ദുബൈ: ലോകത്തിലെ ഏറ്റവും ഉയരം കൂടിയ കൊടുമുടിയായ എവറസ്റ്റ് കീഴടക്കി ചരിത്രനേട്ടവുമായി ദുബൈയിൽ താമസിക്കുന്ന 17കാരൻ ഗബ്രിയേൽ മിഡിൽട്ടൺ. എവറസ്റ്റ് കൊടുമുടിയിൽ യു.എ.ഇ പതാക ഉയർത്തിയ ഗബ്രിയേൽ, ഏറ്റവും പ്രായം കുറഞ്ഞ ബ്രിട്ടീഷ് പൗരനായി എവറസ്റ്റ് കീഴടക്കിയെന്ന റെക്കോഡും സ്വന്തമാക്കി.
മെയ് 27-ന് രാവിലെ 9.20-നാണ് 17 വയസ്സും ഒരു മാസവും 28 ദിവസവും പ്രായമുള്ള ഗബ്രിയേൽ ഹിമാലയൻ മലനിരകളുടെ നെറുകയായ എവറസ്റ്റ് കൊടുമുടിയിൽ എത്തിയത്. പിതാവും പ്രശസ്ത ടെലിവിഷൻ അവതാരകനും മുൻ റോയൽ മറീൻ സൈനികനുമായ ആന്റ് മിഡിൽട്ടണിനൊപ്പമാണ് ഗബ്രിയേൽ ഈ സാഹസിക ദൗത്യം പൂർത്തിയാക്കിയത്.
എട്ട് വർഷം മുമ്പ് എവറസ്റ്റ് കീഴടക്കിയ അനുഭവസമ്പത്തുള്ള ആന്റ് മിഡിൽട്ടൺ തന്നെയാണ് മകനെ ഈ ചരിത്രനേട്ടത്തിലേക്ക് കൈപിടിച്ചുയർത്തിയത്. മൂന്ന് വർഷം മുമ്പ് കുടുംബസമേതം ദുബൈയിൽ സ്ഥിരതാമസമാക്കിയ ആന്റ്, മകന്റെ നേട്ടത്തെ യു.എ.ഇയ്ക്കുള്ള ആദരസൂചകമായും വിശേഷിപ്പിച്ചു.
നേട്ടത്തിന് പിന്നാലെ പ്രതികരിച്ച ഗബ്രിയേൽ, എവറസ്റ്റ് ദൗത്യം ജീവിതത്തിലെ ഏറ്റവും വെല്ലുവിളി നിറഞ്ഞ അനുഭവമായിരുന്നുവെന്ന് പറഞ്ഞു. കഠിനമായ തണുപ്പും ശാരീരിക ബുദ്ധിമുട്ടുകളും അതിജീവിച്ച ശേഷമാണ് ലക്ഷ്യത്തിലെത്താൻ കഴിഞ്ഞതെന്നും കൊടുമുടിയിൽ എത്തിച്ചേർന്ന നിമിഷം എല്ലാ കഷ്ടപ്പാടുകളും മറന്നുപോയെന്നും അദ്ദേഹം വ്യക്തമാക്കി. പിതാവിന്റെ പ്രചോദനവും പിന്തുണയുമാണ് ഈ നേട്ടത്തിന് പിന്നിലെ പ്രധാന ശക്തിയെന്നും ഗബ്രിയേൽ കൂട്ടിച്ചേർത്തു.
മകന്റെ വിജയത്തിൽ അഭിമാനം പ്രകടിപ്പിച്ച ആന്റ് മിഡിൽട്ടൺ, കുടുംബത്തിന് സുരക്ഷിതവും സമാധാനപരവുമായ ജീവിതാന്തരീക്ഷം ഒരുക്കിയ യു.എ.ഇയോട് നന്ദി രേഖപ്പെടുത്തി. താനും മകനും ആശങ്കകളില്ലാതെ ഈ ദൗത്യത്തിൽ ശ്രദ്ധ കേന്ദ്രീകരിക്കാൻ സാധിച്ചതിന് യു.എ.ഇ നൽകിയ പിന്തുണ വലിയ കാരണമായിരുന്നുവെന്നും അദ്ദേഹം പറഞ്ഞു.
എവറസ്റ്റ് ദൗത്യത്തിന്റെ ഭാഗമായി മിഡിൽട്ടൺ കുടുംബം മുഴുവൻ എവറസ്റ്റ് ബേസ് ക്യാമ്പ് വരെ ഒരുമിച്ച് ട്രെക്കിങ് നടത്തിയിരുന്നു. പിന്നീട് ഭാര്യയെയും ഇളയ കുട്ടികളെയും തിരിച്ചയച്ച ശേഷം ആന്റ് മിഡിൽട്ടണും ഗബ്രിയേലും ചേർന്നാണ് കൊടുമുടിയിലേക്കുള്ള അന്തിമ കയറ്റം ആരംഭിച്ചത്. നിരവധി ദിവസങ്ങളായുള്ള കഠിന പരിശ്രമത്തിനൊടുവിലാണ് ഇരുവരും വിജയകരമായി എവറസ്റ്റ് കീഴടക്കിയത്.
