ജൂലൈയിൽ അന്താരാഷ്ട്ര സീറ്റ് ശേഷിയിൽ 18% വർദ്ധനവ്; ലണ്ടൻ ഹീത്രൂവിനെയും ആംസ്റ്റർഡാമിനെയും പിന്നിലാക്കി ദുബായ് ഒന്നാമത്
ദുബായ്, യു.എ.ഇ :ലോകത്തിലെ ഏറ്റവും തിരക്കേറിയ അന്താരാഷ്ട്ര വിമാനത്താവളമെന്ന പദവി സ്വന്തമാക്കി ദുബായ് ഇന്റർനാഷണൽ എയർപോർട്ട് (DXB). ഏവിയേഷൻ അനലിറ്റിക്സ് സ്ഥാപനമായ OAG പുറത്തുവിട്ട ഏറ്റവും പുതിയ റിപ്പോർട്ട് പ്രകാരം 2026 ജൂലൈ മാസത്തിൽ ഏറ്റവും കൂടുതൽ അന്താരാഷ്ട്ര സീറ്റുകൾ ലഭ്യമാക്കിയ വിമാനത്താവളമായി ദുബായ് തെരഞ്ഞെടുക്കപ്പെട്ടു.
2026 ജൂലൈ മാസത്തിൽ മാത്രം 4.35 ദശലക്ഷം (43.5 ലക്ഷം) അന്താരാഷ്ട്ര സീറ്റുകളാണ് ദുബായ് എയർപോർട്ട് വാഗ്ദാനം ചെയ്തത്. മുൻവർഷത്തെ അപേക്ഷിച്ച് 18 ശതമാനത്തിന്റെ മികച്ച വർദ്ധനവാണിത്. 4.23 ദശലക്ഷം സീറ്റുകളോടെ ലണ്ടൻ ഹീത്രൂ രണ്ടാം സ്ഥാനത്തും, 3.82 ദശലക്ഷം സീറ്റുകളോടെ ആംസ്റ്റർഡാം ഷിഫോൾ മൂന്നാം സ്ഥാനത്തും എത്തി.
റെക്കോർഡ് യാത്രക്കാരും ഡിജിറ്റൽ സംവിധാനങ്ങളും
2025-ൽ ആകെ 95.2 ദശലക്ഷം യാത്രക്കാരെ കൈകാര്യം ചെയ്ത് ചരിത്രത്തിലെ ഏറ്റവും ഉയർന്ന വാർഷിക നേട്ടം ദുബായ് എയർപോർട്ട് സ്വന്തമാക്കിയിരുന്നു. ഈ വളർച്ചയുടെ തുടർച്ചയായി 2026-ന്റെ ആദ്യ പാദത്തിൽ (Q1) മാത്രം 18.6 ദശലക്ഷം യാത്രക്കാരാണ് ദുബായ് വഴി യാത്ര ചെയ്തത്.
യാത്രക്കാരുടെ തിരക്ക് വർദ്ധിക്കുമ്പോഴും സേവനങ്ങൾ വേഗത്തിലാക്കാൻ അത്യാധുനിക ഡിജിറ്റൽ സാങ്കേതികവിദ്യകളാണ് വിമാനത്താവളത്തിൽ സജ്ജീകരിച്ചിരിക്കുന്നത്:
- സ്മാർട്ട് ഗേറ്റ് വെരിഫിക്കേഷൻ: പാസ്പോർട്ട് കൺട്രോളിൽ എത്തുന്നതിന് മുൻപ് തന്നെ സ്മാർട്ട് ഗേറ്റ് യോഗ്യത പരിശോധിക്കാനുള്ള ഡിജിറ്റൽ സംവിധാനം.
- ബയോമെട്രിക് സിസ്റ്റം: മുഖവും കണ്ണും സ്കാൻ ചെയ്ത് നിമിഷങ്ങൾക്കകം ഇമിഗ്രേഷൻ പൂർത്തിയാക്കാവുന്ന ബയോമെട്രിക് ഗേറ്റുകൾ.
- ‘റെഡ് കാർപെറ്റ്’ കോറിഡോർ: രേഖകൾ കാണിക്കാതെ തന്നെ 6 മുതൽ 14 സെക്കൻഡിനുള്ളിൽ ഇമിഗ്രേഷൻ നടപടികൾ പൂർത്തിയാക്കാവുന്ന അത്യാധുനിക സംവിധാനം.
- ഫാമിലി & പ്രവാസി മുൻഗണനകൾ: ഭിന്നശേഷിക്കാർക്കും കുടുംബങ്ങൾക്കുമായി പ്രത്യേക മുൻഗണനാ ലൈനുകളും റിയൽ-ടൈം ബാഗേജ് ട്രാക്കിംഗും.
