീറ്റര് ആഴമുള്ള പ്രത്യേക സൗകര്യങ്ങളും പദ്ധതിയില് ഉള്പ്പെടുത്തിയിട്ടുണ്ട്. വര്ഷത്തില് 100 മില്യണ് ടണ് ലിക്വിഡ് കാര്ഗോ കൈകാര്യം ചെയ്യാനുള്ള ശേഷി ഇതിലൂടെ തുറമുഖത്തിന് ലഭിക്കും.
വ്യവസായ ഉപകരണങ്ങളും വന്കിട പ്രോജക്ട് കാര്ഗോകളും കൈകാര്യം ചെയ്യുന്നതിനായി 35,000 മെട്രിക് ടണ് വരെ ഉയര്ത്താന് കഴിയുന്ന ഹെവി-ലിഫ്റ്റ് സൗകര്യങ്ങളും സ്ഥാപിക്കും. കൂടാതെ അസംബ്ലിങ് പ്രവര്ത്തനങ്ങള്ക്ക് അനുയോജ്യമായ വിശാലമായ തുറസായ മേഖലകളും വികസിപ്പിക്കും.
ഫ്രീസോണിനെയും തുറമുഖത്തെയും നേരിട്ട് ബന്ധിപ്പിക്കുന്ന 50 മീറ്റര് വീതിയുള്ള റോഡ് കോറിഡോറുകളും പദ്ധതിയുടെ ഭാഗമാണ്. ആദ്യഘട്ടത്തില് അഞ്ച് ദശലക്ഷം ചതുരശ്ര മീറ്റര് വിസ്തൃതിയിലുള്ള ഫ്രീസോണ് വികസിപ്പിക്കാനാണ് പദ്ധതി. ഭാവിയില് ഇത് 12 മുതല് 14 ദശലക്ഷം ചതുരശ്ര മീറ്റര് വരെ വ്യാപിപ്പിക്കുമെന്നും അധികൃതര് വ്യക്തമാക്കി.
ഗ്രീന് ഷിപ്പ് റീസൈക്ലിങ് ഉള്പ്പെടെയുള്ള പരിസ്ഥിതി സൗഹൃദ സംവിധാനങ്ങളും സഖര് 2.0യുടെ പ്രത്യേകതകളിലൊന്നാണ്. ആഡംബര നൗകകളുടെ അറ്റകുറ്റപ്പണി, ലോജിസ്റ്റിക്സ് സേവനങ്ങള്, അടിസ്ഥാന സൗകര്യ വികസന പദ്ധതികള്ക്കുള്ള പിന്തുണ എന്നിവയ്ക്കും ഇവിടെ സൗകര്യമൊരുക്കും. സുസ്ഥിര വികസനത്തിന് പ്രാധാന്യം നല്കുന്ന ആധുനിക തുറമുഖ മാതൃകയായാണ് സഖര് 2.0 രൂപകല്പന ചെയ്തിരിക്കുന്നത്.
റാസല്ഖൈമയിലെ അല്ജീര്, സഖര്, മാരിടൈം, റാക്, ജസീറ എന്നീ നിലവിലെ തുറമുഖങ്ങളുടെ പ്രവര്ത്തനങ്ങളെ കൂടുതല് വൈവിധ്യവത്കരിക്കാനും പുതിയ പദ്ധതി സഹായകരമാകുമെന്നാണ് വിലയിരുത്തല്. റാക് മാരിടൈം ലോജിസ്റ്റിക്സ് മേഖലയിലെ ഭാവി വളര്ച്ചയ്ക്ക് വഴിതെളിക്കുന്ന പരിവര്ത്തന പദ്ധതിയായാണ് സഖര് 2.0യെ കാണുന്നത്.
പദ്ധതിയുമായി ബന്ധപ്പെട്ട് നിരവധി അന്താരാഷ്ട്ര നിക്ഷേപങ്ങളും ഇതിനകം റാസല്ഖൈമയിലെത്തിയിട്ടുണ്ട്. എ.പി.ടി ഗ്ലോബല് 50 മില്യണ് ദിര്ഹം ചെലവില് ഫാബ്രിക്കേഷന് യൂണിറ്റ് സ്ഥാപിക്കുമ്പോള്, ജിയാന്ഹുവ ഹോള്ഡിങ് ഗ്രൂപ്പും പി.എച്ച്.സി ടെക്നോളജീസും ചേര്ന്ന് 120 മില്യണ് ദിര്ഹം ചെലവില് നിര്മാണ സാമഗ്രി ഫാക്ടറി ആരംഭിക്കും. പദ്ധതിയുടെ ആദ്യഘട്ട ലാന്ഡ് റിക്ലമേഷന് ജോലികളുടെ 98 ശതമാനവും പൂര്ത്തിയായതായി അധികൃതര് അറിയിച്ചു.
